Bolvíkingar lögðu Fjölnismenn í Rimaskóla 46 - 26

Fjölnismenn tóku á móti hinu öfluga skákliði Bolvíkinga í 2. umferð í Hraðskákkeppni taflfélaga. Teflt var í Rimaskóla. Samtímis var efnt til hliðarmóts fyrir efnilega Fjölnismenn sem eru á leið á Norðurlandamót grunn-og barnaskólasveita í Stokkhólmi og á Västerås Open í septembermánuði.

Jafnt var með sveitum Fjölnis og TB fyrstu 5 umferðirnar eða allt þar til Jóhann Hjartarson birtist og settist að tafli í 6. umferð. Bolarnir styrktust ekkert venjulega við komu stórmeistarans og unnu 6-0 í lokaumferð fyrri hálfleiks og náðu þægilegri forystu 21,5 - 14,5. Þrátt fyrir að Jóhann tæki aðeins fjórar skákir var hann búinn að kveikja neistann í sínu liði og síðari umferðinni lauk 24,5 - 11,5 gestunum í hag. Heildarúrslit, öruggur sigur TB 46 - 26.

Fyrir liði Bolvíkinga fóru tveir ósigrandi turnar, þeir Bragi Þorfinnsson og Dagur Arngrímsson. Bragi var með fullt hús og 12 vinninga og Dagur með 11,5 vinninga. Magnús Örn halaði inn 7,5 vinningi og Halldór Grétar 6,5. Eins og áður sagði staldraði Jóhann Hjartarson við í stutta stund, tók fjórar skákir og vann þær allar. Aðrir sem tefldu fyrir Bolvíkinga voru þeir Guðmundur Daðason og Sæbjörn Guðfinnsson. 

Fjölnismenn börðust vel allan tímann og gerðu hvað þeir gátu að halda í við Bolvíkinga og gátu verið nokkuð sáttir við sína frammistöðu. Þeir söknuðu stórmeistara síns Héðins Steingrímssonar frá 1. umferð keppninnar og enginn vafi leikur á því að með Héðin í liðinu hefði rimman orðið jöfn. Tómas Björnsson sem fellur ljómandi vel inn í hóp hinna efnilegu skákmanna Fjölnis hlaut 7 vinninga úr 11 skákum og hinn 17 ára Dagur Ragnarsson átti góða setu, tefldi allar skákirnar og hlaut 6 vinninga. Oliver Aron var með 4,5 vinning, Jón Trausti og Erlingur Þorsteins með 3 vinninga en auk þeirra tefldu þeir Jón Árni, Dagur Andri og Hörður Aron Hauksson fyrir Fjölnismenn í þessari umferð. 

Barna- og unglingastarf Skákdeildar Hauka hefst á þriðjudaginn

Barna- og unglingastarf Skákdeildar Hauka hefst þriðjudaginn 2. september. Skákæfingar í vetur verða á þriðjudögum frá kl. 17-19 í forsal Samkomusalarins. Þjálfari verður Páll Sigurðsson, s: 860 3120, netfang: [e-mail]

Reikna má með að æfingarnar verði tvískiptar þ.e. byrjendur og ungir skákmenn (yngsta stig grunnskóla) frá 17-18 og eldri keppendur frá 18-19.

Íslandsmót skákfélaga 2014-2015

Fyrri hluti Íslandsmóts skákfélaga 2014-2015 fer fram dagana 2.-5. október nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 2. október. Aðrar deildir munu hefja taflmennsku föstudaginn 3. okt. kl. 20.00 og síðan tefla laugardaginn 4. okt. kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 5. október.

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:

• 1. deild                       kr. 55.000.-
• 2. deild                       kr. 50.000.-
• 3. deild                       kr. 15.000.-
• 4. deild                       kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Minnt er á reglugerð um Íslandsmót skákfélaga og 3. kafla skáklaga Skáksambands Íslands sem varða Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra. 

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 12. september nk. sbr. 18. gr. skáklaga.

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni."

Þátttökutilkynningar þurfa að berast Skáksambandi Íslands fyrir 22. september með bréfi, tölvupósti ([e-mail]) eða símleiðis.  Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild.

Stjórn SÍ mælist til - af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar. 

Ath.  Seinni hluti Íslandsmóts skákfélaga verður færður aftur fyrir Reykjavíkurskákmótið vegna EM einstaklinga sem mun fara fram 23. febrúar - 7. mars.

Héðinn með jafntefli í gær

Stórmeistarinn Héðinn Steingrímsson (2536) gerði jafntefli við pólska alþjóðlega meistarann Stopa Jacek (2498) í sjöundu umferð alþjóðlegs mót í Bratto á Ítalíu í gær. Héðinn hefur 5 vinninga og er í 3.-6. sæti.

