Æsir í Ásgarði: Friðgeir Hólm skákaði öllum

Það var þröng á þingi í Stangarhylnum í gær yfir 30 öldungar mættir til tafls og því þéttsetinn bekkurinn enda bara hálfur salurinn til reiðu vegna stjórnarfundar í FEB.  Blönduðust þar saman Æsir og Riddarar enda margir sem tefla í báðum skákklúbbum svokallaðra eldri borgara.  Sumir eru þó mun yngri að árum en aðrir allt að 37 ára aldursmunur því fyrir kemur að Brynleifur Sigurjónsson elsti félaginn blandi sér í hópinn en hann er fæddur 1917 og því 96 ára á þessu ári.

Í gær var það hins vegar unglingurinn í hópnum Friðgeir Hólm Karlsson, tæplega sextugur,  sem skákaði öllum öðrum og varð efstur. Friðgeir er jafnan meðal efstu manna hvort heldur hér, í Riddaranum, KR eða Gallerýinu, svo sigur hans í dag kemur síður en svo á óvart. Mikill skákgeggjari þar á ferð sem ekki lætur sig muna um að tefla í fjórum mótum í viku eins og þeir allra hörðustu.  Hinn síungi aldni seggur Páll G. Jónsson varð annar sem átti að venju marga snilldartakta, en oft hefur það verið klukkuskrattinn sem hefur haft af honum marga borðleggjandi vinninga gegn um tíðina.

Skákklúbbar eldri borgara á höfuðborgarsvæðinu ÆSIR  OG RIDDARINN eru báðir stofnaðir árið 1998 og eiga því 15 ára afmæli um þessar mundir.  Sú hugmynd hefur kviknað að efna til sameiginlegs jóla- og afmælismóts með myndarlegu sniði til að fagna og gera sé glaðan dag af þessu tilefni.

Öflugum fyrirtækjum sem vilja ná góðu viðskiptasambandi við eldri borgara gefst því nú kjörið tækifæri til þess að með því að bjóða til stórmóts af þessu tilefni.  

Nánari úrslit má sjá á meðf. mótsstöflu og vettvangsmyndir í myndasafni.