Ól-pistill nr. 3 - alvaran byrjar

Það gekk vel í gær.  4-0 sigrar í báðum flokkum.  Sigurinn í kvennaflokki var fremur öruggur og þær namibísku komnar fremur skammt á veg í skákfræðum þrátt fyrir kennslu Henriks Danielsen þar hér áður fyrr.  Sigurinn í opnum flokki var reyndar einnig fremur öruggur en tók heldur lengri tíma.  Í dag tefla sveitirnar við sveitir Argentínu og Ísrael og ljóst að róðurinn verður öllu erfiðari. 

Hallgerður Helga tefldi í fyrsta skipti á fyrsta borði fyrir íslenska ólympíuliðið og þetta var í fyrsta skipti síðan í Tórínó 2006 að Lenka hvíldi á ólympíuskákmóti.  Hún tefldi allar skákirnar í Dresden 2008 og Khanty 2010.

Dagur Arngrímsson hvílir hjá drengjunum aftur í dag enda tiltölulega nýkominn og kemur svo væntanlega inn í 3. umferð á morgun en Elsa María hvílir hjá stelpunum.  Tinna Kristín átti að hvíla en mistök áttu sér stað hjá skákstjórunum við skráningu frá Davíð.  Þegar Davíð hafði gert nokkrar árangurslausar tilraunir til að breyta skráningunni og fengið loksins þau svör að tala við skákstjóra í upphafi umferðar ákvað hann að láta slag standa og að Tinna myndi tefla.   

Argentínumenn hvíla fyrst borðs manninn sem tapaði fyrir keppanda frá Botswana í fyrstu umferð.  Okkur hefur oft gengið vel gegn Suður-Ameríkumönnum og er skemmst að minnast sigur á Chile á síðasta ólympíumóti, 3,5-0,5.  Vonandi að það góða gengi haldi áfram. 

Eins og kom fram í fyrri pistli gekk fremur brösuglega hjá mér í gær og engar myndir teknar.  Davíð náði þó mynd úr kvennaflokki.  Engar myndir af körlunum úr fyrstu umferð.  Mér tókst að herja út takmörkuð blaðamannaréttindi hér þannig að framvegis get ég verið inn í skáksal a.m.k. fyrstu 10 mínúturnar og ætti því að getað náð myndum í byrjun umferða hér eftir.   Fullt af myndum fylgir með.  Athugaði möguleika þess að fá meiri réttindi en það gekk ekki.  Allt mjög strangt hér, miklu strangara en í Khanty.  Takk Feller og félagar!

Alls konar sérkennilegheit gerðust í viðureignum íslensku liðanna í gær í dag.  Andstæðingur Þrastar ýtti fjórum sinnum á klukkuna með annarri hönd en hann lék á borðinu.  Fékk hann að endingu tímarefsingu frá dómara. 

Einn andstæðingurinn í Namibíu felldi tár eftir að hafa tapað en okkur sýnist að róðurinn fyrir þær verði mjög erfiður hér úti og fleiri tár líklega eftir að falla hjá þessari stúlku.  Andstæðingur Tinnu átti komment umferðarinnar þegar hún sagði í upphafi skákarinnar „I am black" en eins og sjá má myndinni er lítið meira um það að segja. 

Omar Salama er hérna meðal skákstjóra en hann býr reyndar ekki á sama hóteli og við.

Nokkuð var um óvænt úrslit í gær og nokkrir sterkir skákmenn töpuðu gegn minni spámönnum.  Má þar nefna Armenann Movsesian og Hollendinginn Van Wely,

Hótelið er fínt, fimm stjörnu hótel.  Einhver internet-vandræði eru í gangi bæði í hótelinu og á skákstað en ég fékk mjög hraðvirkan 3G-pung frá mótshöldurum sem ég get notað þegar annað net klikkar.  Mikilvægt að vita a.m.k. eitt okkar getur alltaf komist á netið upp á pörun o.þ.h., auk þess sem það tryggir stöðugri fréttaflutning.

Búið er að finna verslun til að versla drykkjarföng og smálegt.  Hér brast á stormur og rigning í gær, minnti helst á íslenskt haustveður en það gekk þó fljótt yfir.  Hótelið er flugvallahótel en flugvöllurinn er hér rétt hjá og vélarnar fljúga hér rétt yfir hausinn okkar.  Stutt er á skákstað, tæplega 10 mínútna göngutúr.

Smá um Norðurlöndin.  Eftir breytingarnar á íslenska liðin er Norðurlöndunum raðað í eftirfarandi röð:

• 34. Svíþjóð (2555)
• 39. Danmörk (2527)
• 51. Ísland (2490)
• 52. Finnland (2487)
• 54. Noregur (2465)
• 74. Færeyjar (2365)

Í kvennaflokki er staðan sem hér segir:                                                                                       

• 40. Noregur (2164)
• 46. Svíþjóð (2126)
• 51. Danmörk (2099)
• 62. Íslands (1989)
• 77. Finnland (1899)

Nóg í bili.  Þakka allar góðu kveðjurnar!

Gunnar Björnsson

 

• Heimasíða mótsins
• Ólympíufréttir Skák.is
• Myndaalbúm frá 1. og 2. umferð
• Chess-Results (opinn flokkur)
• Chess-Results (kvennaflokkur)
• Beinar útsendingar (hefjast kl. 12)