Björgvin Víglundsson sigurvegari Skákþings Garðabæjar

Skákþingi Garðabæjar 2017 lauk með sigri Björgvins Víglundssonar en 2 skákmenn endðu efstir og jafnir með 5 vinninga af 7 mögulegum. Björn Hólm Birkisson endaði í 2 sæti einnig með 5 vinninga og jafnir í 3-6. sæti urðu þeir Vignir Vatnar Stefánsson, Bárður Örn Birkisson, Gauti Páll Jónsson og Hilmir Freyr Heimisson. Vignir Vatnar var þar fremstur meðal jafninga og landaði 3 sætinu á stigum.

Skákmeistari Garðabæjar sem og skákmeistari Taflfélags Garðabæjar varð hins vegar Páll Andrason eftir harða keppni við þá Pál Sigurðsson, Dorin Tamasan og Jóhann H Ragnarsson.
Aukaverðlaun verða veitt fyrir þann skákmann sem varð efstur í hópi skákmanna frá 11 til 20 og þau hlýtur Páll Andrason.

Fyrir síðustu umferð voru 7 skákmenn efstir og jafnir með 4 vinninga og af þeim unnu aðeins Björgvin og Björn Hólm. Björgvin vann Patrick Karcher og stóð hann lengi betur utan smá afleiks, og Björn vann Pál nokkuð örugglega. Vignir stóð lengi vel betur gegn Hilmi en stóð síst betur þegar jafntefli var samið.

Bárður og Gauti gerðu jafntefli en Páll Andrason tryggði sér titilinn skákmeistari Garðabæjar með því að vinna Dorin Tamasan í skrautlegri skák þar sem Dorin var með hartnær unnið eftir byrjunina. Biskupar Páls urðu ráðandi eftir að í miðtaflið var komið.
Jóhann missti alla sénsa með því að tapa gegn Eiríki og aðrar skákir urðu eftir bókinni.

Verðlaunahafar í mótinu eru
Björgvin Víglundsson, Björn Hólm Birkisson, Vignir Vatnar Stefánsson, Bárður Örn Birkisson, Gauti Páll Jónsson, Hilmir Freyr Heimisson og Páll Andason.
Verðlaunaafhending verður meðfram hraðskákmóti Garðabæjar sem fram fer í kvöld í Golfskála GKG og byrjar hraðskákmótið kl. 20.

Lokastöðu og allar skákir mótsins má finna á http://chess-results.com/tnr307354.aspx

Hraðskákmót Garðabæjar fer fram í kvöld

Hraðskákmót Garðabæjar og verðlaunaafhending fyrir Skákþing Garðabæjar. 
Mánudaginn 27. nóvember kl. 20.00.

1. verðlaun 15 þús.

Verðlaunum er skipt eftir Hort Kerfi.

Aukaverðlaun
Efsti TG ingur 5000 (óskipt eftir stigum)

Besti árangur miðað við eigin stig ) 5000 kr.
(performance - eigin stig - stigalausir reiknast með 1500 stig)

Tímamörk 3 mínútur + 2 sek á leik.

Þátttökugjöld 2000 kr.
Frítt fyrir félagsmenn Taflfélags Garðabæjar og þátttakendur í Skákþingi Garðabæjar 2017.

Ef þátttaka utanfélagsmanna verður góð verður aðalverðlaunum fjölgað. (Yfir 20 manns greiða þátttökugjöld)

Mótsstaður
Golfskáli GKG. Golfklúbbur Kópavogs og Garðabæjar.

Smellið á hlekkinn til að sjá þá sem þegar eru skráðir.
https://docs.google.com/spreadsheets/d/18NBIUzMXqqFbPoW9q-17Agw5PrMGTxOKnmWmx3uJ41Q/edit?usp=sharing

Hraðkvöld hjá Hugin í kvöld

Hraðkvöld Hugins verður mánudaginn 27. nóvember nk.  og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni.

