Teflt á Flúðum á Skákdaginn

Skákdagurinn 2017 er tileinkaður Friðrik Ólafssyni, fyrsta stórmeistara Íslendinga og fv. forseta Alþjóða skáksambandsins. Friðrik, sem enn teflir á fullu var lengi meðal bestu skákmanna heims.

Flúðaskóli tók slaginn á skádeginum með þeim hætti að bjóða gestum og gangandi í viðureign í versluninni Samkaup Strax á Flúðum í morgunsárið. Voru það verðlaunahafar úr Halldórsmótinu sem haldið var þann 18. nóvember sl. sem sátu að tafli gegn viðskiptavinum búðarinnar. Mældist þetta vel fyrir og var krökkunum vel tekið. Mátti sjá góð tilþrif á báða bóga og aldrei að vita nema þetta verði endurtekið.

Við þökkum versluninni góðar mótttökur og viðskiptavinir fá einnig þakkir fyrir góðar viðtökur.

Þau Eyþór Orri Árnason, Axel Fannar Gústafsson, Una Bóel Jónsdóttir, Þorsteinn Ingi Styrmisson, Hjörtur Snær Halldórsson og Vignir Öxndal Ingibjörnsson voru fulltrúar skólans.

Árni Þór Hilmarsson, skákkennari Flúðaskóla.

Korpúlfar á Skákdeginum - afmælisbarnið og Stöð 2 mættu í heimsókn

Skákdagurinn var hátíðlega haldinn að Borgum í gær og afmælisbarn dagsins Friðrik Ólafsson, fyrsti og fremsti stórmeistari okkar, heiðursborgari Reykjavíkur og fyrrum forseti FIDE, kom í heimsókn og var efnt til afmælisteitis honum til heiðurs. Það fór vel á því enda flestir hinna öldnu skákmanna af sömu kynslóð og hann - flestir komnir vel til ára sinni þótt þess sjáist lítt merki. Það bar til tíðinda að sjónvarpið Stöð 2 gerði þessum viðburði skil og tók Friðrik tali í tilefni dagsins. Menn stunduðu sinn tafl- og blindingsleik af miklu kappi og freistuðu þess eftir bestu getu að tefla í anda meistarans með miðsjöfnum árangri þó. Svo fór að tveir íslenskir Larsenar urðu efstir sem nokkra eftirtekt vakti. Sæbjörn Larsen Guðfinnsson í fyrsta sæti með fullu húsi og Jóhann Larsen Knútsson hreppti annað sætið eftir tvísýna baráttu með 8 vinninga af 9 mögulegum, aðrir með minna. Einar Ess hafði gefið farandgrip til mótsins "FRIÐRIKSBIKARINN, endurnýttan bikar úr safni sínu sem vonandi stendur þó fyrir sínu, ásamt verðlaunapeningum með prófílmynd af meistaranum eftir konu hans. Hlynur S. Þórðarson, mágur Ingvars Ásmundssonar heitins, er forsvarmaður klúbbsins en verndari hans er Birna Róbertsdóttir, viðburðastjóri Borga, félags- og menningarmiðstöðvar Grafarvogs. Þau bæði eiga þakkir skyldar fyrir frumkvæði sitt og atbeina allan að þessum nýja skákklúbbi eldri borgara í Grafarvogi og nágrenni þ.e.höfuðborgarsvæðinu.

Frétt Stöðvar 2 má finna hér.

 

Gallerý Skák/ESE

Akureyringar héldu uppá Skákdaginn

Í gær, á skákdaginn 26. janúar, voru háð skólamót í fjórum grunnskólum á Akureyri. Mótshaldið var einkum kynnt í 3-6. bekk, en öllum þó heimil þátttaka. Öll fóru mótin vel fram og voru þátttakendur alls 81. Tefldar voru fimm umferðir. Við munum tíunda úrslitin síðar, en skólameistarar urðu þessir:

• Skákmeistari Brekkuskóla:  Gabríel Freyr Björnsson
• Skákmeistari Lundarskóla:  Ívar Þorleifur Barkarson
• Skákmeistari Naustaskóla:  Ingólfur Árni Benediktsson  
• Skákmeistari Síðuskóla:    Daði Örn Gunnarsson

Við óskum hinum nýbökuðu meisturum til hamingju með árangurinn og meistaratitlana. 

