Bolvíkingar tóku KR-inga í bakaríið

Í gærkvöldi öttu kappi í 8 liða úrslitum Hraðskákmóts taflfélaga skáksveitir  KR og Bolvíkinga.  KR-ingar buðu til tafls og upp á í kruðerí  í Galleríinu en Bolvíkingar þökkuðu fyrir sig með að taka þá í bakaríið og vinna þá létt með 49 vinningum gegn aðeins 23.

Sjö umferðir af 12 enduðu 4-2 fyrir víkingasveitina að vestan sem leik á alsoddi, en KR vann aðeins eina umferð, svo segja má að þetta hafi verið leikur kattarins að músinni. Engu að síður voru margar skákir tvísýnar og töpuðust naumlega á tíma, þar sem tímamörkin 5 mín. á skákina hentuðu gömlu mönnunum illa, sem vanir eru að tefla á 7 mín. en ekki svokallaðar kaffihúsaskákir, þessu þyrfti að breyta, svo gæði taflmennskunnar fái að njóta sín.  

Bestu skori náðu í liði KR:  

• Jón G. Friðjónsson með 7/12
• Jóhann Örn Sigurjónsson 6/12
• Gunnar Kr. Gunnarsson með 5/11

Bestir Bolvíkinga:

• Þröstur Þórhallsson 5/5
• Bragi Þorfinnsson 11/12
• Magnús Pálmi Örnólfsson 8/12
• Halldór Grétar Einarsson 7/12

Liðstjórar voru þeir Einar S. Einarsson, KR og Guðmundur Daðason BV

Úrslit 2. umferðar:

• Skákfélag Íslands - Taflfélag Reykjavíkur (TR, þriðjudaginn 31. ágúst)
• Taflfélag Garðabæjar - Skákdeild Hauka 24½-47½
• Taflfélagið Mátar - Taflfélagið Hellir 26½-45½
• Skákdeild KR -Taflfélag Bolungarvíkur 23-49

Dregið verður í þriðju umferð í kvöld.

 

Heimasíða Hellis