Pattstaða hjá FIDE

Peter Doggers hjá Chess.com birti í dag ítarlega fréttaskýringu um ástandið hjá FIDE. Eins og fram kom í frétt í gær á Skák.is birtist yfirlýsing þess efnis að Kirsan Ilyumzhinov hafi sagt af sér sem forseti FIDE.

Síðar sama dag neitaði Ilyumzhinov því og sagðist enn vera forseti FIDE. Hann hafi aldrei skrifað undir að hann hafi hætt. Í morgun birtist svar á heimasíðu FIDE undirrituð Nigel Freeman einum æðsta manni FIDE:

 

Dear Kirsan,

During the Presidential Board Meeting in Athens, you several times threatened to resign at and at the end of the meeting, three times you repeated: "I resign" before leaving the room.

At the request of board members, an Extraordinary Presidential Board meeting has been called on 10th April to discuss this issue.

 

Ilyumzhinov svaraði í dag og neitar því að hann hafi sagt af sér. Svo virðist allt hafi farið upp í loft á fundi meðal æðstu manna FIDE í Aþenu í fyrradag og forsetinn (fyrrverandi?) lýst því yfir að hann væri tilbúinn að hætta en ekki virðist sameiginlegur skilningur á því að hann hafi viljað hætta þá og þegar.

Síðar í dag hélt svo Kirsan blaðamannafund í Moskvu ásamt Andrei Filatov, forseta rússneska skáksambandsins og eins varaforseta FIDE sem virðist hans einasti stuðningsmaður meðal æðstu manna FIDE. 

Þar neitaði Kirsan því sem fyrr að hafa sagt af sér og tekur sérstaklega fram að hann hafi ekki skrifað undir neitt þess efnis.

Ástandið innan FIDE verður að teljast vægast sagt sérstakt. Erfitt er að sjá að hægt sé að ýta Kirsan úr embætti án þess að hann samþykki það. Það að hann hafi sagt á fundi að hann segi af sér (þótt það sé þrisvar sinnum) dugar vart eitt og sér neiti hann að staðfesta það. 

Í lögum FIDE segir:

Any elected or appointed official in FIDE can be removed from his position for cause. Cause is defined as being contrary to the spirit and text of the statutes and regulations of their office. The action must have the agreement of the Ethics Committee and requires a two third vote of the Executive Board or a majority in the General Assembly. (...)

Ef Kirsan hefur betur í þessari skák og heldur áfram er erfitt að sjá að hvernig aðrir æðstu yfirmenn FIDE eiga að geta haldið áfram störfum við þær aðstæður.

Þessi fréttaskýring Skák.is er að mestu byggð á ítarlegri fréttaskýringu Peter Doggers á Chess.com.

Björgvin efstur á Öðlingamótinu

 

Þegar tvær umferðir lifa af Skákmóti öðlinga er Björgvin Víglundsson (2185) einn efstur með 4,5 vinning en hann sigraði Siguringa Sigurjónsson (2021) í fimmtu umferð sem fór fram síðastliðið miðvikudagskvöld. Óskar Long Einarsson (1671), Ingvar Þór Jóhannesson (2377) og Þorvarður Fannar Ólafsson (2188) koma næstir með 4 vinninga. Óskar sigraði Lenku Ptacnikovu (2210) nokkuð óvænt með svörtu mönnunum, Ingvar Þór lagði Gunnar Kr. Gunnarsson (2115) og Þorvarður hafði betur gegn Vigfúsi Vigfússyni (1966). Öðlingamótið í ár er einnig Íslandsmót skákmanna 50 ára og eldri og er fyrrnefndur Björgvin efstur í baráttu þeirra en næstur honum með 3,5 vinning er Þór Valtýsson (1962).

Sjötta og næstsíðasta umferð fer fram næstkomandi miðvikudagskvöld en athygli er vakin á því að lokaumferðin fer fram næstkomandi föstudagskvöld, 31. mars. Báðar umferðir hefjast venju samkvæmt kl. 1930. Í næstsíðustu umferð mætast m.a. Björgvin og Þorvarður, Óskar og Ingvar, sem og Gunnar og Siguringi. Þá verður athyglisverður bardagi á fjórða borði þar sem reynsluboltarnir, Ögmundur Kristinsson (2015) og Þór leiða saman hesta sína.

Áhorfendur velkomnir – alltaf heitt á könnuni!

• Heimasíða TR
• Chess-Results
• Skákirnar (pgn): 1 2 3 4 5

 

Áskorendaflokkur hefst á laugardaginn í Stúkunni

Áskorendaflokkur Íslandsmótsins í skák fer  1.-9. apríl nk. Teflt er í Breiðabliks-stúkunni í Kópavogi. Tefldar verða níu umferðir eftir svissneska kerfinu.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Hafnarfirði, 9.-20. maí nk.

