Skákfélag Akureyrar sigurvegari sveitakeppni skákfélaga á Norðurlandi

Sveitakeppni skákfélaga á Norðurlandi fór fram laugardaginn 29. september sl. á Sauðárkróki. Fjórar sveitir mættu til keppni, tvær frá Akureyri, en einnig frá Dalvík, auk heimamanna í Skagafirði. Eftir harða baráttu stóð A sveit Skákfélags Akureyrar uppi sem sigurvegari, hlaut 8 vinninga. Sveit Dalvíkur varð í öðru sæti með 6 1/2 vinning.

B sveit Skákfélags Akureyrar hlaut 5 vinninga en sveit Sauðkrækinga rak lestina með 4 1/2 vinning.

Tefldar voru atskákir með 25 mínútna umhugsunartíma. Sigursveit Skákfélags Akureyrar skipuðu þeir:

Gylfi Þór Þórhallsson, sem hlaut 1,5 vinning, Þór Valtýsson, sem hlaut 1 vinning, Sigurður Eiríksson, sem fékk fullt hús,  3 vinninga, og Sveinbjörn Sigurðsson, sem fékk  2,5 vinning. 

Að lokinni sveitakeppninni var efnt til hraðskákmóts. Tefldar voru 7 umferðir eftir monrad kerfi. Sigurvegari þess varð Þór Valtýsson, hlaut 6 vinninga. Annar varð Gylfi Þór Þórhallsson sem hlaut 5,5 vinning og þriðji Sigurður Eiríksson með 4,5 vinning.