Síðari hluti Íslandsmóts skákfélaga hefst á fimmtudagskvöld

Seinni hluti Íslandsmóts skákfélaga 2013-2014 fer fram dagana 27. febrúar-1 mars nk.  Mótið fer fram í Menntaskólanum við Hamrahlíð. Keppnin hefst (eingöngu í 1.deild) kl. 19.30 fimmtudaginn 27.febrúar. 

Aðrar deildir munu hefja taflmennsku föstudaginn 28.febrúar  kl. 20.00 og síðan tefla laugardaginn 1. mars. kl. 11.00 og kl. 17.00 sama dag.  

Taflfélag Vestmannaeyja leiðir í efstu deild, Skákfélagið GM Hellir er í öðru sæti og Íslandsmeistarar Víkingaklúbbsins eru í þriðja sæti. Búast má við þessi félög berjist um Íslandsmeistaratitilinn.

Mótstöflu má finna á Chess-Results. 

Taflfélag Garðabæjar leiðir í annarri deild, Skákfélag Reykjanesbæjar er í öðru sæti og b-sveit Víkingaklúbbsins er í þriðja sæti.

Mótstöflu má finna á Chess-Results. 

Skákdeild KR leiðir í þriðju deild, b-sveit Skákfélags Akureyrar er í öðru sæti og Skákfélag Selfoss og nágrennis er í þriðja sæti.

Mótstöflu má finna á Chess-Results.  

B-sveit Skákfélag Reykjanesbæjar leiðir í fjórðu deild, d-sveit Skákfélags Akureyar er í öðru sæti og c-sveit sama félags í því þriðja.

Mótstöflu má finna á Chess-Results. 

Stelpuæfingar hjá GM Helli

Síðast liðnar fimm vikur hefur Skákfélagið GM Hellir haldið stúlknaæfingar undir stjórn landsliðs kvennanna Jóhönnu Bjargar Jóhannsdóttur og Elsu Maríu Kristínardóttur. Mætingin hefur verið mjög góð og bætist í hópinn með hverri æfingu. Síðasta miðvikudag mættu 10 vaskar stelpur á aldrinum 6 - 16 ára. Teflt var stutt mót með 7 mínútna umhugsunar tíma. Þar sem þetta er eingöngu æfing, meðal annars í því að venjast að tefla með klukkum, höfum við hjálpað þeim yngstu að muna að ýta á klukkuna. Þær sem voru ekki með mannganginn á hreinu fengu aðstoð með hann.

Þegar æfingin var hálfnuð var boðið upp á kex og djús og farið í smá kennslu um hvernig er best að koma mönnunum út og hvernig við hrókerum. Í lok æfingarinnar var svo lítil verðlaunaafhending fyrir þær sem voru efstar á æfingunni en svo verða líka verðlaun fyrir bestu mætingu og bestu framfarir í vor. Næsta æfing verður svo kl. 17:15 - 19:00 miðvikudaginn 26. febrúar í Álfabakka 14a, Mjódd á 3. Hæð. Næsta miðvikudag mun svo Lenka Ptachnikova koma og tefla fjöltefli við stelpurnar. Lenka er núverandi íslandsmeistari kvenna auk þess að vera eini íslenski kvennastórmeistarinn þá er hún einnig á fyrsta borði í landsliði kvenna sem fer á Ólympíumót í Tromsö í haust.

• 1. Aníta Sigurðardóttir 4/5v
• 2. Guðný Helga 3,5/5v
• 3. Elín Edda Jóhannsdóttir 3v og 12 stig
• 4-5. Karítas Jónsdóttir 3v og 10 stig
• 4-5. Þórdís Agla Jóhannsdóttir 3v og 10 stig
• 6. Guðbjörg Lilja Svavarsdóttir 2,5
• 7-9. Esja Hodgson 2v
• 7-9. Erna Júlía 2v
• 7-9 Anika Járnbrá 2v

Atkvöld hjá GM Helli í kvöld í Mjóddinni

Skákfélagið GM Hellir heldur atkvöld mánudaginn  24. febrúar 2014. og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili GM Hellis í Álfabakka 14a í Mjóddinni. 

