Þrír Íslendingar með fullt hús á N1 Reykjavíkurmótinu: Friðrik mætir Navara í 3. umferð!

Þrír Íslendingar eru með fullt hús eftir tvær umferðir á N1 Reykjavíkurskákmótinu, en annarri umferð var að ljúka. Þetta eru Íslandsmeistarinn Þröstur Þórhallsson og alþjóðlegu meistararnir Hjörvar Steinn Grétarsson og Guðmundur Kjartansson. Í þriðju umferð, sem hefst í Hörpu klukkan 16.30 í dag, teflir Þröstur við kínverska ofurstórmeistarann Bu Xiangzhi, Guðmundur mætir hollenska stórmeistaranum Erwin L´ami og Hjörvar Steinn glímir við alþjóðameistarann Bob Beeke.

Augu flestra munu örugglega beinast að skák Friðriks Ólafssonar sem hefur hvítt gegn hinum unga og gríðarlega stigaháa David Navara frá Tékklandi.

2. umferð var bráðskemmtileg og spennandi. Dagur Arngrímssson tefldi við Anish Giri, stigahæsta keppanda mótsins, og tapaði eftir harða baráttu. Björn Þorfinnsson tefldi afar skemmtilega skák við Frakkann Vachier-Lagrave og varð líka að játa sig sigraðan.

Nokkuð var um óvænt úrslit og íslensku krakkarnir á mótinu stóðu sig með sóma. Nansý Davíðsdóttir, 11 ára, sigraði þýskan skákmann, þrátt fyrir 400 skákstiga mun, og Gauti Páll Jónsson sigraði Bjarna Sæmundsson, þrátt fyrir mikinn stigamun. Dawid Kolka og Veronika Steinunn Magnúsdóttir gerðu jafntefli við mun stigahærri andstæðinga.

Íslensku stórmeisturunum gekk misjafnlega. Friðrik Ólafsson og Hannes Hlífar Stefánsson nýttu sér þann rétt að sitja yfir í eina umferð og spöruðu þannig kraftana fyrir síðdegisumferðina. Þröstur sigraði, sem fyrr sagði, en Henrik Danielsen tapaði óvænt fyrir Bob Beeke. Þá gerði Stefán Kristjánsson jafntefli við hinn unga og efnilega Wang Yiye frá Kína.

Aðstæður á N1 Reykjavíkurskákmótinu er frábærar og eru áhorfendur hvattir til að fjölmenna á 3. umferðina sem stendur fram á kvöld. Búast má við heilmiklu fjöri á öllum hæðum í Hörpu, enda verða íslensku tónlistarverðlaunin afhent í kvöld með tilheyrandi lúðraþyt og söng.

Úrslit 3. umferðar

Myndaalbúm frá 2. umferð

Heimasíða N1 Reykjavíkurmótsins