Hjörvar með jafntefli í lokaumferðinni - hársbreidd frá stórmeistaratitli

Alþjóðlegi meistarinn, Hjörvar Steinn Grétarsson (2507), gerði jafntefli við þýska stórmeistarann og landsliðsmanninn Rainer Buhmann (2571) í 9. og síðustu umferð Czech Open sem fram fór í gær.  Hjörvar var hársbreidd frá sínum lokaáfanga að stórmeistaratitli en árangur hans samsvaraði 2598 skákstigum en til að ná áfanga þarf árangur upp á 2600 skákstig.  Hjörvar hækkar um 11 stig fyrir frammistöðu sína og fór upp fyrir Hannes Hlífar Stefánsson og Henrik Danielsen skv. stigalista íslenskra afreksmanna.  Er þar í fjórða sæti á eftir Jóhanni Hjartarsyni, Héðni Steingrímssyni og Helga Ólafssyni með 2517 skákstig.  

Hjörvar hlaut 6,5 vinning og endaði í 5.-19. sæti.  Sigurvegari mótsins var ísraelski stórmeistarinn Tamir Nabity (2582) en sá hlaut 7,5 vinning. 

Hannes Hlífar Stefánsson (2515) gerði jafntefli við hvít-rússneska stórmeistarann Sergey Kasparov (2493) í lokaumferðinni.  Hannes hlaut 6 vinning og endaði í 20.-37. sæti.  Árangur Hannesar samsvaraði 2516 skákstigum og stendur hann stigalega í stað eftir mótið.

Í b-flokki vann Smári Rafn Teitsson (2057) í lokaumferðinni en Sigurður Eiríksson (1959) tapaði.  Smári hlaut 6 vinninga en Sigurður hlaut 2,5 vinning.  Smári hækkar um 13 stig fyrir frammistöðu sína.

Í d-flokki vann Dawid Kolka (1532) en Felix Steinþórsson (1329) tapaði.   Báðir hækka þeir verulega á stigum.  Felix hækkar um 83 stig en Dawid um 49 stig.

Í e-flokki vann Róbert Leó Jónsson en Steinþór Baldursson tapaði.  Róbert Leó hlaut 4,5 vinning en Steinþór hlaut 3,5 vinning.   Frammistaða Róberts samsvaraði 1800 skákstigum en frammistaða Steinþórs samsvaraði 1657 skákstigum. 

Steinþór fær sérstakar þakkir fyrir að senda myndir reglulega frá skákstað.

259 skákmenn frá 30 löndum tefldu í a-flokki.  Þar af voru 48 stórmeistarar.  Hannes var nr. 28 í stigaröð keppenda en Hjörvar var nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results