Í gærkvöldi var svo haldið opið mót í Skákheimilinu. Úrslit voru ekki kunn þegar blaðið fór í prentun, en það er til tíðinda að Alékínsvörn var beitt í fjölmörgum skákum kvöldsins. Sýnir það best gróskuna í skáklífinu hér norðan heiða. 

Nánar á vefsíðu SA

Nóa Síríus-mótið - Nærri hálf öld frá síðustu skák

Þriðja umferð Nóa-Síríus mótsins var tefld í Stúkunni á þriðjudagskvöld 24. janúar.

Í upphafi umferðar kvaddi Pálmi Ragnar Pétursson sér hljóðs fyrir hönd mótsstjórnar og bauð Friðrik Ólafsson sérstaklega velkominn til leiks. Pálmi sagði að Friðrik hefði verið með flensu í upphafi móts, en væri nú mættur og það væri fagnaðarefni. Það væri vissulega mikill heiður að því að hafa Friðrik meðal keppenda og til gamans mætti geta þess, fyrst teflt væri í þessu mannvirki, að þegar Friðrik var að gera garðinn frægan á 6. og 7. áratug síðustu aldar, þá gátu Íslendingar ekki státað af fótbolta- og handboltaliðum á heimsmælikvarða eins og nú væri. Friðrik greip þá inn í og sagði "að eftir 14-2 ósigurinn gegn Dönum, hefði verið sagt um Íslendinga að það sem þeir hefðu ekki í fótunum hefðu þeir í höfðinu!".

Í tíð Friðriks voru þeir fáir landar vorir sem kepptu meðal þeirra bestu og voru sameiningartákn Íslendinga. Friðrik Ólafsson var sannarlega slíkt tákn. Þegar Friðrik tefldi, fylgdist íslenska þjóðin með. Í tilefni þess að Friðrik verður 82 ára á skákdaginn, 26. janúar, bað Pálmi skákmenn að rísa úr sætum og klappa honum lof í lófa.

Að því búnu gaf Vigfús Vigfússon skákstjóri skákmönnum merki um að setja klukkurnar af stað. Friðrik settist til tafls á móti Jóni Hálfdánarsyni. Alveg eins og í gamla daga en þeir mættust síðast við taflborðið árið 1969. Hvað er hálf öld á milli vina.

Það fór vel á með þeim kempum eins og meðfylgjandi mynd sýnir og rétt eins og fyrir tæpum 50 árum, gerðu þeir félagar jafntefli.

Til gamans má benda á frábæran vef Skáksögufélagsins og vefsíðu til heiðurs Friðriki, fyrsta stórmeistara okkar Íslendinga. Á þessari síðu, má sjá umfjöllun um Skákþing Íslands 1969, þegar Friðrik og Jón mættust síðast: http://skaksogufelagid.is/1969-skakthing-islands/. Friðrik fór með sigur af hólmi á þessu móti með 9 vinninga í 11 skákum. Leyfði 4 jafntefli, þar af gegn Jóni Hálfdánarsyni. Áhugasamir geta rakið skákina sem er að finna neðarlega á síðunni. 

Af A-flokki.

Á efsta borði gerðu Dagur Ragnarsson og Guðmundur Kjartansson jafntefli eftir langa baráttuskák sem stóð fram á nótt. Skák Jóhanns Hjartarsonar og Andra Áss Grétarssonar var frestað. Björgvin Jónsson gerði jafntefli við Helga Áss Grétarsson í vel tefldri skák þar sem sá síðarnefndi var nær sigri.

Þröstur vann Sigurð Daða með svörtu í æsispennandi skák þar sem Sigurður Daði tefldi hvasst og fórnaði liði fyrir kóngssókn en Þröstur stóð af sér ágjöfina og landaði að lokum sigrinum. Björn Þorfinnsson sigraði Örn Leó nokkuð örugglega eftir að hafa unnið skiptamun snemma tafls.