Hraðkvöldið verður reiknað til hraðskákstiga.   Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Guðmundur efstur Íslendinga í Rúnavík

Alþjóðlega mótinu í Rúnavík í Færeyjum lauk í dag. Guðmundur Kjartansson (2435) endaði efstur Íslendinga með 6 vinninga í 9 umferðum. Vignir Vatnar Stefánsson (2294) komst næstur okkar manna með 5½ og Einar Hjalti Jensson þriðji með 5 vinninga.

Lokastaða íslensku skákmannanna varð sem hér segir:

• 7.-10. Guðmundur Kjartansson 6 v.
• 11.-19. Vignir Vatnar Stefánsson 5½ v.
• 20.-25. Einar Hjalti Jensson 5 v.
• 26.-34. Jón Kristinn Þorgeirsson, Áskell Örn Kárason, Kristján Eðvarðsson, Gauti Páll Jónsson, Símon Þórhallsson 4½ v.
• 35.-44. Bragi Halldórsson 4 v.
• 45.-50. Sigurður Eiríksson 3½ v.

Símon hækkar um 26 stig fyrir frammistöða sína. Auk hans hækka Guðmundur (+12), Vignir Vatnar (+8) og Áskell Örn (+1) á stigum. Aðrir lækka.  Alls tóku 11 íslenskir þátt í mótinu sem var heimamönnum til mikils sóma.

• Heimasíða mótsins
• Chess-Results
• Beinar útsendingar

 

 

 

• Heimasíða mótsins
• Chess-Results
• Beinar útsendingar

Mamedyarov og Grischuk kræktu í sæti á áskorendamótinu

FIDE Grand Prix-mótinu í Mallorca lauk í gær. Armeninn Levon Aronian og Dmitry Jakovenko urðu efstir og jafnir með 5½ vinning í 9 skákum. Niðurstaða mótsins þýddi að Mamedyarov og Grischuk, sem ekki tóku þátt, fá þátttökurétt á áskorendamótinu í Berlín í mars nk.  Radjabov (2741) og Vachier-Lagrave höfðu báðir möguleika á að komast á áskorendamótinu en þurftu þá að vinna skákirnar í lokaumferðinni. Báðum mistókst og því var fagnað í Bakú og Moskvu.

Grand Prix-mótinu hafa ekki vakið mikla lukku. Mikið hefur verið um litlaus jafntefli og það segir margt að mótið vannst á að aðeins 2+ og að 10 keppendur af 18 gátu unnið mótið fyrir lokaumferðina. 

Keppendalistinn áskorendamótsins liggur því nú endanlega fyrir. Í því móti munu taka þátt: 

• Mamedyarov (Grand Prix)
• Grischuk (Grand Prix)
• Aronian (Heimsbikarmótið)
• Ding Liren (Heimsbikarmótið)
• Karjakin (síðasti áskorandi)
• Caruana (skákstig)
• Wesley So (skákstig)
• Kramnik (boðssæti)

Nánar má lesa um Grand Prix-mótið á Chess.com

Grindvíkingar halda styrktarmót

Frá Skáknefnd UMFG

Sunnudaginn 3.desember ætlar skáknefnd UMFG að taka þátt í söfnunarverkefni fyrir ungan dreng sem er einungis 9 ára gamall og á leið í mergskipti til Svíþjóðar. Þessi ungi maður heitir Guðmundur Atli Helgason og er búsettur í Reykjanesbæ og hefur verið að fást við bráðahvítblæði og farið í gegnum tvær lyfjameðferðir.