Sigurvegarinn á atkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna
möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hannes sigraði á Stórmeistaramóti Vildarbarna

 

Hannes Hlífar Stefánsson sigraði á æsispennandi Stórmeistaramóti Vildarbarna sem fram fór í Hótel Hilton í dag. Hannes var taplaus á mótinu og hlaut 8 vinninga af 9 mögulegum. Helgi Ólafsson varð í öðru sæti með 7,5 vinning. Margeir Pétursson, sem tefldi á sínu fyrsta móti innanlands í mörg herrans ár, varð þriðji með 6 vinninga.

 

 

Tíu stórmeistarar tóku þátt í mótinu og þar á meðal öll "fjórmenningarklíkan" sem tefldi saman í fyrsta skipti í lokuðu móti í um áratug. Mótið hófst með afhöfn þar sem Hjörvar Steinn Grétarsson bauð gesti og gangandi velkomna og útskýrði hugmyndina um mótshaldið fyrir gestum sem voru fjölmargir. Hann hafði fyrir löngu ákveðið að þakka fyrir sig með slíku mótshaldi. Í hléi færði hann svo Helga Má Björgvinssyni, stjórnarmanni í Vildarbörnum, gjöf upp á á 500.000 kr.

 

 

En að mótinu sjálfu. Helgi Ólafsson hóf mótið með miklum látum og vann hverja skákina á fætur annarri. Eftir sjö umferðir hafði hann fullt hús. Hannes Hlífar Stefánsson fylgdi honum hins vegar eins og skugginn og hafði 6 vinninga af loknum sjö umferðum. Þeir mætust þá í áttundu og næstsíðustu umferð og þar með hafði Hannes náð honum að vinningum. 

 

 

Í lokaumferðinni tefldi Helgi við Margeir og Hannes við Þröst. Margeir náði að þráskák Helga í spennandi skák. Hannes vann svo Þröst eftir mikla baráttu og þar með ljóst að sigurinn væri hans.

 

 

Að fá átta vinninga í svo sterku móti er frábær frammistaða. Vinningshlutfall Helga ætti undir venjulegum kringumstæðum hefði dugað til sigurs. Margeir kom sterkur inn á sína fyrsta innlandi hraðskákmóti í mörg herrans ár. Jóhann Hjartarson varð fjórði með 5 vinninga, Helgi Áss Grétarsson varð fimmti með 4,5 vinning. Lokatöðu mótsins má nálgast á Chess-Results.

 

 

Aðstæður á skákstað voru góðar. Í hliðarsal voru Björn Þorfinnsson og Ingvar Þór Jóhannesson með skákskýringar en mikill fjöldi áhorfenda sótti mótið. 

Myndaalbúm (Ómar Óskarsson)

Rúnar hraðskákmeistari Akureyrar

Þeir sem veðjuðu á að Rúnar Sigurpálsson myndi vinna hraðskákmót Akureyrar fengu hlutfallið 1,0003 og er talið að sumir hafi grætt á þriðja þúsund króna í því samhengi. Rúnar brást þeim sumsé ekki og halaði inn 15 vinninga í 16 skákum - gerði í öryggiskyni jafntefli við tvo helstu keppinauta sína. Þátttaka á var með besta móti í þetta sinn og mörg meistaraverkin sáu dagsins ljós. Heildarúrslit sem hér segir:

 

1	Rúnar Sigurpálsson	15
2	Jón Kristinn Þorgeirsson	13½
	Áskell Örn Kárason	13½
4	Haraldur Haraldsson	12
5	Gauti Páll Jónsson	10½
6	Ólafur Kristjánsson	10
	Sigurður Arnarson	10
8	Andri Freyr Björgvinsson	8½
	Sigurður Eiríksson	8½
10	Karl Egill Steingrímsson	7
	Símon Þórhallsson	7
12	Haki Jóhannesson	6
13	Krtistinn P Magnússon	4½
	Logi Rúnar Jónsson	4½
15	Sveinbjörn Sigurðsson	4
16	Óliver Ísak  Ólason	1½
17	Gabríel Freyr Björnsson	0

Vignir Vatnar og Guðmundur Agnar komnir áfram í úrslit Barna Blitz

Vignir Vatnar Stefánsson og Guðmundur Agnar Bragason urðu í fyrsta og öðru sæti á laugardagsæfingu hjá TR í gær. Æfingin í gær var jafnframt fyrsta undanrásakeppnin um sæti í úrslitakeppni Barna Blitz sem am fer laugardaginn 8. mars í Hörpu.

