Patrekur og Dagur æfingameistarar Fjölnis

Æfingameistarar Fjölnis   Á mjög fjölmennri lokaæfingu Skákdeildar Fjölnis voru þeir Patrekur Þórsson og Dagur Ragnarsson verðlaunaðir fyrir frábæran árangur og ástundun á laugardagsæfingum Fjölnis í vetur. Patrekur Þórsson fékk afhentan æfingabikarinn. Hann hefur mætt nánast á hverja einustu æfingu skákdeildarinnar og tekið miklum framförum í vetur. Dagur Ragnarsson hefur langoftast unnið æfingaskákmót Fjölnis á laugardögum í vetur.

Hann fékk að launum glæsilegt gjafabréf í Kringlunni. Dagur fékk æfingabikarinn í fyrra fyrstur allra Fjölniskrakka. Um 20 - 30 krakkar hafa mætt á hverja einustu æfingu Fjölnis í vetur. Finnur Finnsson hefur séð um byrjendakennsluna og unnið þar árangursríkt starf. Skákdeild Fjölnis vill  færa Finni sérstakar þakkir fyrir þetta ómetanlega framlag til skáklistarinnar sem allt hefur verið gert fyrir ánægjuna af hans hálfu.