Danir lágu í því - Norðurlandameistarar Rimaskóla unnu 4 - 0 í lokaumferð

 

Skáksveit Rimaskóla tók í dag við gullinu á Norðurlandamóti grunnskólasveita sem var að ljúka í borginni Tampere í Finnlandi. Í lokaumferðinni steinlágu dönsku meistararnir frá Árósum fyrir Rimaskólakrökkum á öllum borðum. Þau Dagur, Oliver Aron, Jón Trausti og Nansý tefldu sóknarskákir og gáfu ekkert eftir við taflborðið þó að sigur væri þegar í höfn.

Rimaskóli hlaut 18,5 vinninga af 20 mögulegum á mótinu sem er einn besti árangur grunnskóla frá Íslandi á þessu móti fyrr og síðar en Salaskóli náði t.d. 19 vinningum fyrir nokkrum árum síðan.

Í lokaumferðinni í Tampere unnu Norðmenn og Svíar finnsku sveitirnar líka stórt og komu Norðmenn vinningi á undan Svíunum í keppninni um annað sætið. Jón Trausti Harðarson fékk fullt hús, 5 vinninga, Hrund vann allar sínar 4 skáir og Nansý sínar tvær skákir.

Dagur halut 3,5 vinninga af 4 og Oliver Aron 4 vinninga úr 5 skákum. Davíð Kjartansson stóð vaktina allan tímann og náði frábærum árangri með krakkana. Fararstjóri sem fyrr var Helgi Árnason skólastjóri.

Rimakóli hefur nú fimm sinnum unnið Norðurlandameistaratitla á tíu árum. Skólinn hefur 11 sinnum tekið þátt í NM og ekki ólíklegt að skólinn eigi eftir að mæta á þau fleiri á næstu árum.Það vakti nokkra athygli við verðlaunaafhendingu að enginn verðlaunagripur var í boði, aðeins verðlaunapeningar fyrir efstu sveitirnar. Einnig vakti athygli að Svíar mættu ekki við verðlaunaafhendinguna þó að beðið væri eftir þeim í hálfa klukkustund. Þrátt fyrir vonbrigði með eigin frammistöðu var það lágmarkskurteisi hjá Svíunum að mæta við þessa viðhöfn.

Myndaalbúm (HÁ)