Allar íþróttadeildir á Suðurnesjum eru að taka þátt í þessari söfnun. Við ætlum að halda lítið mót sem Páll Sigurðsson mun stjórna. Þetta verður liðakeppni þar sem fjórir eru saman og verðlaunin eru ánægjan að styðja við þessa söfnun. Kostnaðurinn er engin á sveit og einungis frjáls framlög. Það eru fyrirtæki að styðja við þess fjáröflun og ég óska eftir því að skákmenn komi og verði með okkur til að tefla. Við munum byrja stundvíslega kl.13:00 og vera til 16:00.  Til þess að jafna alla keppni og skemmtun verða vanir skákmenn að gefa forgjöf gagnvart minni spámönnum og það verður kóngsbiskupinn sem fær ekki að vera með. Að sjálfsögðu verður kaffi og eitthvað með því á svona góðum degi. Keppnin verður haldin í Gjánni sem er salur í Íþróttahúsi Grindavíkur. Þeir sem vilja taka þátt og mæta með sveit hafið samband við Siguringa Sigurjónsson á Facebook. Nú þegar eru nokkrar sterkar sveitir skráðar og mikið pláss fyrir fleiri sveitir. 

Með skákkveðjunni okkar: 

Gens Una Sumus / Við erum ein fjölskylda

Siguringi Sigurjónsson.

Vignir vann stórmeistara og er efstur Íslendinga í Rúnavík

Í gær voru tefldar tvær umferðir á alþjóðlega skákmótinu í Rúnavík í Færeyjum. Vignir Vatnar Stefánsson (2294) átti frábæran gærdag og vann rússneska stórmeistarann Mikhail Ulubyin (2528). Fyrsti sigur Vignis, og ekki sá síðasti, gegn stórmeistara í kappskák. Rúnavíkur-mótið virðist henta Vigni afar vel. Á sama móti í fyrra fór hann í fyrsta skipti yfir 2400 skákstig. Í dag verður tefld níunda og síðasta umferð. Vignir er efstur Íslendinga með 5½ vinning.

Hvít-rússneski stórmeistarinn Nikita Maiorov (2521) er efstur með 7 vinninga. Guðmundur Kjartansson (2435) er næst efstur Íslendinga með 5 vinninga. Jón Kristinn Þorgeirsson (2319), Áskell Örn Kárason (2249), Kristján Eðvarðsson (2192), Gauti Páll Jónsson (2125) og Símon Þórhallsson (2059) koma næstir með 4½ vinning.

Lokaumferðin hefst kl. 14 í dag. 

 

 

 

• Heimasíða mótsins
• Chess-Results
• Beinar útsendingar

Hlemmur Square #3 fer fram í kvöld

Hlemmur Square mun í samstarfi við Vinaskákfélagið halda hraðskákmót á Hlemmur Square sunnudaginn, 26. nóvember, klukkan átta.

Þetta er þriðja skákmótið í seríu mánaðarlegra móta þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant. Á síðasta móti var hörku barátta, en Páll Andrason sigraði og fékk 7 vinninga af 8 mögulegum. 

Tefldar verða 8 umferðir með 4+2 mínútna umhugsunartíma. Skákstjóri og dómari er Hörður Jónasson frá Vinaskákfélaginu.

Þátttaka er ókeypis á mótið en Hlemmur Square gefur gjafabréf fyrir efstu þrjú sætin auk þess sem medalía verður veitt fyrir vinningshafann. 

1. verðlaun: Gjafabréf á Pylsa/Pulsa Restaurant / bar fyrir 7.000 kr. +medalía
2. verðlaun: Gjafabréf á Pylsa/Pulsa Restaurant / bar fyrir 5.000 kr.
3. verðlaun: Gjafabréf á Pylsa/Pulsa Restaurant / bar fyrir 3.000 kr. 

Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er!

Gert er ráð fyrir því að skákmótið taki innan við þrjár klukkustundir.

Hægt er að skrá sig í gegnum skak.is á gula kassann, en einnig á staðnum.