Lenka Ptachnikova lá fyrir Magnúsi Erni Úlfarssyni og Mikael Jóhann Karlsson náði jafntefli gegn Fidemeistaranum og formanninum Þorsteini Þorsteinssyni eftir að sá síðarnefndi hafði verið með vinningsmöguleika. Þá gerðu TR-ingarnir Jón Viktor Gunnarsson og Benedikt Jónasson jafntefli í langri og flókinni skák þar sem Benedikt hafði að lokum hrók og tvö peð gegn hrók og riddara.

Nafnarnir og Vestfirðingarnir Guðmundur Halldórsson og Guðmundur Gíslason sigruðu báðir, Halldórsson lagði Ingvar Þór Jóhannesson nokkuð óvænt og Gíslason sigraði Baldur A. Kristinsson nokkuð örugglega. Þá gerði þriðji Vestfirðingurinn,

Halldór Grétar Einarsson, sér lítið fyrir og vann Kristján Eðvarðsson í vel útfærðri skák.

Björn Hólm Birkisson náði að hanga á jafntefli gegn Sigurbirni Björnssyni þar sem sigurlíkurnar voru greinilega hjá þeim síðarnefnda. 

Upplýsingar um önnur úrslit umferðarinnar má finna hér: http://chess-results.com/tnr257789.aspx?lan=1&art=2&rd=3&wi=821 

Staðan í A-flokki er þessi:

Efstir og jafnir með tvo og hálfan vinning að loknum þremur umferðum eru: Guðmundur Kjartansson (2468), Daði Ómarsson (2197), Björn Þorfinnsson (2404), Dagur Ragnarsson (2276), Þröstur Þórhallsson (2414), Magnús Örn Úlfarsson (2375).

Tvo vinninga hafa Helgi Áss Grétarsson (2448), Vignir Vatnar Stefánsson (2404), Benedikt Jónasson (2208), Björgvin Jónasson (2340), Guðmundur Halldórsson (2204), Halldór Grétar Einarsson (2242), Bárður Örn Birkisson (2175), Guðmundur Stefán Gíslason (2332).

Jóhann Hjartarson og Andri Áss eiga skák til góða en þeir eru báðir með einn og hálfan eftir tvær.

 

B-flokkur:

Í B-flokki vakti það mesta athygli, að hin unga og bráðefnilega skákkona Svava Þorsteinsdóttir, gerði jafntefli við stigahæsta mann flokksins, Jón Trausta Harðarson.

Þá náði Róbert Luu jafntefli við Agnar Tómas Möller. Á öðrum borðum var einnig hart barist og hafði Birkir Karl Sigurðsson betur gegn Stephan Briem og Hörður Anton Hauksson vann sigur á Hrund Hauksdóttur. Óskar Víkingur Davíðsson og Ólafur Evert Úlfsson gerðu jafntefli. 

Hvað önnur úrslit varðar, er vísað til meðfylgjandi krækju. 

Staðan í B-flokki:

Efstir og jafnir með fullt hús eftir þrjár umferðir eru Birkir Karl Sigurðsson og Hörður Aron Hauksson.

Á eftir þeim, með tvo vinninga, koma 14 skákmenn: Óskar Víkingur Davíðsson, Róbert Luu, Stephan Briem, Agnar Tómar Möller, Hrund Hauksdóttir, Stefán Orri Davíðsson, Svava Þorsteinsdóttir, Ólafur Evert Úlfsson, Benedikt Briem, Jón Eggert Hallsson, Gunnar Erik Guðmundsson, Jón Trausti Harðarson, Alexander Oliver Mai og Arnar Milutin Heiðarsson. 

Fjórða umferð verður tefld þriðjudaginn 31. janúar og eru allir velkomnir í Stúkuna við Kópavogsvöll.

Nánar á Skákhuganum.

Gleðilegan Skákdag!

Skákdagur Íslands er haldinn í sjötta sinn í dag, fimmtudaginn 26. janúar. Skákdagurinn er haldinn til heiðurs Friðrik Ólafssyni, fyrsta stórmeistara Íslendinga. Friðrik sem verður 82 ára í dag tekur virkan þátt í skáklífi landsins og teflir um þessar mundir á sterku Nóa Síríus skákmóti Hugins.

