Skákþáttur Morgunblaðsins: Héðinn leiðir Íslandsmótið

Héðinn Steingrímsson hefur unnið tvær fyrstu skákir sínar í keppni landsliðsflokks á Skákþingi Íslands sem fram fer í Hafnarfirði og er einn efstur en hann er almennt talinn einn sigurstranglegasti keppandi mótsins meðal þeirra tíu keppenda sem tefla allir við alla. Hinn stórmeistarinn í flokknum, Hannes Hlífar sem hefur orðið Íslandsmeistari oftar en nokkur annar hefur gert jafntefli í tveim fyrstu skákum sínum. Mótið vekur athygli m.a. vegna þátttöku þriggja ungra skákmanna sem heyja prófraun sína í landsliðsflokki, hins 14 ára gamla Vignis Vatnars Stefánssonar, Bárðar Arnar Birkissonar og Dags Ragnarssonar.

Héðinn var með hvítt í tveim fyrstu skákum sínum og í upphafsumferðinni vann hann fremur auðveldan sigur yfir Birni Þorfinnssyni sem að flestra mati tefldi af fullmikilli léttúð og síðan vann Héðinn Bárð Örn. Dagur Ragnarsson lagði hinn þrautreynda Ísfirðing Guðmund Gíslason í 2. umferð eftir jafntefli við Hannes Hlífar í 1. umferð. Staðan að loknum tveim umferðum er þessi:

1. Héðinn Steingrímsson 2 v. 2. – 4. Dagur Ragnarsson, Sigurbjörn Björnsson og Guðmundur Kjartansson 1 ½ v. 5. Hannes Hlífar Stefánsson 1 v. 6. – 10. Vignir Vatnar Stefánsson, Bárður Örn Birkisson, Davíð Kjartansson, Guðmundur Gíslason og Björn Þorfinnsson ½ v.

Í 3. umferð sem fram fór í gærkvöldi áttu að tefla saman Vignir og Héðinn, Bárður og Björn, Davíð og Guðmundur Kjartansson, Dagur og Sigurbjörn og Hannes og Guðmundur Gíslason.

Það liggur ljóst fyrir að þetta mót er ekki jafn sterkt og t.d. Íslandsmótið 2015 en þá voru meðal þátttakenda Jóhann Hjartarson, Jón L. Árnason, Hjörvar Steinn Grétarsson og Henrik Danielssen svo nokkrir séu nefndir. Íslandsmótið í fyrra var einnig betur skipað. Hinsvegar verður fróðlegt að fylgjast með ungu mönnunum sem hafa teflt mikið undanfarið. Þannig hefur Dagur Ragnarsson farið vel af stað og sigur hans í 2. umferð sem hér fer á eftir var einkar sannfærandi:

Skákþing Íslands 2017:

Guðmundur Gíslason – Dagur Ragnarsson

Slavnesk vörn

1. d4 d5 2. c4 c6 3. cxd5 cxd5 4. Bg5!?

Uppskiptaafbrigðið í slavnesku vörninni er ekki hættulaust ef svartur er ekki vel inni í alfaraleiðum. En Guðmundur lætur ekki reyna á þekkingu Dags og velur sjaldséðan leik en biskupinum er oftast valinn staður á f4.

4. ... Rc6 5. Rc3 h6 6. Bh4 g5 7. Bg3 Rf6 8. e3 Da5

Dagur bregst hart við, er þegar með ýmsar hugmyndir tengdar leppun riddarans á c3.

9. Bd3 Re4 10. Bxe4?!

Vafasamt. Etir 10. Rge2 er staðan í jafnvægi.

10. ... dxe4 11. a3 Bg7 12. h4 Bf5 13. b4 Dd8 14. hxg5 hxg5 15. Hxh8+ Bxh8 16. Hc1 Hc8 17. Dh5 Bf6 18. Rge2 Dd7!

Þrátt fyrir ýmsar hótanir hvíts er svarta staðan þegar betri og engan veikan blett að finna.

19. d5 Rd8 20. Rd4 Bg6 21. Dh6 a6 22. Dh2 Bg7 23. Be5 f6 24. Bg3 e6 25. Re2 e5! 

Lokar á allan samgang hvítu mannanna. Hvíta staðan er strategískt töpuð.

26. f3 exf3 27. gxf3 Rf7 28. f4 Dg4 29. Hd1 Kd7 30. fxe5 fxe5 31. Ra4 Hh8 32. Dg2 Rd6 33. Hc1 Ke8 34. Rc5 Hh3 35. Re6 Bf6 36. Hc7 Be4

Loks lætur þessi biskup til sín taka og þá er fátt um varnir.

37. Df2 Bf3 38. Bh2 Re4 39. Hc8+ Kd7 40. Hc7+ Ke8 41. Hc8 Kd7 42. Hc7+ Kd6 43. Dg1 Bxe2 44. Hxb7 Dh4+

– og hvítur gafst upp. Besta skákin á Íslandsmótinu til þessa. 

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 13. maí

Skákþættir Morgunblaðsins