NM stúlkna hafið í Alta - fjórar íslenskar stúlkur taka þátt

Norðurlandamót stúlkna er rétt nýhafið í Alta í Noregi. Fjórar íslenskar stúlkur taka þátt. Nansý Davíðsdóttir og Svava Þorsteinsdóttir tefla í b-flokki (2000-02) og Freyja Birkisdóttir og Batel Goitom Haile tefla í c-flokki (2003). Fararstjóri og þjálfari er FM Björn Ívar Karlsson.

Keppendur tefla, og gista, á Hótel Thon Alta sem er í miðbæ Alta. Aðstæður á mótsstað eru til fyrirmyndar. Sýnt er beint frá tveimur skákum í hverjum flokki og bein sjónvarpsútsending verður frá mótinu á morgun, laugardag. Þar verða tveir alþjóðlegir meistarar með skýringar og viðtöl við keppendur.

Hluti skákanna er sýndur beint og er hægt að fylgjast með Nansý og Freyju beint úr fyrstu umferð.

• Heimasíða mótsins
• Beinar útsendingar á vef mótsins
• Beinar útsendingar á chessbomb.com

 

 

Aronian vann Carlsen - aftur!

Levon Aronian (2784) endurtók leikinn frá EM landsliða í nóvember sl. þegar hann lagði Magnus Carlsen (2851) í áttundu og næstsíðustu umferð Norway Chess í dag. Li Chao (2755) vann Eljanov (2765) og Kramnik lagði Harikrishna (2763) að velli en öðrum skákum lauk með jafntelfi.

Aronian og Carlsen eru efstir með 5 vinninga en lokaumferðin verður tefld á morgun. Kramnik, MVL (2788) og Topalov (2754) eru í 3.-5. sæti með 4,5 vinninga.  

Í lokaumferðinn mætast meðal annarsCarlsen-Eljanov, Harikrishna-Aronian og fjandvinirnir Topalov-Kramnik.

Umferðin hefst kl. 14. 

• Heimasíða mótsins
• Beinar útsendingar

 

Óstöðvandi Páll

Æsir tefldu í Stangarhyl síðasta þriðjudag eins og þeir gera alla þriðjudaga níu mánuði ársins. Einn úr elsta hópnum Páll G Jónsson var nánast óstöðvandi þennan dag, hann mátaði alla sína andstæðinga nema einn, það var Kristján Stefánsson formaður skákdeildar KR sem náði að vinna hann í sjöttu umferð.

Páll sem verður 83 ára í maí sýndi það og sannaði að aldurinn skiftir ekki máli , það er keppnisskapið sem gildir. Páll fékk 9 v af 10 mögulegum. Sæbjörn G Larsen varð annar með 7 ½ v. Guðfinnur R Kjartansson þriðji með 7 vinninga.

Þannig að þetta voru afgerandi yfirburðir hjá Páli. 

Sjá nánar í meðf töflu.

Kasparov teflir á hraðskákmóti ásamt Caruana, Nakamura og Wesley So - hefst kl. 17:50

Í fyrsta sinn síðan Garry Kasparov hætti atvinnumennsku í skák etur hann kappi við allra bestu skákmenn heims. Heimsmeistarinn fyrrverandi tekur þátt í hraðskákmóti ásamt þeim sem urðu í þremur efstu sætunum á Meistaramóti Bandaríkjanna sem lauk í fyrradag í St. Louis.

Andstæðingar hans verða Fabiano Caruana (2795), Hikaru Nakamura (2787) og Wesley So (2773). Allir eru þeir á topp 10 á heimslistanum.  

Tefld verður sexföld umferð á mótinu. Hver keppandi teflir því 18 skákir. Fyrstu þrjár umferðirnar verða tefldar á morgun og síðari þrjár á föstudaginn.

Tímamörk verða 5 mínútur á skákina auk þess sem keppendur fá 3 sekúndur á hvern leik áður en klukkan byrjar að ganga á þá. Tímamörk oft kennd við Bronstein . 

Það verður fróðlegt að sjá heimsmeistarann fyrrverandi etja kappi við kappanna þrjá. Hann fór létt með Nigel Short 8½-1½ í hrað- og atskákeinvígi þeirra á milli í fyrra. Líklegt er að fyrirstaðan nú verður meiri.

Taflmennskan hefst kl. 17:50 báða dagana. Ýmsar leiðir verða til að fylgjast með mótinu og má þar nefna heimasíðu bandaríska meistaramótsins og á Chess24.

Mai-bræðurnir meistarar

Skólaskákmót Reykjavíkur fór fram mánudaginn 25. apríl. Vel var mætt í yngri flokki og flestir sterkustu skákkrakkar Reykjavíkur með. Sigurvegari varð Alexander Oliver Mai Laugalækjarskóla. Mischa Kravchuk Ölduselsskóla varð annar og tryggði sér þar með sæti á landsmóti rétt eins og Alexander. Í þriðja sæti varð Óskar Víkingur Davíðsson Ölduselsskóla.