Fjölmargir skákviðburðir fara fram í dag og eru skákmenn og konur hvattir til að draga fram skáksettin.Teflt verður í  grunnskólum út um allt land enda skákkennsla innan skólanna enn að aukast. Bragi Þorfinnsson alþjóðlegur meistari teflir fjöltefli við nemendur Vatnsendaskóla í Kópavogi og skólamót verða haldin í fjórum skólum á Akureyri svo eitthvað sé nefnt. Þá munu kennarar Verzlunarskólans tefla sín á milli.

Skáklíf í skólum á suðurlandi er með miklum blóma og heimsækir Ingibjörg Edda Birgisdóttir Kerhólsskóla og skemmtilegir viðburðir fara fram í Grunnskólunum í Vestmannaeyjum og Hveragerði.

Heldri skákmenn þjóðarinnar hafa ávallt verið einkar duglegir að heiðra Friðrik og munu Korpúlfar í Grafarvogi tefla um nýjan Friðriksbikar. Friðrik er væntanlegur til Korpúlfanna en hann mun einnig kíkja í heimsókn á leikskólann Laufásborg. Laufásborg undir styrkri forystu Omars Salama hefur frá upphafi tekið þátt í Skákdeginum og heimsókn Friðriks því kærkomin fyrir hina ungu skákmeistara leikskólans.

Í tilefni af Skákdeginum standa Skáksambandið og GAMMA fyrir plakkatsdrefingu í alla skóla landsins til að kynna vefinn skakkennsla.is sem Friðrik vígði á dögunum.

Allar fréttir og myndir af skákviðburðum á Skákdaginn má senda á[e-mail]

Reykjavíkurmót grunnskólasveita

Reykjavíkurmót grunnskólasveita verður haldið í húsnæði Taflfélags Reykjavíkur að Faxafeni 12 mánudaginn 6.febrúar og hefst mótið kl.17. Þetta fjölmenna skákmót, sem er árviss viðburður í reykvískri skólaskák, er samvinnuverkefni Skóla- og frístundasviðs Reykjavíkurborgar og Taflfélags Reykjavíkur.

Tefldar verða sjö umferðir eftir svissnesku kerfi. Umhugsunartími er 8 mínútur fyrir hverja skák og bætast 2 sekúndur við umhugsunartímann eftir hvern leik (8+2). Þátttökurétt hafa allir nemendur í grunnskólum Reykjavíkur í 1.-10.bekk. Allar sveitirnar keppa í einum opnum flokki og verða veitt verðlaun fyrir þrjú efstu sætin auk þess sem þrjár efstu stúlknasveitirnar hljóta verðlaun. Hver sveit skal skipuð fjórum nemendum auk 0-4 varamanna. Áætlað er að mótinu ljúki um kl.20. Verðlaunaafhending fer fram strax að móti loknu.

Sigursveitin hlýtur nafnbótina Reykjavíkurmeistari grunnskólasveita 2017 og hlýtur farandbikar til vörslu í eitt ár. Núverandi Reykjavíkurmeistari er Laugalækjarskóli og Rimaskóli varð hlutskarpastur í stúlknaflokki.

Mikilvægt er að skólar sendi fylgdarmann með sínu liði, keppendum til halds og trausts, en ekki síður til að mótshaldið gangi hratt og örugglega fyrir sig. Æskilegt er að hver liðsstjóri stýri að hámarki tveimur sveitum.

Skráning í mótið fer fram í gegnum skráningarform á vef Taflfélags Reykjavíkur (einnig aðgengilegt á www.skak.is) og lýkur skráningu sunnudaginn 5.febrúar. Ekki verður hægt að skrá lið á mótsstað. Frekari upplýsingar um mótið má nálgast með því að senda fyrirspurn á netfangið [e-mail].