Röð efstu manna:

• 1. Vignir Vatnar Stefánsson 9 v. af 9
• 2. Guðmundur Agnar Bragason 8 v.
• 3. Róbert Luu 7 v.
• 4.-5. Aron Þór Mai og Kristján Orri Hugason 6 v.
• 6.-9. Ólafur Örn Ólafsson, Eldar Sigurðarson, Björn Magnússon og Ólíver Bent Hjaltason 5,5 v.

Alls tóku 36 ungmenni þátt Önnur undankeppnin verður á morgun í félagsheimili GM Hellis, Álfabakka 14a, á morgun og hefst kl. 17:15.

 

Skákþáttur Morgunblaðsins: Veronika í verðlaunasæti á Gíbraltar

Jón Viktor Gunnarsson er Skákmeistari Reykjavíkur eftir spennandi keppni á Skákþinginu, sem hófst í byrjun janúar og lauk í síðustu viku. Jón varð efstur ásamt Einari Hjalta Jenssyni. Þeir hlutu átta vinninga af níu mögulegum en Jón Viktor var sæmdur titlinum eftir stigaútreikning. Einar Hjalti varð einnig efstur á Haustmót TR og er á mikilli siglingu. Röð efstu manna á mótinu var að öðru leyti þessi:

3. Oliver Aron Jóhannesson 7 v. 4.-6. Mikhael Jóhann Karlsson, Loftur Baldvinsson og Haraldur Baldursson 6½ v. 7.-13. Davíð Kjartansson, Lenka Ptacnikova, Sigurbjörn Björnsson, Þorvarður Ólafsson, Jón Trausti Harðarson, Stefán Bergsson og Vignir Vatnar Stefánsson 6 v.

Ýmsar niðurstöður má lesa úr þessu móti en athygli vekur góð frammistaða piltanna úr Rimaskóla, Olivers Arons og Jóns Trausta, og hins tíu ára gamla Vignis Vatnars Stefánssonar. Af efstu mönnum hækkuðu Jón Trausti, Einar Hjalti, Loftur Baldvinsson og Vignir Vatnar myndarlega á stigum.

Af hálfu TR var vel staðið að mótinu í hvívetna, skákir voru aðgengilegar degi eftir að umferð lauk, svo dæmi sé tekið.

Frábær frammistaða Veroniku á Gíbraltar

Undanfarin ár hefur opna mótið á „Klettinum", þ.e. Gíbraltar, verið það vinsælasta meðal skákmanna og í ár flykktust þangað nafntogaðir kappar. Ivantsjúk, Cheparinov og Vitiugov deildu efsta sætinu, hlutu allir átta vinninga af tíu mögulegum í hópi meira en 250 keppenda; eftir aukakeppni var Cheparinov úrskurðaður sigurvegari.

Magnús Kristinsson bauð dóttur sinni, Veroniku Steinunni, í þetta ferðalag á framandi slóðir þar sem apar leika við hvern sinn fingur. Feðginin voru einu fulltrúar Íslands á Gíbraltar og Veronika náði eftirminnilegum árangri og vann til góðra verðlauna í flokki keppenda undir 2.050 elo-stigum. Hún fékk fjóra vinninga af tíu mögulegum, tefldi upp fyrir sig allt mótið og náði árangri sem reiknast upp á 2.010 elo-stig en hennar stig fyrir mótið voru 1.561 elo.

Veronika tók þátt í Evrópumóti barna og unglinga í Svartfjallalandi fyrir áramótin og undirbúningur hennar fyrir það mót er að skila sér núna. Eftirfarandi skák sem tefld var í 3. umferð er til vitnis um það:

Tim R. Spanton (England) - Veronika Magnúsdóttir

Reti byrjun.

1. c4 Rf6 2. g3 c6 3. Rf3 d5 4. b3 Bf5

Biskupinn er oft hafður á g4 en þetta er ágætt líka.

5. Bb2 Rbd7 6. Bg2 h6 7. 0-0 e6 8. d3 Be7 9. Rbd2 0-0 10. He1 Hc8 11. e4 Bh7 12. e5 Re8 13. d4 Rc7

Þótt svartur standi þröngt á hann góð færi náist að opna taflið með - c5. Hér hefði verið best að loka taflinu með 14. c5 en hvítur velur ómarkvissan leik.

