Evrópumót öldungasveita 2011

 

Það er áhugi fyrir því meðal eldri skákmanna að senda íslenskt lið á EM öldungasveita sem fram fer í Þessalóníku í Grikklandi í maí.   Skák.is hefur fengið póst frá Gunnari Finnlaugssyni, þar sem hann hvetur áhugasama að hafa samband við sig.   

 

Gunnar segir:

Til stendur að senda eina eða tvær sveitir á næsta Evrópumót öldunga. Hvert skáksamband má senda eins margar sveitir og vill. Sem dæmi má nefna að 78 sveitir tóku þátt í Dresden í febrúar í fyrra og var nærri helmingur þeirra frá Þýskalandi. Hver sveit er skipuð fimm mönnum, þar af einum varamanni.

Mótið mun að þessu sinn fara fram 3. til 11. maí næstkomandi í nágrenni Thessaloniki í Grikklandi.

Þeir skákmenn sem náð hafa 60 ára aldri 1. janúar 2011 hafa þátttökurétt. Fyrir skákkonur gildir 50 ár.

Á slóðinni http://gamesfestival.chessdom.com/european-senior-teams-championship-2011 má finna allar upplýsingar um mótið.

Þeir sem hafa áhuga á þátttöku eru beðnir að hafa samband sem fyrst við undirritaðan á [e-mail]. Tilkynna þarf þátttöku sveitarinnar/sveitanna um miðjan mars. Íslandsmeistarinn frá 1966 Gunnar Kristinn Gunnarsson hefur þegar tilkynnt þátttöku auk undirritaðs. Þátttakendur þurfa að reikna með að borga stóran hluta ferðakostnaðar úr eigin vasa. Skáksambandið og Skákdeild KR styrkti ferðina til Dresden.

Búast má við góðu veðri og skemmtilegri keppni!

Gunnar Finnlaugsson