Skákþáttur Morgunblaðsins: Hannes Hlífar bestur Íslendinga á Norðurljósamóti

Hannes Hlífar Stefánsson stóð sig best íslensku skákmannanna á Norðurljósamótinu sem lauk í húsakynnum Taflfélags Reykjavíkur á miðvikudagskvöldið. Hannes sem hlaut 6 vinninga af níu mögulegum varð í 2.-4. sæti ásamt enska stórmeistaranum Simon Williams og indverska undrabarninu Nihal Sarin. Kínverjinn Yu Yinglun sigraði á mótinu, hlaut 6 ½ vinning. Hann var hætt kominn í síðustu skák sinni við Sarin en slapp með jafntefli eftir erfiða vörn. Sarin, sem er 13 ára gamall, gat með sigri náð öðrum áfanga sínum að stórmeistaratitli. Hann byrjaði rólega en sótti í sig veðrið eftir því sem á leið og vann t.d. góðan sigur yfir enska stórmeistaranum Mark Hebden í 8. umferð.

Hjörvar Steinn Grétarsson varð í 5.-7. sæti, hlaut 5 ½ vinning. Hann tapaði fremur slysalega í 1. umferð og tefldi kvefaður allt mótið þannig að frammistöðu hans má telja viðunandi.

Bandaríkjamðurinn ungi Nihil Kumar hætti keppni eftir tap í 5. umferð og slæmt gengi almennt. Þótti mörgum lítið leggjast fyrir kappann. Hann varð heimsmeistari unglinga í flokki 12 ára og yngri í fyrra.

Ýmsir íslenskir skákmenn náðu góðum stigahækkunum, enginn þó meira en Björn Hólm sem hækkaði um 50 elo-stig. Vignir Vatnar Stefánsson og Björn Þorfinnsson hækkuðu nokkuð á stigum og frammistaða Björns hefði getað orðið enn betri, en viðureignin við sigurvegara mótsins í 6. umferð setti strik í reikninginn en Björn endurtók bókstaflega fræga tapskák Mikhael Tal gegn Lev Polugajevskí frá sovéska meistaramótinu 1969!

Norðurljósamótið er nýtt verkefni hjá SÍ og heppnaðist vel. Tímasetningu þess og of há þátttökugjöld mætti þó endurskoða. 

Skák ársins var tefld í kínversku deildakeppninni

Liren Ding komst fyrstur kínverskra skákmanna í áskorendakeppnina sem fram fer í Berlín á næsta ári en þar tefla átta skákmenn um réttinn til að skora á heimsmeistarann Magnús Carlsen. Ding tapaði lokaeinvígi heimsbikarmótsins fyrir Levon Aronjan en 2. sætið gaf engu að síður þátttökurétt í áskorendakeppninni. Í upphafi þessa mánaðar tók Ding þátt í kínversku deildakeppninni sem er þó varla í frásögur færandi nema fyrir þá staðreynd að þar tefldi hann skák sem vakið hefur mikla athygli og má með sanni kalla skák ársins. Það koma fyrir margar fallegar myndir í þessari mögnuðu viðureign: 

Jinzhi Bai – Liren Ding

Nimzo-indversk vörn

1. d4 Rf6 2. c4 e6 3. Rc3 Bb4 4. Rf3 O-O 5. Bg5 c5 6. e3 cxd4 7. Dxd4 Rc6 8. Dd3 h6 9. Bh4 d5 10. Hd1 g5 11. Bg3 Re4 12. Rd2 Rc5 13. Dc2 d4 14. Rf3 e5 15. Rxe5 dxc3 16. Hxd8 cxb2+ 17. Ke2?!

Færa má fyrir því rök að þetta sé eini afleikur hvíts í skákinni. Best var 17. Hd2 og eftir 17. ... Hd8 18. Rf3 Bg4 19. Dxb2 er hvíta staðan ekki lakari.

17. ... Hxd8 18. Dxb2 Ra4! 19. Dc2 Rc3+ 20. Kf3 Hd4!!

Kynngimagnaður leikur, svartur hótar 21. ... g4+ og mátar.

