Íslandsmót skákmanna í golfi

Íslandsmót skákmanna í golfi 2015 verður haldið á Leirdalsvelli hjá GKG laugardaginn 8.ágúst nk.

Keppt verður í tvíkeppni þar sem árangur í golfi og skák er lagður saman.

Að þessu sinni teflum við á undan. Kl 10:00 byrjar 9 umferða hraðskákmót með tímamörkunum 4min + 2sek.

Við fáum rástíma á milli kl 13 og 14.

Skákdeild Breiðabliks sér um framkvæmd Íslandsmóts skákmanna í golfi.

Skráning er á https://docs.google.com/forms/d/13xSiNcQ7_siuY1eEuZ-HvitqRFe4lKRXVKHZHjflwCw/viewform 

Skráðir: https://docs.google.com/spreadsheets/d/1HLSblckSAkrmRVeMqsWjptgzblImBhld6-kne8x-LXc/edit - gid=1985622446 

Núverandi Íslandsmeistari er Helgi Ólafsson.

Íslands- og heimsmetið er 2391 stig og er í eigu Helga.

Upplýsingar um mótið í fyrra er hægt að nálgast á: http://chess.is/golf/chessgolf2014.htm. 

Keppt er í eftirfarandi flokkum:

Golf og skák, án forgjafar.

Sá sem nær bestum árangri í golfi og skák hlýtur nafnbótina Íslandsmeistari skákmanna í golfi 2015. Notuð er sérstök tafla sem umbreytir höggafjölda á Leirdalsvelli í skákstyrkleika (rating-performance). Skákstyrkleiki (rating-performance) í hraðskákmótinu er mældur og meðaltals árangur gildir.

Golf og skák, með forgjöf.

Árangur í golfinu er mældur í punktum á vanalegan hátt. Skákstyrkleiki umfram getur (rating-performance mínus eigin skákstig) er mældur í hraðskákmótinu. Að tefla á eigin getu, gefur mönnum 32 punkta. Hver 25 stig umfram getu gefur einn punkt. Sá sem nær flestum punktum að meðaltali hlýtur nafnbótina Punktameistari skákmanna í golfi 2015.

Dagskráin

09:00 : Mæting í Stúkunni við Kópavogsvöll .

09:30 - 12:00: 9 umferða hraðskákmót

12:00 - 13:00: Matur í golfskála GKG og/eða golfæfingar, mæting tímanlega á teig.

13:00 - 13:50: Rástímar á Leirdalsvelli

17:30 - 18:20: Golfleik líkur

18:30 - 18:45: Verðlaunaafhending

Þeir sem komast áfram í niðurskurðinum í Bylgjan Open halda áfram að spila golf á sunnudeginum.

Mótsgjaldið

Allir borga 5900kr mótsgjald í Bylgjan Open í golfskálanum.

Svo er það 2000kr sem fer í verðlaunapottinn og greiðist inn á 0345-26-1182 kt:0403665989 eða ahendist í byrjun móts.

Verðlaun

verðlaun í hvorum flokki og unglingaflokki: 25% af verðlaunapottinum
Ef keppandi vinnur til verðlauna án forgjafar þá fær hann ekki verðlaun í forgjafarflokknum!

Fæst pútt á hringnum (miðað er við pútt slegin inni á flötinni. Ekki þeir sem hljóta önnur verðlaun!) :12,5% af verðlaunapottinum

Mesta bæting (fyrir þá sem eru nú þegar með skráðan árangur. Ekki þeir sem hljóta önnur verðlaun!) :12,5% af verðlaunapottinum 

Aðalverðlaunin eru samt heiðurinn af árangrinum og skemmtilegur dagur á einum glæsilegasta golfvelli landsins í góðum félagsskap !

Ýmsar upplýsingar

Þátttökurétt eiga allir skákmenn sem spila golf og hafa íslensk skákstig eða eru í íslensku taflfélagi.

Bylgjan Open, upplýsingar á golf.is: http://www.golf.is/pages/motaskra/upplysingarummot/?idegaweb_event_classname=4110bc28-8ff7-4d67-8a03-6ea1ba209958&tournament_id=20778

Skákmótið

9 umferðir eftir svissneska kerfinu. Tímamörk 4 mínútur og svo 2 sek viðbótartími fyrir hvern leik.