Pólski alþjóðlegi meistarinn Zbigniew Pakleza (2498) er efstur með 6 vinninga. Héðinn mætir honum í áttundu og næstsíðustu umferð sem fram fer í dag.

Alls taka 48 skákmenn þátt í mótinu. Þar af eru átta stórmeistarar og er Héðinn þriðji í stigaröð keppenda.

• Heimasíða mótsins
• Úrslitaþjónusta 
• Beinar útsendingar (hefjast kl. 12:30)

Framsýnarmót Hugins hefst í kvöld

Framsýnarmótið 2014 verður haldið í Framsýnarsalnum Garðarsbraut 26 á Húsavík (ath breytt staðsetning) helgina 29-31 ágúst nk. Tefldar verða 7 umferðir alls, fyrstu fjórar með atksákartímamörkum (25 mín) en þrjár með 90 mín + 30 sek/leik.

Þátttökugjald 2000 kr en 1000 kr fyrir 16 ára og yngri.

Dagskrá:

Föstudagur 29 ágúst kl 20:00 1. umferð
Föstudagur 29 ágúst kl 21:00 2. umferð
Föstudagur 29 ágúst kl 22:00 3. umferð
Föstudagur 29 ágúst kl 23:00 4. umferð

Laugardagur 30 ágúst kl 11:00 5. umferð
Laugardagur 30 ágúst kl 17:00 7. umferð

Sunnudagur 31 ágúst kl 11:00 7. umferð

• Skráning í mótið er hér.
• Nánari upplýsingar hjá Hermanni Aðalsteinssyni í síma 821-3187821-3187

CallSend SMSAdd to SkypeYou'll need Skype CreditFree via Skype

Call

Send SMS

Add to Skype

You'll need Skype CreditFree via Skype

Þrjár viðureignir í Hraðskákkeppni taflfélaga fara fram í kvöld

Þrjár viðureignir fara fram í annarri umferð Hraðskákkeppni taflfélaga í kvöld. Tvær þeirra fara fram í Skákhöll TR en ein fer fram í Rimaskóla. Annarri umferð lýkur svo á sunnudagskvöldið.

TR á tvær viðureignir í kvöld. Þær hefjast kl. 20.

• Taflfélag Reykjavíkur (unglingasveit) -  Skákfélag Reykjanesbæjar  
• Taflfélag Reykjavíkur - Vinaskákfélagið

Í Rimaskóla kl. 19:30 mætast svo Skákdeild Fjölnis og Taflfélag Bolungarvíkur.

Keppninni lýkur svo á sunnudaginn með viðureign Hugins og Víkingaklúbbsins.

Undanúrslit fara fram nk. fimmtudagskvöld.

Caruana vann Topalov - Carlsen gerði jafntefli við MVL í ótrúlegri skák

 

Sterkasta skákmót allra tíma, sé miðað við skákstig, hófst í gær í Saint Louis, skákhöfuðborg Bandaríkjanna. Mótið ber nafnið Sinquefield Cup en helsti styrktaraðili mótsins og reyndar alls skáklífs í Bandaríkjunum er Rex Sinquefield. Meðalstig mótsins eru 2802 skákstig!

Í fyrstu umferð vann Caruana (2801) Topalov (2772) í æsilegri skák. Sú skák sem stal hins vegar mestri athygli var jafnteflisskák Magnusar Carlsen (2877) og Frakkans Maxime Vachier-Lagrave (2768) þar sem Frakkinn kom Magnúsi á óvart í áttunda leik en Magnús tefldi framhaldið vel og fann ótrúlegan leik 13...Rb4 eftir hálftíma umhugsun.

Fína umfjöllun um fyrstu umferð má lesa á Chess24.

Önnur umferð hefst í kvöld kl. 19.  Þá teflir Carlsen við Nakamura, Caruana mætir MVL og Aronian og Topalov mætast.

• Heimasíða mótsins
• Beinar útsendingar

Laugardagsæfingar hefjast á ný eftir sumarfrí

Hinar margrómuðu laugardagsæfingar Taflfélags Reykjavíkur hefjast á ný eftir sumarfrí laugardaginn 30. ágúst.

Í vetur hefur göngu sína nýr flokkur, byrjendaflokkur, sem er fyrir yngstu iðkendurna sem eru að stíga sín fyrstu skref á reitunum 64. Sá flokkur byrjar æfingar laugardaginn 13. september. Allir hressir skákkrakkar eru hvattir til að mæta á laugardagsæfinguna 30. ágúst kl.14, líka þeir sem munu sækja byrjendaæfingarnar enda munum við þá kynna starfið í vetur og hafa gaman!

Þjálfun og kennsla á laugardagsæfingunum er í höndum þaulreyndra og sterkra skákmanna og er aðgangur ókeypis. Æfingarnar henta byrjendum jafnt sem lengra komnum og er börnum velkomið að mæta og fylgjast með til að byrja með ef þau eru ekki tilbúin að taka beinan þátt strax.