Í eldri flokki mættu aðeins fimm keppendur. Sigurvegari varð Aron Þór Mai sem tryggði sér þannig sæti á landsmótinu. Rétt er að nefna góðan árangur Svövu Þorsteinsdóttur sem vann tvo mun stigahærri keppendur; sjálfan sigurvegarann og skólafélaga hans Daníel Erni Njarðarson. Aðrir keppendur voru Bjarki frá Árbæjarskóla og Heimir Páll frá Hólabrekkuskóla.

hhttp://chess-results.com/tnr219051.aspx?lan=1

 

 

EM landsliða og GAMMA Reykjavíkurskákmótið í öðru og þriðja sæti yfir bestu mót ársins 2015

 

Niðurstöður kosninga samtaka atvinnuskákmanna (ACP) um bestu skákmót ársins 2015 liggja fyrir. Tvö íslensk skákmót voru tilnefnd og urðu þau bæði í topp þremur í sínum flokki.

Opinberir viðburðir (official events)

Heimsbikarmótið í Bakú vann öruggan sigur. EM landsliða varð í öðru sæti!

Opin skákmót (open events)

Gíbraltar- og Katarmótin urðu jöfn í efsta sæti. GAMMA Reykjavíkurskákmótið varð í þriðja sæti. Þess má geta að fjármagn hinna tveggja mótanna er margfalt á við Reykjavíkurskákmótið.

GAMMA Reykjavíkurskákmótið var jafnframt valinn fimmti besti skákviðburður heims! Það voru aðeins Heimsbikarmótið í Bakú, Gíbraltar- og Katarmótin sem og Heimsmeistaramótið í at- og hraðskák í Berlín sem fengu þar fleiri atkvæði meðal atvinnumanna í skák.

Þetta verður að teljast mikil viðurkenning fyrir íslenska skákhreyfingu sem er greinilega á heimsmælikvarða þegar kemur að skipulagningu skákviðburða.

Nánar á heimasíðu ACP.

Carlsen vann Kramnik og hefur vinningsforskot á Norway Chess

Magnus Carlsen (2851) er í miklu stuði á Norway Chess sem nú er í gangi í Stafangri. Í gær vann hann sannfærandi sigur á Vladimir Kramnik (2801) næststigahæsta skákmanni heims. Aronian (2784) vann Eljanov (2765) en öðrum skákum lauk með jafntefli.

Carlsen er efstur með 5 vinninga. MVL (2788), Aronian (2784), Topalov (2754) og Harikrishna (2763) eru í 2.-5. sæti með 4 vinninga. 

Í áttundu og næstsíðustu umferð sem fram fer í dag teflir heimsmeistarinn við Aronian. Önnur afar athyglisverð viðureign er skák MVL og Topalov.

Umferðin hefst kl. 14. 

• Heimasíða mótsins
• Beinar útsendingar

 

Norðurlandamótið í skák verður haldið í Finnlandi 22.-30. október

Norðurlandamótið í skák verður haldið í Sastamala í Finnlandi dagana 22.-30. október nk. Teflt verður í fjórum flokkum

1) Sjálfu meistaramótinu - 12 manna lokaður flokkur - þar sem hvert skáksamband á tvo keppendur. Ætlast er til að þeir hafi a.m.k. 2350 skákstig. 

 

2) Norðurlandamóti kvenna

 

3) NM öldunga (+50) - fæddir 1966 eða fyrr

 

4) NM öldunga (+65) - fæddir 1951 eða fyrr.

 

Ítarlegar upplýsingar um mótin fylgja með í PDF-viðhengi. 

 

Skrár tengdar þessari bloggfærslu:

• Norðurlandamótið í skák 2016

Kasparov teflir á hraðskákmóti með Caruana, Nakamura og So

Í fyrsta sinn síðan Garry Kasparov hætti atvinnumennsku í skák etur hann kappi við allra bestu skákmenn heims. Heimsmeistarinn fyrrverandi tekur þátt í hraðskákmóti ásamt þeim sem urðu í þremur efstu sætunum á Meistaramóti Bandaríkjanna sem lauk í fyrradag í St. Louis.

Andstæðingar hans verða Fabiano Caruana (2795), Hikaru Nakamura (2787) og Wesley So (2773). Allir eru þeir á topp 10 á heimslistanum.  

Tefld verður sexföld umferð á mótinu. Hver keppandi teflir því 18 skákir. Fyrstu þrjár umferðirnar verða tefldar á morgun og síðari þrjár á föstudaginn.

Tímamörk verða 5 mínútur á skákina auk þess sem keppendur fá 3 sekúndur á hvern leik áður en klukkan byrjar að ganga á þá. Tímamörk oft kennd við Bronstein . 

Það verður fróðlegt að sjá heimsmeistarann fyrrverandi etja kappi við kappanna þrjá. Hann fór létt með Nigel Short 8½-1½ í hrað- og atskákeinvígi þeirra á milli í fyrra. Líklegt er að fyrirstaðan nú verður meiri.

Taflmennskan hefst kl. 17:50 báða dagana. Ýmsar leiðir verða til að fylgjast með mótinu og má þar nefna heimasíðu bandaríska meistaramótsins.

Góð frammistaða Jóns Þórs á HM áhugamanna

Jón Þór Lemery (1575) tók þátt á heimsmeistaramóti áhugamanna með 1700 skákstig og minna sem fram fór í Halkidiki í Grikklandi dagana 19.-27. apríl. Jón stóð sig vel og endaði í 5.-9. sæti með 6 vinninga í 9 skákum. Fyrirfram var honum raðað í þrettánda sæti á skákstigum.

Frammistaða Jóns samsvaraði 1606 skákstigum og hækkaði hann um 28 skákstig fyrir hana.

• Heimasíða mótsins
• Chess-Results