Séu menn jafnir ræður stigaútreikningur.

Skráning

Þátttökugjöld eru 5.000 kr. Unglingar 15 ára og yngri (2000 og síðar) fá 50% afslátt. F3-félagar fá frítt í mótið.

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 15 mínútur eftir 40 leiki. 30 sekúnda viðbótartími eftir hvern leik.

Dagskrá: 

1. umferð, laugardagurinn, 1. apríl, kl. 13:00
2. umferð, sunnudagurinn, 2. apríl, kl. 13:00
3. umferð, mánudagurinn, 3. apríl, kl. 18:30
4. umferð, þriðjudagurinn, 4. apríl, kl. 18:30
5. umferð, miðvikudagurinn, 5. apríl, kl. 18:30
6. umferð, fimmtudagurinn, 6. apríl, kl. 18:30
7. umferð, föstudagurinn, 7. apríl, kl. 18:30
8. umferð, laugardagurinn, 8. apríl, kl. 13:00
9. umferð, sunnudagurinn, 9. apríl, kl. 13:00

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Þegar skráðir keppendur

 

Forseti FIDE hættur? Ekki vitað!

Það hefur gustað um forseta FIDE í gegnum tíðina. Kirsan Ilyumzhinov hefur verið forseti síðan 1995 eða í 22 ár og með eindæmum umdeildur fyrir margvíslegar sakir.

Í dag birtist eftirfarandi tilkynning á heimasíðu FIDE:

At the end of the Board meeting held in Athens, Greece on the 26th March 2017, Mr Kirsan Ilyumzhinov announced his resignation from the position of FIDE President. The Presidential Board has been formally advised of this announcement and an extraordinary board meeting has been called in April.

Svo mörg voru þau orð.

Þessi tilkynning kom eins og þruma og heiðskýru lofti. Síðan Bandaríkjamenn settu forseta FIDE á lista yfir óæskilega menn eins og þeir gerðu í desember 2015 hefur forsetinn verið í miklum vandræðum og ekki mátt t.d. ferðast til Bandaríkjanna. Síðan þá hefur hann verið aðeins forseti að nafninu til. Varaforsetinn, Georgios Makropoulos, hefur verið "acting president". Þetta var nauðsynleg ráðstöfun að hálfu FIDE því bankar höfðu lokað reikningum FIDE sem létu sér nægja að Kirsan dragi sig aðeins að hluta til í hlé.

Vegna refsiaðgerða Bandaríkjamanna gat Kirsan ekki verið viðstaddur heimsmeistaraeinvígið í New York í fyrra sem var einkar neyðarlegt fyrir hann og FIDE. Þeim sem voru á ársþingi FIDE í Bakú í fyrra urðu einnig varir við að bakland forsetans var að minnka og þolinmæði margra hans helstu bandamanna hans minnkandi. Þess fyrir utan hefur fjárhagsstaða FIDE versnað mjög síðustu ár.

Það að losa sig undir banninu var orðið mjög aðkallandi fyrir forsetann. Sögur segja að vonast hafi eftir betri tíð með nýjum forseta Bandaríkjanna. Ekki hefur það orðið raunin og staða forseta Bandaríkjaforseta mun þrengri til að sýna linkind gagnvart Rússum eftir nýjustu ásakanir á Trump og hans fólk vegna tengsla við Rússa. 

Það sem gerir málið með meinta afsögn forseta FIDE enn skrýtnari er að hann neitar henni! Eftir er honum haft á heimasíðu rússneska skáksambandsins.  

My resignation was never discussed officially during the FIDE Presidential Board. It all started when the US Government included me into the sanctions list”, - told Kirsan Ilyumzhinov. - “After that my ill-wishers began hoping to remove me from the position of the FIDE President. During the Presidential Board in Athens, such suggestion was emanated from the US Chess Federation. However, I want to stress that this topic has never been on the agenda – such talks only took place on the sidelines. Perhaps people who wanted to replace me mistook their wish for the reality. I continue to work in the ordinary course.

Rússarnir standa með sínum manni. Aðstoðarmaður Kirsans talar svo um "fake news". 

Hvað raunverulega gerðist á þessum fundi FIDE gær er ekki vitað. Hvort að maðurinn sagði af sér ekki virðist vera með öllu óljóst nema fyrir þá sem sátu fundinn. Og kannski ekki einu sinni fyrir þá! 

Það verður teljast afar óvenjulegt að samtök birti um það frétt að forseti þeirra sé hættur sem hann svo neitar. Það sem gerir þetta enn skrýtnara að þarna virðast menn sem hafa staðið saman í gegnum súrt og sætt berast á banaspjótum. 

Skák.is mun fylgjast með málinu. Ítarlegar fréttir um málið má finna á Chess.com, Chess24 og Chessbase. 