14. Bh3? c5! 15. Hc1 cxd4 16. Rxd4 Rc5 17. Bf1 Rd3 18. Bxd3 Bxd3 19. He3 Bh7 20. c5 Ra6 21. c6 Db6 22. cxb7 Dxb7 23. a3 Hxc1 24. Dxc1 Rc5 25. Hc3 Db6 26. Df1

- Sjá stöðumynd -

26.... Ra4!

Skemmtileg vending, annar góður leikur var 26.... a5.

27. Hc6 Db8 28. Bc1 Rc5!

„Músagildru-þemað" er hér komið fram, riddarinn hleypir hróknum inn til c6 en lokar svo á hann aftur með því að stökkva til baka. Veikleikinn á d3 reynist erfiður.

29. f4 Rd3 30. R2f3 Hc8 31. f5 Hxc6 32. Rxc6 Bc5 33. Kg2 Dxb3 34. fxe6 fxe6 35. Rd2 Dc2 36. Rd8 Be4+ 37. Kh3 Rf2+ 38. Kh4 Be7+

- og hvítur gafst upp, 39. Kh5 er svarað með 39.... Bg6 mát.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 16 febrúar 2014

Skákþættir Morgunblaðsins

[Event "Tradewise Gibraltar"] [Site "Caleta ENG"] [Date "2014.01.30"] [EventDate "2014.01.28"] [Round "3.121"] [Result "0-1"] [White "Timothy Spanton"] [Black "V Magnusdottir"] [ECO "A12"] [WhiteElo "1995"] [BlackElo "1561"] [PlyCount "75"] 1. c4 Nf6 2. g3 c6 3. Nf3 d5 4. b3 Bf5 5. Bb2 Nbd7 6. Bg2 h6 7. O-O e6 8. d3 Be7 9. Nbd2 O-O 10. Re1 Rc8 11. e4 Bh7 12. e5 Ne8 13. d4 Nc7 14. Bh3 c5 15. Rc1 cxd4 16. Nxd4 Nc5 17. Bf1 Nd3 18. Bxd3 Bxd3 19. Re3 Bh7 20. c5 Na6 21. c6 Qb6 22. cxb7 Qxb7 23. a3 Rxc1 24. Qxc1 Nc5 25. Rc3 Qb6 26. Qf1 Na4 27. Rc6 Qb8 28. Bc1 Nc5 29. f4 Nd3 30. N2f3 Rc8 31. f5 Rxc6 32. Nxc6 Bc5+ 33. Kg2 Qxb3 34. fxe6 fxe6 35. Nd2 Qc2 36. Nd8 Be4+ 37. Kh3 Nf2+ 38. Kh4 0-1

Stefán Kristjánsson hlutskarpastur á Nóa Siríus mótinu

 

Stefán Kristjánsson, stórmeistari (2491), tryggði sér efsta sætið á Nóa Síríus mótinu - Gestamóti GM Hellis og Breiðabliks, með jafntefli í lokaumferðinni við alþjóðlega meistarann Karl Þorsteins (2452) og hlaut þannig 6 vinninga í 7 skákum.  Stefán hafði vinningsforskot á næstu menn fyrir umferðina og bjuggust margir við því að sest yrði á friðarstóla og fljótlega sæst á skiptan hlut. Raunin varð þó öll önnur áhorfendum til mikillar ánægju. Báðir tefldu kapparnir hvasst og kröftuglega frá byrjun svo að úr varð tvísýn og spennandi viðureign sem lauk ekki fyrr en eftir 40 leiki þegar Stefán þráskákaði.

 

Jafnir í öðru sæti á mótinu urðu FIDE-meistarinn Davíð Kjartansson (2336) og alþjóðlegi meistarinn Björgvin Jónsson (2340) með 5½ vinning. Fjórir kappar deildu með sér næstu sætum með 5 vinninga: alþjóðlegu meistararnir Bragi Þorfinnsson (2454), Jón Viktor Gunnarsson (2412) og Karl Þorsteins (2452) ásamt FIDE-meistaranum Magnúsi Erni Úlfarssyni (2382). Margir öflugir skákmenn voru svo rétt á eftir með 4½ vinning.

