Norðurlandamótið: Jóhann og Guðmundur sýndu enga miskunn - mætast á morgun

Jóhann Hjartarson (2541) og Guðmundur Kjartansson (2464) sýndu andstæðingum sínum í dag litla miskunn og unnu sínar skákir - en tefldar voru tvær umferðir í dag. Þeir félagarnir eru efstir ásamt þremur öðrum með fullt hús vinninga.

Jóhann vann sænska FIDE-meistarann Theodor Kenneskog (2318) og Guðmundur lagði að velli heimamanninn Christopher Krantz (2200).

Ásamt þeim eru efstir stórmeistararnir Allan Stig Rasmussen (2540), hin danski, og Nils Grandelius (2655), hinn sænski, og svo hinn titillausi Svíi Stefan Schneider (2360).

Jóhann og Guðmundur mætast í fjórðu umferð sem fram fer á morgun og hefst kl. 13.

Áskell Örn Kárason (2271) fékk 1,5 vinninga í dag í flokki 50 ára og eldri og er efstur ásamt þremur öðrum.

Á morgun hefst taflmennska á Norðurlandamóti kvenna. þar er Lenka Ptácníková (2207) meðal keppenda.

G. Sverrir Þór skrifar pistil um gang mál á heimasíðu sænska skáksambandsins. 

• Heimasíða mótsins
• Úrslitaþjónusta
• Beinar útsendingar
• Beinar útsendingar (Chess24)

 

Sumarsyrpa Breiðabliks 2017 (fyrri) fer fram næstu helgi

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.

Mótið er ætlað börnum á grunnskólaaldri (fæddum 2001 og síðar) sem ekki hafa náð 1600 skákstigum. Mótið er reiknað til íslenskra og alþjóðlegra skákstiga.

Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Veitt verða verðlaun í tveimur flokkum. Fyrir 12-16 ára og svo fyrir 12 ára og yngri. 

Dagskrá:

• Föstudagurinn 30.júní : 1 umferð klukkan 17:30
• Laugardagurinn 1.júlí : 2 umferð klukkan 10:30
• Laugardagurinn 1.júlí : 3 umferð klukkan 14
• Sunnudagurinn 2.júlí: 4 umferð klukkan 10:30
• Sunnudagurinn 2.júlí: 5 umferð klukkan 13:30

Teflt er í Glersalnum í Stúkunni við Kópavogsvöll.

Seinni sumarsyrpan fer fram helgina eftir Verslunarmannahelgina (11.-13.ágúst).

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér.

Allir íslensku skákmennirnir með fullt hús

Það gekk vel hjá íslensku keppendum í annarri umferð Norðurlandamótsins í skák sem er rétt nýlokið.  Jóhann Hjartarson (2541) vann laglegan sigur á sænska FIDE-meistaranum Tom Rydström (2313) og Guðmundur Kjartansson (2464) lagði Danann Rasmus Thogersen (2222) örugglega að velli. Áskell Örn Kárason (2271) lét ekki sitt eftir liggja í flokki skákmanna 50 ára og eldri og vann Svíann Lennert B. Johannsson (1974). Þremenningarnir hafa hafa allir fullt hús.

Það er engin miskun á mótinu því tvær umferðir eru tefldar í dag. Seinni umferðin hefst kl. 15. Jóhann teflir við sænska FIDE-meistarann Theodor Kenneskog (2318), Guðmundur við heimamanninn Christopher Krantz (2200) og Áskell við Norðmanninn Kai Ortoft (1984).

 

• Heimasíða mótsins
• Úrslitaþjónusta
• Beinar útsendingar
• Beinar útsendingar (Chess24)

 

Norðurlandamót grunn- og barnaskólasveita haldið að Laugum í Sælingsdal í september

Norðurlandamót grunn- og barnaskólasveita fer fram að Laugum í Sælingsdal dagana 22.-24. september nk. 

Fulltrúar Íslands verða:

NM grunnskólasveita

• Hörðuvallaskóli (Kópavogi)
• Laugalækjarskóli (Reykjavík)

NM barnaskólasveita

• Álfhólsskóli (Kópavogi)
• Ölduselsskóli (Reykjavík)

Dagskrá mótanna er sem hér segir:

1. umferð, föstudaginn, 22. september, kl. 20
2. umferð, laugardaginn, 23. september, kl. 10
3. umferð, laguardaginn, 23. september, kl. 16
4. umferð, sunnudaginn, 24. september, kl. 10
5. umferð, sunnudaginn, 24. september, kl. 16

Þegar nær dregur verður sett upp sér heimasíða fyrir mótið.

