Ól-pistill nr. 11 - Góður sigur - vont tap - Allt í háalofti

Það gekk hörmulega hjá liðinu í opnum flokki í gær þegar viðureign gegn Perú tapaðist 0,5-3,5.  Kvennaliðið náði hins vegar framúrskarandi úrslitum gegn Suður-Kóreu, 4-0.  Rússar eru efstir í opnum flokki eftir góðan sigur á ólympíumeisturum Úkraínu en Kínverjar leiða í kvennaflokki.  Í morgun var ECU-fundur þar sem hart var tekist á og á morgun hefst FIDE-þingið.

Gærdagurinn

Það var aðeins Hjörvar Steinn sem gerði jafntefli í gær.  Aðrir töpuðu.  Og ekki nóg með það heldur leit dæmið allt bara ágætlega lengi vel út en stöður Hannesar, Henriks og Dags hrundu svo allar á mjög skömmum tíma og mjög slæmt, 0,5-3,5, tap staðreynd.  Ein verstu úrslit íslensks lið á ólympíuskákmóti.  Í Khanty unnum við Perú með sama mun og þá var reyndar heppnin með okkur.

Stelpurnar yfirspiluðu S-Kóreu og unnu öruggan 4-0 sigur. Lenka, Hallgerður, Tinna og Elsa tefldu.  Góð úrslit því styrkleikinn var svipaður á 2.-4. borði.

Umferð dagsins

Í dag er það svo Afríkuríkið Kenýa.  Í fyrsta skipti sem við mætum Kenýa.   Hér hlýtur stórsigur að vinnast.  Henrik hvílir.

Kvennaliðið mætir sveit Ástralíu.  Við höfum einu sinni mætt þeim áður, árið 1984, og þá vannst 2,5-0,5 sigur.  Ólöf og Sigurlaug unnu þá en Guðlaug gerði jafntefli.  Tinna hvílir í dag.

Skákstjórnmál - allt í háa lofti

Í gær var haldinn stjórnarfundur í Skáksambandi Norðurlanda en allir forsetar skáksambandanna eru hér.   Vorum við að stilla saman strengi fyrir FIDE- og ECU-fundina og ræða hvað megi bæta í Norrænu skáksamstarfi.  Skemmtilegur og uppbyggjandi fundur, eitthvað annað en ECU-fundurinn sem var svo í morgun. 

ECU-fundurinn var sérstakar.  Hann hófst með skjákynningu frá sambandinu sem gekk að miklu leyti á að sýna Danaliov með hinum ýmsum fyrirmönnum.  Kasparov var með kynningu á Kasparov Foundation og svo kom hér menntamálaráðherra Serbíu, sem er stórmeistari kvenna.  Hef ekki nafið.

Að því loknu fór eiginlega allt í háaloft.  Ali Nihat, forseti tyrkneska skáksambandsins, var með stanslausa skotárás á Danilov og hans menn.   Taldi of há laun greidd og Danilov ætti að afþakka laun á meðan ekki gengur betur að ná í styrktarsamninga.

Greint var frá styrktarsamning sem ECU hafði gert við spænska ferðaaðila upp á €25.000. Kom í ljós að Ali, hafði samninginn undir höndum, hafði verið lekið til hans úr stjórn ECU og sá honum allt til foráttu.  Bauðst til að útvega annan styrktaraðila með tvöfaldri upphæð.  Þetta var svo rætt fram og eftir og að lokum bauðst af Bareev til að útvega nýjan samning með tvöfaldri upphæð Ali!  Hvort hann var að grínast eða ekki, veit ég ekki.

Einnig er ljóst að einn stjórnarmanna, Theodoros Tsorbatzoglou, frá Grikklandi, er í mikilli stjórnarandstöðu innan stjórnar ECU.   Ali og Grikkinn, Georgios Makrapoulos, voru þeir en sem greiddu atkvæði gegn fjárhagsáætlunar stjórnar en þeir eru báðir mjög valdamiklir innan FIDE.  Segja má að stríð ríki á milli forystumanna ECU og FIDE og það verður svo greinilega a.m.k. fram til ársins 2014.

Á morgun hefst FIDE-þingið og á að samkvæmt dagskrá að standa allan daginn á morgun sem og daginn þar á eftir.  Pistlaskrif næstu daga verða því í óreglulegri kantinum. 

Toppbaráttan

Rússar eru efstir með 15 stig eftir sigur á ólympíumeisturum Úkraína í gær.  Úkraínumaðurinn fyrrverandi, Karjakin, reyndist sinni fyrrverandi þjóð erfiður, vann sína skák.

Kínverjar, Armenar, Bandaríkjamenn, Þjóðverjar og Filippseyingar koma næstir með 13 stig.  Þeir síðastnefndu hafa komið verulega á óvart og lögðu Englendinga í gær þar sem Torre heldur áfram að brillera og vann nú Short.

Rússar og Kanar mætast á fyrstaborði.  Kamsky mætti í hlýrabol og með derhúfu.  Enginn lék fyrsta leikinn í dag!

Kínverjar eru efstir í kvennaflokki með 14 stig, Rússar, Frakkar, Indverjar og Úsbekar hafa 13 stig.

Norðurlandamótið:

Eftir úrslit gærdagsins erum við orðnir neðstir Norðurlanda með 7 stig.  Danir, sem unnu Norðmenn, eru efstir með 11 stig, en þeir hafa verið býsna heppnir með andstæðinga umferð eftir umferð, og hafa ávallt mætt sveitum sem teljast veikari en þeir.  Meira að segja í dag, þegar þeir mæta Makedóníumönnum.

Svíar, Finnar og Norðmenn hafa 9 stig og Færeyingar hafa 8 stig eftir tvo sigra í röð.

Staðan í opnum flokki:

Rk.	SNo	Team	TB1	TB2	TB3	TB4
26	39	Denmark	11	144	21,5	52
46	34	Sweden	9	141	19,5	64
53	52	Finland	9	132,5	18,5	66
57	54	Norway	9	119	18	65
81	74	Faroe Islands	8	91	18	55
88	51	Iceland	7	117	16	72

 

Eftir úrslitin í gær erum við komnir í 3. sæti í kvennaflokki með 8 stig eins og Danir.  Svíar eru efstir með 9 stig, Norðmenn hafa 7 stig og Finnar reka lestina með 6 stig.

Staðan í kvennaflokki:

Rk.	SNo	Team	TB1	TB2	TB3	TB4
51	46	Sweden	9	90,5	17	62
66	51	Denmark	8	88	15	64
70	62	Iceland	8	75,5	16	54
72	40	Norway	7	101,5	16	60
92	77	Finland	6	70	12	62

Nóg í bili.

Gunnar Björnsson