24 þjóðir skráðar til leiks á EM landsliða

Skráningum á EM landsliða sem fram fer 12.-22. nóvember fjölgar jafnt og þétt. Nú eru 24 þjóðir skráðar til leiks í opnum flokki og litlu færri í kvennaflokki. Gera má ráð fyrir að þátttkan nú verði nálægt því sem hún var í Varsjá fyrir tveimur árum síðan en þá tefldu 38 lið í opnum flokki og 28 lið í kvennaflokki. 

Lista yfir skráðar þjóðir má finna á heimasíðu mótsins. Það er þegar staðfest að meðal teflenda á mótinu eru auk heimsmeistarans Magnusar Carlsen þeir Levon Aronian, Anish Giri, Mickey Adams, Baadur Jobava. 

Rússar og Úkraníumenn hafa ekki enn skráð til leiks en munu án efa gera það á næstu dögum eða vikum. Heimilidir ritstjóra herma að Vladimir Kramnik muni fara fyrir liði Rússa en heimsmeistarinn fyrrverandi hefur aldrei teflt hérlendis. 

 

 

 

Héðinn endaði í 10.-15. sæti í New York

Stórmeistarinn Héðinn Steingrímsson (2562) tók þátt í alþjóðlegu móti í New York (8th New York International) dagana 15.-19. júlí sl. Héðinn hlaut 5½ vinning í 9 skákum og endaði í 10.-15. sæti af 70 keppendum. Gata Kamsky (2572) sigraði á mótinu. Átta stórmeistarar tóku þátt. 

Takmarkaðar upplýsingar er að finna á heimasíðu mótsins og virðast t.a.m. skákir mótsins vera óaðgengilegar.

Heimasíða mótsins

 

Nilli Grand skákmeistari Svíþjóðar

Nils Grandelius (2623) varð skákmeistari Svíþjóðar en mótinu lauk í gær í Sunne í Svíþjóð. Grandelius og Emanuel Berg (2553) komu jafnir í mark með 6½ vinning í 9 umferðum eftir að Berg vann þá í innbyrðisskák í lokaumferðinni. Tefldu þeir til úrslita með styttri umhugsunartíma og þar hafði Grandelius betur 1½-½.

Mótið var vel skipað en 9 af 10 keppendum efsta flokksins hampa stórmeistaratitli.

Röð efstu manna:

1. Nils Grandelius (2623) 6½ v.
2. Emanuel Berg (2553) 6½ v.
3. Erik Blomqvist (2487) 5½ v.
4. Axel Smith (2449) 4½ v.
5. Jonny Hector (2485) 4½ v.
6. Pia Cramling (2512) 4½ v.

Íslendingurinn og alþjóðlegi skákdómarinn, G. Sverrir Þór, sem búsettur er í Svíþjóð var annar aðaldómara mótsins.

Heimasíða mótsins

 

 

 

Frábær frammistaða Páls í Skotlandi - endaði með jafntefli við stórmeistara

Páll Agnar Þórarinsson (2208) stóð sig frábærlega á opna skoska meistaramótinu sem lauk í Edinborg í gær. Í níundu og síðustu umferð slapp hollenski stórmeistarinn Erik Van den Doel (2564) naumlega með jafntefli gegn Páli.

Páll hlaut 7 vinninga og varð í 2.-5. sæti. Frammistaða hans samsvaraði 2394 skákstigum og hækkar hann um 41 skákstig fyrir hana!

Árangurinn er sérstaklega athyglisverður fyrir þá sök að Páll, sem er búsettur á Bretlandseyjum, hefur ekki mikið teflt síðustu misseri. 

Heimasíða mótsins

Guðmundur endaði með sigri í Sankti Pétursborg

Alþjóðlegi meistarinn Guðmundur Kjartansson (2452) vann rússneska alþjóðlega meistarann Maksim Chigaev (2527) í níundu og síðustu umferð Academia-mótsins í Santi Pétursborg. Guðmundur hlaut 4 vinninga og endaði í 7.-8. sæti.

• Heimasíða mótsins
• Chess-Results

Páll Agnar efstur ásamt tveimur stórmeisturum fyrir lokaumferðina

Páll Agnar Þórarinsson heldur áfram að standa sig frábærlega á opna skoska meistaramótinu sem nú er í gangi í Edinborg. Í áttundu og næstsíðustu umferð sem fram fór í gær vann bandaríska FIDE-meistarann Gabriel Petesch (2242).