 

Kínverjar og Rússar heimsmeistarar landsliða

Heimsmeistaramóti landsliða lauk í gær í Khanty-Mansiysk í Síberíu í Rússlandi. Mótið nú fékk afar litla athygli enda féll það í skuggann á Parísarmótinu. Kínverjar unnu sigur í opnum flokki eftir spennandi baráttu við Rússa sem urðu aðrir. Pólverjar urðu þriðju. 

Í kvennaflokki snerist dæmið við. Þar hrepptu Rússarnir gullið og Kínverjar silfrið. Georgíukonur urðu þriðju.

Nánar má lesa um mótið á Chessdom. 

 

• Heimasíða mótsins
• Beinar útsendingar (hefjast kl. 10)

Skákhátíð á Ströndum fer fram 7.-9. júlí

Skákhátíð í Árneshreppi verður haldin dagana 7. til 9. júlí þar sem áhugamönnum gefst kostur á að spreyta sig gegn sumum bestu skákmönnum Íslands. Meðal þeirra sem þegar eru skráð til leiks eru Guðmundur Kjartansson, nýbakaður Íslandsmeistari, stórmeistararnir Jóhann Hjartarson, Jón L. Árnason og Lenka Ptacnikova og landsliðskonan Guðlaug Unnur Þorsteinsdóttir. 

Hátíðin hefst með tvískákarmóti og brennu í Trékyllisvík föstudagskvöldið 7. júlí kl. 20. Í tvískák eru tveir saman í liði, og iðulega afar heitt í kolunum. 

Hápunktur hátíðarinnar verður laugardaginn 8. júlí í félagsheimilinu, minninningarmót Jóhönnu Kristjónsdóttur 2017. Jóhanna, sem lést 11. maí síðastliðinn, var meðal ötulustu liðsmanna Hróksins og hafði jafnframt sterk tengsl við Árneshrepp. Yfirskrift hátíðarinnar er sótt í kjörorð Jóhönnu: Til lífs og til gleði. 

Minningarmótið hefst klukkan 14 og verða tefldar 8 umferðir, með 10 mínútna umhugsunartíma. Verðlaun á mótinu eru í senn vegleg og óvenjuleg, m.a. listaverk sem Guðjón Kristinsson frá Dröngum og Valgeir Benediktsson í Árnesi vinna sérstaklega af þessu tilefni. Þá verða ýmsir munir úr fjarlægum löndum, vegleg gjafabréf og fleiri vinningar. 

Á laugardagskvöldið verður hátíðarkvöldverður í félagsheimilinu, þar sem ýmislegt verður til skemmtunar, og verðlaun á minningarmóti Jóhönnu afhent. 

Hátíðinni lýkur með hraðskákmóti í Kaffi Norðurfirði sunnudaginn 9. júlí kl. 12. Þar verða tefldar 5 mínútna skákir, 7 umferðir, og sigurvegarinn hlýtur nafnbótina Norðurfjarðarmeistarinn 2017. 

Hrókurinn hefur um árabil efnt til skákviðburða í Árneshreppi og þangað hafa flestir bestu skákmenn landsins og fjölmargir áhugamenn lagt leið sína á skákmót og hátíðir. 

Árneshreppur er afskekktasta og fámennasta sveitarfélag á Íslandi, en jafnframt eitt hið fegursta og stórbrotnasta. Það er Hróknum mikið gleðiefni að geta nú boðað til hátíðar undir kjörorðunum: Til lífs og til gleði. 

• Áhugasamir ættu að skrá sig sem fyrst hjá [e-mail] eða [e-mail]. 
• Mjög góð tjaldstæði eru í Trékyllisvík og Norðurfirði.  
• Gistirými er takmarkað en við reynum að hjálpast að við að koma öllum góðum gestum í hús!

Norðurlandamótið í skák: Góð byrjun Íslendinganna

Íslensku skákmennirnir byrjuðu mjög vel á Norðurlandamótinu í skák sem hófst í Växjö í Svíþjóð í dag. Allir unnu þeir sínar skákir. Guðmundur Kjartansson (2464) þurfti þó að hafa mjög mikið fyrir sínum sigri gegn hinum hálfíslenska Baldri Teódóri Petersson (2086) sem var afar nærri því að halda jafntefli. Íslandsmeistarinn þurfti 88 leiki til leggja Baldur að velli. Jóhann Hjartarson (2541) vann Svíann Josef Ask (2120). Áskell Örn (2271) sem teflir flokki 50+ lagði Ronny Kirpo að velli. 