Æfingarnar fara fram í húsnæði félagsins að Faxafeni 12 á laugardögum yfir vetrartímann. 
Dagskrá veturinn 2014-2015:

11.00-12.15 Byrjendaflokkur (hefst 13. september).
12.30-13.45 Skákæfing stúlkna/kvenna (hefst 30. ágúst).
14.00-15.15 Skákæfing fyrir börn fædd 2002 og síðar (opnar æfingar, hefst 30. ágúst).
15.15-16.00 Félagsæfing fyrir börn fædd 2002 og síðar (hefst 30. ágúst).

Umsjón með æfingunum er í höndum Sigurlaugar R. Friðþjófsdóttur, Torfa Leóssonar, Kjartans Maack og Björns Jónssonar. Umsjón með æfingum afrekshóps hafa Torfi Leósson og Daði Ómarsson.

Íslandsmót skákfélaga í Fischer Random - skráningarfrestur fram til miðnættis

Þá er komið að því sem allir skákmenn hafa verið að bíða eftir, fyrsta skemmtikvöldi starfsársins hjá T.R. Ýmsar skemmtilegar tillögur hafa komið um móthald fyrir skemmtikvöldin í vetur og það verður byrjað með trukki. Fyrsta Íslandsmót taflfélaga í Fischer random hraðskák mun fara fram næstkomandi föstudagskvöld!

Öll taflfélög eru hvött til að taka þátt og er frjálst að senda eins margar sveitir til leiks og þau kjósa. Samkvæmt venju verður reglulega gert hlé á taflmennskunni til hægt sé að bregða sér á Billjardbarinn og væta kverkarnar.

Skráning fer fram á heimasíðu TR.  

Fyrirkomulagið verður eftirfarandi:

1. Tímamörk eru 3 mínútur auk 2 sekúndna viðbótartíma á hvern keppanda.
2. Fjöldi skákmanna í hverri sveit eru fjórir og skal styrkleikaraðað eftir bestu samvisku. Sveitir skulu merktar A, B etc eftir styrkleika. Leyfilegt er að vera með tvo varamenn fyrir hverja sveit, sem koma þá inn á borð samkvæmt styrkleika.
3. Swiss, round robin eða double round robin eftir fjölda sveita. Stefnt að því að tefla allavegana 12 umferðir.
4. Leyfilegt er að fá einn lánsmann úr öðru félagi í sína sveit. Það hefur þó afleiðingar. Lán á stórmeistara kostar 3 vinninga, alþjóðlegur meistari kostar 2 vinninga, Fide meistari kostar 1 vinning og aðrir skákmenn kosta 1/2 vinning. Þessir vinningar verða dregnir frá í lok móts. Samþykki viðkomandi félags þarf að liggja fyrir til að lánið teljist löglegt.
5. Sú sveit sem hlítur flesta vinninga sigrar og fær nafnbótina Íslandsmeistari taflfélaga í Fischer Random. Séu tvær eða fleiri sveitir jafnar að vinningum ber sú sveit sigur úr býtum sem hefur flesta "matchpoints". Séu sveitir enn jafnar verður gripið til stigaútreiknings.
6. Gerð verða tvö hlé til Billjardbarsferða meðan á mótinu stendur. Verðlaunaafhending mun fara fram á Billjardbarnum.
7. Líkt og í íslandsmótinu í Fischer Random síðastliðið vor verða fjórar fyrstu stöðurnar gerðar opinberar degi fyrir mót.
8. Verðlaun:
   1.sæti Bikar og 8000 króna úttekt á billjardbarnum í formi veitinga.
   2.sæti Bikar og 5000 króna úttekt á Billjardbarnum í formi veitinga.
   3.sæti Bikar og 2000 króna úttekt á Billiardbarnum í formi veitinga.
9. Þátttökugjöld eru 500kr fyrir hvern skákmann.
10. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.
    
    Skráningu lýkur á miðnætti kvöldið fyrir keppni!
     
    Bjór á stórlækkuðu verði allt kvöldið! Hlökkum til að sjá ykkur!

Stefán, Sævar og Davíð efstir á Meistaramóti Hugins

Stefán Bergsson (2098), Sævar Bjarnason (2095) og Davíð Kjartansson (2331) eru efstir og jafnir með fullt hús að lokinni þriðju umferð Meistaramóts Hugins sem fram fór í kvöld. Í kvöld unnu ávallt hinir stigahærri þá stigalægri að því undanskyldu að Óðinn Örn Jakobsen (stigalaus) vann Björgvin Kristbergsson (1181).

Fjórða umferð fer fram nk. mánudagskvöld. Þá mætast Davíð og Stefán en Sævar teflir við Jón Eggert Hallsson (1632).

• Heimasíða Hugins
• Chess-Results