Örn Leó unglingameistari Íslands

Örn Leó Jóhannsson, Skákfélagi Reykjanesbæjar, sigraði á Unglingameistaramóti Íslands sem fram fór um helgina. Átta keppendur mættu til leiks og tefldu einfalda umferð allir við alla með 25 10 á klukkunni. Örn byrjaði mótið af miklum krafti og eftir fimm umferðir hafði hann enn fullt hús. Í síðustu tveimur umferðunum beið hans krefjandi verkefni þar sem biðu hans Fjölnispiltarnir Jón Trausti Harðarson og Dagur Ragnarsson. Örn náði auðveldu jafntefli gegn Jóni Trausta og hafði þá vinningsforskot á Dag fyrir síðustu umferðina. Dagur tefldi stíft til sigurs og á hrós skilið fyrir að ná að leggja endalausar þrautir fyrir Örn. Örn stóðst þær allar í vel tefldri skák og endaði Dagur á að leggja allt í sölurnar í endatafli og tapaði að lokum. 

Með sigrinum tryggði Örn sér sæti í landsliðsflokki árið 2016 sem að líkur lætur verður tefldur í maí. Sannarlega glæsilegt hjá þessum vaxandi og hæfileikaríka skákmanni. Athyglisvert varðandi árangur Arnar er að hann hefur lítt sætt formlegri kennslu á sínum skákferli nema þá helst frá föður sínum Jóhanni Ingvarssyni.

Mótstaflan á Chess-Results.