Í dag kl. 11 teflir hann við hollenska stórmeistarann Erik Van den Doel (2564) sem er efstur með 6,5 vinning ásamt Páli og Oleg Korneev (2567).

Hægt er að fylgjast með skákinni á Chessbomb.

Heimasíða mótsins

Skákþáttur Morgunblaðsins: Næsti heimsmeistari gæti komið frá Kína

Hannes Hlífar Stefánsson er stigahæstur íslenskra skákmanna samkvæmt júlí-lista FIDE með 2.593 elo-stig. Það skipar honum í 193. sæti á heimslistanum. Í 2. sæti er Héðinn Steingrímsson með 2.562 elo og í 3. sæti Hjörvar Steinn Grétarsson með 2.559 elo. Stigalistinn er nú birtur mánaðarlega og er það mikil breyting frá því sem áður var þegar hann var birtur á sex mánaða fresti og enn lengra er síðan listinn var gefinn út einu sinni á ári. Elsti stórmeistari heims, Júrí Averbakh, rifjaði það upp í ævisögu sinni að á fyrsta stigalista FIDE sem birtur var árið 1971 hafi einungis verið 500 skákmenn; 40 árum síðar voru yfir 130.000 skákmenn á FIDE-listanum og þeim fjölgar stöðugt.

Magnús Carlsen er sem fyrr langhæstur þrátt fyrir afhroðið á Norska skákmótinu á dögunum og er með 2.853 elo stig. Þrír aðrir skákmenn eru yfir 2.800 elo stigum, Wisvanathan Anand og Venselin Topalov eru í 2.-3. sæti með 2.816 elo og í 4. sæti kemur Hikaru Nakamura með 2.814.

Íslendingum er raðað í 32 styrkleikasæti af 175 aðildarþjóðum FIDE en þar er tekið meðaltal 10 sterkustu skákmanna hverrar þjóðar. Rússar eru enn fremstir og Kínverjar koma í humátt á eftir. Af íslenskum skákmönnum er lítill vafi á því að Hjörvar Steinn Grétarsson er okkar helsta von um afburða skákmann en hann varð í 2. sæti á vel skipuðu Íslandsmóti á dögunum, tefldi í júní á Kúbu ásamt fjórum öðrum íslenskum skákmönnum í opna flokki minningarmótsins um Capablanca, hlaut 6½ vinning af 10 mögulegum og varð í 16.-28. sæti af tæplega 200 keppendum. Síðan lá leiðin yfir hafið og teflir hann þessa dagana á opnu móti í Benasque á Spáni. Eftir sjö umferðir var Hjörvar í efsta sæti með sex öðrum og hafði þá hlotið sex vinninga af sjö mögulegum og er það árangur sem reiknast upp á 2.687 elo-stig. 

Athyglin beinist að Wei Yi

Eftir sigur Kínverka í opna flokki síðasta ólympíumóts hefur athyglin beinst að þeirra bestu skákmönnum einkum þó undrabarninu Wei Yi sem tefldi ásamt flokki landa sinna í Reykjavíkurskákmótinu 2013. Hann er nú 16 ára gamall og er í 29. sæti á heimslistanum. Það eru þó tilþrifin frekar en elo-stigin sem vekja athygli sbr. eftirfarandi skák sem tefld var á dögunum á sterku alþjóðlegu móti á eyjunni Danzhou í Suður-Kína: 

Wei Yi – Bruzon Batista (Kúba )

Sikileyjar vörn

1. e4 c5 2. Rf3 e6 3. Rc3 a6 4. Be2 Rc6 5. d4 cxd4 6. Rxd4 Dc7 7. 0-0 Rf6 8. Be3 Be7 9. f4 d6 10. Kh1 0-0 11. De1 Rxd4 12. Bxd4 b5 13. Dg3 Bb7 14. a3 Had8

Alþekkt staða sem komið hefur upp í ótal skákum. Svartur reynir að hindra framrás e4-peðsins en atlagan kemur þá annars staðar frá.

15. Hae1 Hd7 16. Bd3 Dd8 17. Dh3 g6 18. f5 e5 19. Be3 He8 20. fxg6 hxg6 21. Rd5! Rxd5?

Hann varð að reyna 22.... Bxd5 23. exd5 Hb7. Nú kemur mikill hnykkur.

