Skákdeild KR - fjölmennt jólaskákmót: Siguringi sigraði og brosti breitt

Metþátttaka var í Jólakapp&happ móti KR á mánudagskvöldið var. Keppendur voru  36 talsins á öllum aldri – frá 10 ára til áttræðs. Ýmislegt var gert til hátíðabrigða, kaffi og konfekt, malt og appelsín fyrir þorstláta og svo vegleg verðlaun fyrir sigurvegarana auk vinningahappdrættis í mótslok, bæði mjúkir og harðar pakkar.  

Þetta var hörkumót og ekki heyglum hent því tefldar vor hvorki meira né minna en 13 umferðir í striklotu með 7 mín. uht. á skákina. Nokkuð sem rótgrónir KáErringar eru vanir en fæstir aðrir og fátítt í öðrum klúbbum hérlendis og þó víðar væri leitað.

Eftir að hafa verið í forystu framan af missti Gunnar Freyr Rúnarsson forystuna til Siguringa Sigurjónssonar sem lét hana ekki af hendi eftir það. Þar reið 1 sekúnda baggamuninn. Hann bar sigur úr bítum með 11.5 v. af 13 mögulegum. Gunnar Freyr varð annar með 11 v. og þeir Stefán Bergsson og Jón Þór Bergþórsson jafnir í 3.-4.  sæti, en sá fyrrnefndi örlítið hærri á stigum. Hinn harðsnúni ungi og uppvaxandi meistari Gauti Páll Jónsson var svo einn í 5 sæti með 8.5v. Eftir það fór að teygast úr röðinni en og sjá með á mótstöflunni hér að neðan.  

Óvíst er hvort teflt verður í KR mánudagskvöldið 28. desember vegna spengihættu, en þá er sala flugelda á vegum vesturbæjarstórveldisins þegar hafin. Nýársmótið verður hins vegar haldið með stæl að kvöldi 4. janúar 2016 þegar mesti jólagalsinn er runninn af mönnum. Um að gera að sem flestir láti sjá þig þar á ný til að hrista af sér hátíðarslenið.

Skákdeildin óskar öllum skákunnendum sem og öðrum landsmönnum Gleðilegra Jóla og Heillaríks komandi árs bæði í leik og starfi. 

 

Myndaalbúm (ESE)