Páskaeggjamót Víkingaklúbbsins fer fram á miðvikudaginn

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 29. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og keppt verður í einum flokki, en aukaverðlaun verða fyrir besta árangur í hverjum aldursflokki.

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.  Skráning á mótið fer fram á ntefangið vikingaklubburinn(hjá)gmail.com og á Skák.is (guli kassinn efst).

Skráðir keppendur

Hraðkvöld Hugins í kvöld

Hraðkvöld Hugins í Mjóddinni verður mánudaginn 27. mars nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur á hvern leik eða 5 mínútur + 3 sekúndur á hvern leik eftir fjölda umferða. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Ingvar sigurvegari Skákþings Norðlendinga - Haraldur Norðlendingameistari

Skákþing Norðlendinga fór fram um helgina á Sauðárkróki og lauk fyrr í dag. FIDE-meistarinn Ingvar Þór Jóhannesson (2359) sigraði með yfirburðum á mótinu. Ingvar var taplaus á mótinu, leyfði aðeins tvö jafntefli en vann fimm skákir.  

Haraldur Haraldsson (1920) og Stefán Bergsson (1997) komu næstir með 5 vinninga. Haraldur varð skákmeistari Norðlendinga þar sem hann fékk flesta vinninga þeirra sem hafa lögheimili á Norðurlandi.

Lokastaðan á Chess-Results.

Í dag fór fram Hraðskákmót Norðlendinga. Róbert Lagerman og Jón Kristinn Þorgeirsson urðu eftir og jafnir. Jón Kristinn var Norðlendingameistari. Ingvar Þór Jóhannesson varð þriðji.

Ákaflega vel var staðið að mótinu að hálfu mótshaldara en þar fór fremstur í flokki Jón Arnljótsson. Teflt var í Kaffi Króki. Ingibjörg Edda Birgisdóttir var skákstjóri. 

Heimasíða Skákfélags Sauðárkróks.

Páskaeggjasyrpa TR og Nóa Síríus hefst í dag klukkan 14

Páskaeggjasyrpa Nóa Síríus og Taflfélags Reykjavíkur hefur slegið rækilega í gegn undanfarin ár og hefur mikill fjöldi barna tekið þátt í mótum syrpunnar. Páskaeggjasyrpan í ár hefst sunnudaginn 26.mars er fyrsta mótið verður haldið. Næsta mót verður haldið 2.apríl og hið þriðja í röðinni fer fram 9.apríl. Öll mótin eru á sunnudegi og hefjast klukkan 13. Mótin í ár verða reiknuð til alþjóðlegra hraðskákstiga. Mótið í dag hefst kl. 14!

Keppt verður í tveimur flokkum, 1-3.bekk (og yngri) og 4-10.bekk. Sjö umferðir verða tefldar í hverju móti með 5 mínútna umhugsunartíma á mann og bætast 3 sekúndur við tímann eftir hvern leik (5+3). Páskaegg verða í verðlaun á hverju móti sem og fyrir þrjú efstu sætin samanlagt í hvorum flokki mótanna þriggja. Einnig verða verðlaunapeningar veittir fyrir þrjú efstu sætin í hvorum flokki á hverju páskaeggjamóti.

Allir sem taka þátt í minnst tveimur af þremur mótum Páskaeggjasyrpunnar fá páskaegg í verðlaun fyrir þátttökuna og verða þau afhent í lok þriðja mótsins.

Taflfélag Reykjavíkur og Nói Síríus hlakka til að sjá ykkur á PÁSKAEGGJASYRPUNNI 2017!

 

Skráningarform

Skráðir keppendur

Skákþáttur Morgunblaðsins: Akureyringarnir á Íslandsmóti skákfélaga

Á Íslandsmóti skákfélaga sem lauk í Rimaskóla á dögunum sáust að venju stórskemmtileg tilþrif. Hvað varðar baráttuna um efsta sætið í 1. deild er sennilega hægt fallast á þá skýringu að keppnin, sem stendur ár eftir ár milli Hugins og Taflfélags Reykjavíkur, minni heilmikið á baráttu Celtic og Rangers í skoska boltanum. Þessi lið er skipuð titilhöfum á flestum borðum og styrkleikamunurinn sem kemur fram í miklum stigamun gerir það að verkum að barátta þeirra við önnur lið er oft skoðuð með tilliti til þess hversu marga vinninga þau missa í einstökum viðureignum. Vert er að taka fram að stig eru ekki látin ráða eins og t.d. í þýsku Bundesligunni, heldur samanlagður vinningafjöldi.