Óhætt er að fullyrða að líflega hafi verið teflt á Nóa Síríus mótinu sem er eitt af öflugustu innlendu mótum sem haldin hafa verið hér á landi. Sérstaklega er ánægjulegt hve margir skáksnillingar sem lítt hafa haft sig frammi í kappskák langa hríð tóku þátt  en annars var aldursdreifingin mjög góð. Teflt var í Stúkunni á Kópavogsvelli. Þar er bjart og notalegt, vel fer um keppendur og  áhorfendur og ekki er amalegt að njóta gómsætra veitinga frá Nóa Síríusi til að skerpa athyglisgáfuna!

Breiðablik og GM Hellir stefna að áframhaldandi samstarfi um þetta mót sem er skemmtileg viðbót við góða skákflóru á Íslandi. Mikilvæg reynsla fékkst að þessu sinni sem verður nýtt til að gera næsta mót enn betra. Keppendum er þökkuð drengileg framkoma og skemmtileg taflmennska og skákstjórum frábært utanumhald. Síðast en ekki síst vilja aðstandendur mótsins þakka Nóa Síríusi drengilegan stuðning og samskipti sem hafa verið til fyrirmyndar í alla staði.

• Heimasíða GM Hellis
• Chess-Results 
• Myndaalbúm (GB, SB og HGE)

Stórmeistaramót Vildarbarna kl. 14 í dag í Hótel Hilton

Stórmeistaramót Vildarbarna fer fram sunnudaginn 23. febrúar á Hótel Hilton klukkan 14:00. Mótið er haldið til styrktar Vildarbörnum. Mótshaldari er Hjörvar Steinn Grétarsson og fjölskylda með stuðningi styrktaraðila Hjörvars Steins, Icelandair Cargo.

Hjörvar Steinn er nýjasti stórmeistari Íslendinga en útnefninguna hlaut hann í desember. Með mótshaldinu vill hann koma fram þökkum til allra þeirra aðila sem hafa stutt hann á sínum skákferli um leið og góðu málefni er lagt lið.

Tíu stórmeistarar munu tefla hraðskákir í lokuðum flokki þar sem þeir mætast allir innbyrðis. Mótið er  sterkasta hraðskákmót sem haldið hefur verið á Íslandi í nokkur ár.

Fyrstu verðlaun nema 100.000 krónum.

Keppendur:

• GM Friðrik Ólafsson
• GM Hannes Hlífar Stefánsson
• GM Helgi Áss Grétarsson
• GM Helgi Ólafsson
• GM Hjörvar Steinn Grétarsson
• GM Jóhann Hjartarson
• GM Jón L. Árnason
• WGM Lenka Ptácníková
• GM Margeir Pétursson
• GM Stefán Kristjánsson
• GM Þröstur Þórhallsson
  

Í viðtali við Hjörvar Stein kom fram að undirbúningur mótsins hafi gengið vel:

Það hefur allt gengið vel. Fyrirtæki og einstaklingar hafa nú þegar lagt til sitt af mörkum og það verður ánægjulegt að afhenda Vildarbörnum styrkinn. Ég hlakka svo mikið til að tefla í móti með öllum þessum stórmeisturum. Þetta er eins konar uppskeruhátíð í kjölfar titilsins sem ég náði í desember. Það hafa ansi margir hjálpað mér í gegnum tíðina á mínum ferli og nú vill ég gefa tilbaka í verki.

Stórmeistaramótið verður sett klukkan 14:00 á sunnudaginn. Búast má við að mótið standi til um 17:00. Skákskýringar verða í hverri umferð í höndum Ingvars Þórs Jóhannessonar, Björns Þorfinnssonar og Stefáns Bergssonar.

Áhorfendur hjartanlega velkomnir.

Hraðskákmót Akureyrar fer fram í dag

Hið árlega Hraðskákmót Akureyrar verður háð á morgun, sunnudag og hefst kl. 13. Teflt verður um hinn eftirsóknarverða titil „Hraðskákmeistari Akureyrar".Í þeim slag eru margir kallaðir, en bara einn útvalinn. Spurningin er hvort núverandi meistara, Rúnari Sigurpálssyni, takist að verja titil sinn, hvort gamlir og gráir meistarar muni taka fram skóna og leggja hann að velli, eða hvort nýstirnin taki mótið með trompi og máti þá sem rosknari eru. Allt af þessu getur gerst og margt fleira.

Eitt er víst = það verður grimmilega gaman!

Allir eru velkomnir meðan húsrúm leyfir og kaffið endist.