Æsir þjófstörtuðu Skákdeginum

Þeir voru brattir og börðu sér á brjóst gömlu brýnin sem mættu til tafls í Ásgarði í gær til að tefla í anda meistara Friðriks sér til gamans og yndisauka. Þór Valtýsson var vel að sigri sínum kominn þó sumir aðrir yrðu að láta sér lynda að vera teknir bæði á tíma og taugum í sömu skákinni. Á morgun fagna eldri skákmenn Skákdeginum og afmælisbarninu Friðrik að Borgum gegnt Spöng í boði Korpúlfa.

Aldrei að vita nema góðir gestir láti sjá sig. 

Korpúlfar - teflt um Friðriksbikarinn

Á morgun, fimmtudaginn 26. Janúar , verður SKÁKDAGURINN hátíðlega á vikulegu skákmóti Korpúlfa, skákklúbbs eldri borgara í Grafarvogi og nágrenni í félagsmiðstöðinni BORGUM gengt Spöng.

Þá verður í fyrsta sinn keppt um FRIRIKSBIKARINN nýjan farandgrip sem klúbbnum hefur áskotnast. Mótið verður tileinkað afmælisbarni dagsins, sjálfum meistaranum Friðrik Ólafssyni, sem væntanlegur er á svæðið til að fagna deginum.  Mótið hefst kl. 13.

Telfdar verða 9 umferðir með 10 minútna umhugsunartíma á skákina. Allir eldri skákmenn velkomnir og  eindregið hvattir til að mæta í tilefni dagsins.

Afmæliskaffi.

Spennandi umferð á N-S mótinu í kvöld!

Þriðja umferð hins fítonsterka Nóa-Siríus móts (Gestamóts Hugins og Skákdeildar Breiðabliks) hefst kl. 19.00 í kvöld. Lofa má miklum tilþrifum og jafnvel flugeldasýningum á sumum borðum.

Helst ber til tíðinda að tveir gamalreyndir en síferskir kappar, Jón Hálfdánarson og Friðrik Ólafsson, stórmeistari, takast á. Jón, sem þótti eitt allra efnilegasta ungstirnið hér á landi í kringum 1960, tekur nú þátt í kappskákmóti í fyrsta sinn eftir áratuga hlé. Friðrik var einmitt einn þeirra sem lauk lofsorði á þennan mikla efnispilt á sínum tíma og verður skemmtilegt að sjá hvaða byrjanabrellur þessir kappar draga fram úr pússi sínu.

Efstu keppendurnir tveir, fídemeistarinn snarpi Dagur Ragnarsson og alþjóðlegi meistarinn þrautreyndi Guðmundur Kjartansson, leiða saman hesta sína og verður þar tekist hart á. Af öðrum viðureignum má nefna að alþjóðlegi meistarinn Björgvin Jónsson stýrir hvítu mönnunum gegn Helga Á. Grétarssyni stórmeistara. Báðir eru þaullesnir í fræðunum og má því vænta mjög yfirvegaðrar taflmennsku með þungri undiröldu. Tveir öflugir sóknarskákmenn, fídemeistarinn Sigurður Daði Sigfússon og stórmeistarinn Þröstur Þórhallsson, skella saman skoltum. Telja verður þann sigurvænlegri sem fyrr kemst í kóngssókn.

Í B-flokki mætast efstu keppendurnir efnilegu, Stephan Briem og Birkir Karl Sigurðsson, annars vegar og Hrund Hauksdóttir og Hörður Anton Hauksson hins vegar, í spennandi viðureignum. Jafnframt er vert að vekja athygli á viðureign skákkonunnar ungu og efnilegu, Svövu Þorsteinsdóttur, við langstigahæsta keppanda B-riðils, Jón Trausta Harðarson.

Gestir eru velkomnir í Stúkuna á Kópavogsvelli. Sjá pörun á chess-results.com.

Riddarinn - Kappteflið um skákhörpuna

Fjögurra vikna GrandPrix mótaröð haldin í tengslum við skákdaginn tileinkuð meisturum skákborðsins og föllnum félögum hefst miðvikudaginn 25. Janúar, kl. 13  11. umf./10.mín. x4 mót. Þrjú bestu mót hvers keppanda telja til stiga og vinnings.  Þátttaka í einu móti aðeins telur ekki til stiga.