Akureyringar hafa oft í þessum viðureignum náð dýrmætum vinningum frá toppliðunum. Þeir hafa gert lítið af því að sækja skákmenn út fyrir landsteinana en byggja á reyndum skákmönnum í bland við yngri. Það er heilmikill félagslegur auður í þessu liði þeirra. Þegar keppnin hófst að nýju fimmtudagskvöldið 2. mars vann a-sveit TR Akureyringana 5:3 og við það að TR missti þrjá vinninga jukust sigurlíkur Hugins í keppninni. Þar vakti athygli glæsilegur sigur hins unga Jóns Kristins Þorgeirsson yfir einum af máttarstólpum TR-inga.

Jón Kristinn Þorgeirsson (SA) – Arnar Gunnarsson (TR)

Ítalskur leikur

1. e4 e5 2. Rf3 Rc6 3. Bc4 Bc5 4. c3 Rf6 5. d4 exd4 6. cxd4 Bb4 7. Bd2!?

Þetta afbrigði ítalska leiksins nýtur nokkurra vinsælda. Löng og þvinguð leið sem hefst með 7. Rc3 Rxe4 8. O-O Bxc3 9. d5 Bf6! gefur svarti betri möguleika.

7. ... Bxd2+ 8. Rbxd2 d5 9. exd5 Rxd5 10. Db3 Rce7 11. 0-0 0-0 12. Hfe1 Rb6!?

Svartur ætti að geyma riddarann á d5 og því er 12. .... c6 sennilega betri leikur.

13. Had1 Rf5 14. Db4 Dd6 15. Dc5! Ra4?

Arnari hefur sennilega sést yfir næsti leikur hvíts en hvíta staðan er ógnandi.

16. Bxf7+! Kh8 17. Dc2 b5 18. Re4 Df4 19. Bd5 Hb8 20. Reg5 g6 21. He5 Rg7 22. Dxc7 Rxb2 23. He8!

Glæsilega leikið. „Þungu fallstykkin“ í herbúðum hvíts eru öll í uppnámi. Samt er svartur varnarlaus.

23. ... Be6 24. Hxb8

og hvítur gafst upp.

Óvæntustu úrslit Íslandsmóts skákfélaga urðu þegar KR-ingar náðu jafntefli við a-sveit Hugins, 4:4. Ingvar Þ. Jóhannesson hafði unnið nálega allar skákir sínar fyrir Hugin en gætti ekki að sér í eftirfarandi viðureign:

Jón Bergþórsson (KR) – Ingvar Þ. Jóhannesson (Huginn)

Síðasti leikur Ingvars var 27. .... Be8-c6 og Jón greip tækifærið og tefldi sóknina af mikilli nákvæmni:

28. Rf6+! gxf6 29. gxf6! Kh8?

Eftir 29. ... Bxf3 30. Dg3+ Kf8 31. Dg7+ Ke8v 32. Dg8+ Kd7 33. Dxf7+ Kc6 34. Dxe6+ og Hxf3 er hvíta staðan betri en þetta var samt besti möguleiki svarts.

30. Bxc6 b5 31. Be4 Hd4 32. Bxh7! Bxe5 33. Dh4! Bxf6 34. Dxf6+ Kxh7 35. Dxf7+ Kh8 36. Df6+ Kh7 37. Hf3 Hd1+ 38. Kf2 Hd2+ 39. Ke1 Hxh2 40. Df7+ Kh8 41. Hg3!

– og svartur gafst upp.

Taflfélag Garðabæjar sigraði örugglega í 2. deild og endurkoman í 1. deild á næsta ári verður skemmtileg. Þá verður gaman að fylgjast með Hrókum alls fagnaðar, sem unnu 3. deildina og stefna hærra. Ýmis önnur lið hafa verið að endurskipuleggja sig, t.d. Taflfélag Vestmanneyja, sem leggur nú meiri áherslu á grasrótina en vann sæti í 3. deild á næsta keppnistímabili.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 18. mars 2017

Skákþættir Morgunblaðsins

Ingvar með vinningsforskot

Ingvar Þór Jóhannesson hefur náð vinningsforskoti á Skákþingi Norðlendinga eftir sigur á Erni Leó Jóhannssyni í 5 umferð sem hófst kl 11 í morgun og lauk um 3 leitið.  Í 2.-5. sæti með 3,5 vinninga eru Róbert Lagermann, Gauti Páll Jónsson, Haraldur Haraldsson og Tómas Veigar Sigurðsson, en Haraldur og Tómas eru efstir Norðlendinga. Aukaverðlaun verða veitt þeim efsta þeirra sem hafa minna en 1800 stig og er Karl Egill Steingrímsson efstur í þeim flokki.  Nánari útlistun á stöðu og úrslitum má finna hér. 

Næsta umferð hefst kl. 17 og þá tefla m.a. Haraldur og Ingvar, Róbert og Gauti Páll og Stefán Bergson og Tómas.

Heimasíða Skákfélags Sauðárkróks.