Jónsmessumót Riddarans: Sigurður Herlufsen vann

Að venju var vel mætt í Vonarhöfn sl. miðvikudag þar sem "Riddarar reitaða borðsins" mætast til tafls vikulega allan ársins hring í von um vinning. Sumir telja sig líka eiga harms að hefna frá fyrri viðureignum við vopnabræður sína,  nú staðráðnir í því að berjast til síðasta blóðdropa en þó allt í góðu og með kristilegu hugarfari eins og sæmir húsakynnum Hafnarfjarðarkirkju.

Hvorki færri né fleiri en 23 skákmenn voru mættir til leiks þrátt fyrir sól og sumaryl, fegnir að komast í forsæluna til leika andstæðinga sína grátt, ungir í anda þrátt fyrir aldur og fyrri störf, í þessu vikulega "Unglingamóti öldunga", sem að þessu sinni var helgað Jónsmessunni. Í leikhléi var tekin hópmynd af keppendaskaranum úti í góða veðrinu "í víngarði drottins" fyrir sagnfræðinga framtíðarinnar.

Tekist var hart á eins og vænta mátti í móti þar sem allir geta unnið alla á góðum degi, enda varð raunin sú að allir urðu að lúta í gras fyrir einhverjum annað hvort með máti, gjörtapaða stöðu eða einfaldlega fallnir á tíma. 

Það kom þó engum á óvart að Sigurður A. Herlufsen, hinn margumtalaði,  var hlutskarpastur þegar upp var staðið eftir 11 umferðir með þó einungis aðeins 8.5 vinninga, sem dugðu að þessu sinni til "sigurðs".  SigHer hefur verið á sigurbraut undanfarið, unnið þar með  3 af síðustu sex mótum og alls 7 mót það sem af er ári.  Í öðru sæti varð Ingimar Halldórsson með 8 og jafnir í 3.-4. sæti Egill Þórðarson og  Dr. Ingimar Jónsson, 5.-6. "atvinnumennirnir" Páll G. Jónsson og Kristján Stefánsson, hrl., með 7.5 vinning og aðrir, margir harðskeyttir gamalreyndir kappar, með  ögn minna,  sem segir sína sögu um harða keppni, sbr. meðf. mótstöflu, sjá einnig: www.riddarinn.net

 

 

Myndaalbúm (ESE)