Tvöfaldur dagur er á morgun. Fyrri umferðin hefst kl. 8 og sú síðari kl. 15. 

Í fyrri umferð dagsins teflir Jóhann við sænska FIDE-meistarann Tom Rydström (2313), Guðmundur við Danann Rasmus Thogersen (2222) og Áskell við Lennart B. Johansson (1974).

G. Sverrir Þór skrifaði pistil um umferð dagsins á heimasíðu sænska skáksambandsins. 

• Heimasíða mótsins
• Úrslitaþjónusta
• Beinar útsendingar

 

Heimsmeistarinn marði sigur í París - þurfti bráðabana til

Magnus Carlsen (2858) van sigur á París Grand Chess Tour mótinu sem lauk í gær í París. Hann þurfti mikið að hafa fyrir sigrinum enda gekk honum ekki vel í hraðskákinni. Þar hlaut hann aðeins 11 vinninga í 18 skákum og endaði í 4.-5. sæti. Maxime Vachier-Lagrave fór þar mestan og hlaut 13 vinninga. 

Með þessari frábæru frammistöðu sinni náði Frakkinn heimsmeistaranum að vinningum. þeir tefldu bráðabanaeinvígi og þar reyndist heimsmeistarinn vandanum vaxinn og hafði sigur. 

Annað mót sem sama fyrirkomulagi hefst í Leuven í Belgíu 28. júní nk. Meðal keppenda þar eru Carlsen, MVL, Wesley So, Baadur Jobava og Vladimir Kramnik. 

 

Ítarlega frásögn um gang gærdagsins má finna á Chess.com. 

Myndir: Maria Emelianova (af Chess.com). 

Heimasíða mótsins

Mjóddarmót Hugins fer fram á laugardaginn

Mjóddarmótið fer fram laugardaginn 1. júlí í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Subway í Mjódd en fyrir þá tefldi Dagur Ragnarsson.  Tefldar verða sjö umferðir með umhugsunartímanum 5 mínútur + 2 sekúndur á hvern leik.  Skráning fer fram í síma 866-0116 og hér á Skák.is (guli kassinn efst). Þátttaka er ókeypis!

Mjóddarmótið var fyrst haldið 1999 og hét þá Kosningamót Hellis og fór fram á kjördegi. Á fyrsta mótinu sigraði Hannes Hlífar Stefánsson sem tefldi fyrir Símvirkjann. Mótið fékk fljótlega nafnið Mjóddarmótið enda ekki hægt að halda kosningamót á hverju ári og ekki var mögulegt að halda mótið á kjördegi eftir að félagið flutti í núverandi húsnæði.

Verðlaun eru sem hér segir:

• 1. 20.000
• 2. 15.000
• 3. 10.000

Upplýsingar um þegar skráða keppendur má finna hér.

Heimsmeistarinn efstur fyrir lokaátökin í París

Heimsmeistarinn Magnus Carlsen (2851) er efstur fyrir lokaátökin í París sem fram fara í dag. Hikaru Nakamura (2792) var nú samt sá sem stóð sig best í gær en hann hlaut 7 vinninga í 9 skákum.  Carlsen hefur 20 stig en Nakamura hefur 19. Alexander Grischuk er þriðji með 17,5 vinninga.

Á ýmsu gekk í gær. Keppendurnir fóru og teflda við krakka í gær. Vakti þar athygli að hann einn þeirra vantaði, sjálfan heimsmeistarann. 

Sergey Karjakin tísti

It is quite unfair when all the players involved on event before the round for about 2 hours,and one player at the same time having a rest..

— Sergey Karjakin (@SergeyKaryakin) June 24, 2017

 

Í ljós kom að heimsmeistarinn hafði fengið frí en hann mun hafa kvartað yfir bakmeiðslum. Fjarvera hans sló ekki gegn meðal keppninautanna og lækaði Nakamura við færslu Karjakin.

Taflmennskan í dag er hafin og byrjaði Carlsen best allra.

Nánar má lesa um gang gærdagsins á Chess24. 

Myndir: Lennart Ootes (af Chess24). 

Heimasíða mótsins