22. Hxf7! Kxf7 23. Dh7+ Ke6 24. exd5+ Kxd5

Ekki dugar 24.... Bxd5 25. Bxg6 og mátar. Nú er spurningin hvort svarti kóngurinn sleppi yfir á drottningarvænginn.

 

 

 

 

 

 

25. Be4+! Kxe4 26. Df7!

Tveir bráðsnjallir leikir.

26.... Bf6 27. Bd2+ Kd4 28. Be3+ Ke4 29. Db3! Kf5 30. Hf1+ Kg4 31. Dd3 Bxg2+ 32. Kxg2 Da8+ 33. Kg1 Bg5 34. De2+ Kh4 35. Bf2+ Kh3 36. Be1!

– og svartur gafst upp. Það er engin vörn við hótuninni 37. Hf3+.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 11. júlí 2015

Skákþættir Morgunblaðsins

[Event "6th Hainan Danzhou"] [Site "Danzhou CHN"] [Date "2015.07.03"] [EventDate "2015.07.02"] [Round "2.4"] [Result "1-0"] [White "Wei Yi"] [Black "Lazaro Bruzon Batista"] [ECO "B40"] [WhiteElo "2724"] [BlackElo "2669"] [PlyCount "71"] 1. e4 c5 2. Nf3 e6 3. Nc3 a6 4. Be2 Nc6 5. d4 cxd4 6. Nxd4 Qc7 7. O-O Nf6 8. Be3 Be7 9. f4 d6 10. Kh1 O-O 11. Qe1 Nxd4 12. Bxd4 b5 13. Qg3 Bb7 14. a3 Rad8 15. Rae1 Rd7 16. Bd3 Qd8 17. Qh3 g6 18. f5 e5 19. Be3 Re8 20. fxg6 hxg6 21. Nd5 Nxd5 22. Rxf7 Kxf7 23. Qh7+ Ke6 24. exd5+ Kxd5 25. Be4+ Kxe4 26. Qf7 Bf6 27. Bd2+ Kd4 28. Be3+ Ke4 29. Qb3 Kf5 30. Rf1+ Kg4 31. Qd3 Bxg2+ 32. Kxg2 Qa8+ 33. Kg1 Bg5 34. Qe2+ Kh4 35. Bf2+ Kh3 36. Be1 1-0

Ingvar gerði jafntefli gegn Romanishin í lokaumferðinni

Ingvar Þór Jóhannesson (2372) gerði jafntefli við úkraínsku goðsögnina Oleg Romanishin (2475) í níundu og síðustu umferð minningarmótsins um Najdorf sem fram fór í Varsjá í dag. Ingvar hlaut 5 vinning og endaði í 24.-35. sæti (31. sæti á stigum).

Ingvar hækkaði um 2 stig fyrir frammistöðu sína en hann átti góðan endasprett eftir frekar slæman kafla um miðbik mótsins. 

Sigurbjörn Björnsson (2327) átti ekki gott mót og endaði í 70.-77. (75. sæti) með 3 vinninga. 

Lettneski stórmeistarinn Igor Kovalenko (2682) sigraði á mótinu en hann hlaut 8 vinninga. Búlgarinn Ivan Cheparinov (2683) varð annar með 7 vinninga.

Vert er að benda á skákblogg Ingvars þar sem hann fjallar um mótið.

Alls tóku 83 skákmenn í efsta flokki og þar af voru 23 stórmeistarar. Ingvar var nr. 39 í stigaröð keppenda en Sigurbjörn var nr. 52.

• Heimasíða mótsins
• Úrslitaþjónusta
• Beinar útsendingar (hefjast almennt kl. 15)
• Chessbomb

Páll Agnar í 3.-6. sæti eftir sigur á Skotlandsmeistaranum

Páll Agnar Þórarinsson (2208) vann í dag skoska FIDE-meistarann Alan Tate (2335) í 7. umferð opna skoska meistaramótinu sem fram fer í Edenborg. Alan Tate er núverandi skákmeistari Skotlands. Páll hefur 5,5 vinning og er í 3.-6. sæti. 

Í áttundu og næstsíðustu umferð, sem fram fer á morgun, teflir Páll við bandaríska FIDE-meistarann Gabriel Petesch (2242).

Heimasíða mótsins