 

 

 

 

 

 

 

21. h3 h5 22. Bh2 g4+ 23. Kg3 Hd2!

Aftur og nýbúinn, hvítur má ekki taka drottninguna, 24. Dxd2 Re4+ og vinnur.

24. Db3 Re4+ 25. Kh4 Be7+ 26. Kxh5 Kg7!

Rýmir h8-reitinn fyrir hrókinn á a8.

27. Bf4 Bf5 28. Bh6+ Kh7 29. Dxb7 Hxf2!

Hótar 30. ... Rg3 mát.

30. Bg5 Hh8 31. Rxf7 Bg6+ 32. Kxg4 Re5+!

 

Glæsilegur lokahnykkur. Framhaldið gæti orðið 33. Rxe5 Bf5+ 34. Kh5 Kg7+ og mátar.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 18. nóvember 2017

Skákþættir Morgunblaðsins

Óskar Víkingur unglingameistari Hugins

Óskar Víkingur Davíðsson sigraði á Unglingameistaramóti Hugins sem lauk í síðustu viku. Óskar Víkingur fékk 6 vinninga í sjö skákum. Fyrst komu fimm sigrar og svo jafntefli í tveimur síðustu umferðunum við Óttar Örn og Baltasar Mána. Óskar Víkingur tefldi af öryggi í mótinu og vann verðskuldaðan sigur og hefði ekki þurft á þessum tveimur jafnteflum að halda til að landa honum. Þetta er í þriðja sinn sem Óskar verður unglingameistari Hugins og hann getur enn bætt þremur í viðbót í safnið.

Eftir spennandi lokaumferð voru fimm jöfn með 5v en það voru Stefán Orri Davíðsson, Batel Goitom Haile, Benedikt Þórisson, Óttar Örn Bergmann Sigfússon og Baltasar Máni Wedholm Gunnarsson. Stefán Orri var hlutskarpastur á stigum og hlaut annað sætið. Það þurfti þrefaldan útreikning til að skilja milli Stefáns Orra og Batel sem hlaut þriðja sætið. Það blés ekki byrlega fyrir Stefáni Orra eftir slysalegt tap gegn Batel í annarri umferð þar sem hann manni yfir lét leppa hjá sér hrók í endatafli. Lokaumferðirnar tefldust Stefáni Orra í hag. Batel lenti í tveimur erfiðum viðureignum við þá bræður Bjart og Benedikt Þórissyni og hafði hún sigur gegn þeim yngri en tapaði fyrir þeim eldri. Benedikt stóð því vel fyrir lokaumferðina og gat tryggt sér annað sætið með því að vinna Stefán Orra í lokaumferðinni en það er erfitt að tefla tvær úrslitaskákir í röð og Stefán Orri vann viðureignina. Þar með var allt komið í eina kös á eftir Óskari í fyrsta sætinu.

Veitt voru sérstök verðlaun fyrir 12 ára og yngri þar sem undanskyldir voru þeir sem voru í þremur efstu sætum. Þar komu þeir þrír sem einnig voru með 5v. Benedikt var þeirra stighæstur með 29 stig, Óttar Örn var annar með 27 stig og Baltasar Máni þriðji með 26 stig. Óttar og Baltasar tefldu vel á mótinu og áttu góðan seinni hluta sem oft hefur gefist vel. Það vantar aðeins meiri nákvæmni hjá þeim og meiri byrjanakunnáttu til að stinga sér alveg á kaf í toppbaráttuna.

Þátttakendur á mótinu voru 22 sem telst bara nokkuð gott á þessu móti sem stendur yfir í tvo daga. Allir sem hófu mótið luku því sem hefur ekki gerst oft.

Frásögn þessi er lausleg endursögn á frétt sem birtist á skákhuganum rétt áður en síðan hrundi.

 Unglingameistaramót Hugins lokastaðan