Nýtt fréttabréf SÍ komið út

Nýtt fréttabréf Skáksambands Íslands kom út í gær en fréttabréfið kemur út að jafnaði tvisvar á mánuði yfir vetrarmánuðina.

Hægt er að skrá sig fyrir fréttabréfinu á Skák.is - mjög ofarlega til vinstri með því að velja "Subscribe" þar á bláum fleti.

Meðal efnis er:

• Vel heppnaður Skákdagur
• Sóley LInd og Nansý Íslandsmeistarar stúlkna
• Reykjavíkurborg styrkir Skáksambandið
• Vignir Vatnar Íslandsmeistari barna
• Saga Reykjavíkurskákmótsins væntanleg!
• Rimaskóli Íslandsmeistari stúlknasveita
• Frábær þátttaka á skákmótum í ársbyrjun
• Nýr formaður Ása
• Jakob Sævar sigraði á Skákþingi GM Hellis (norðursvæði)
• Aronian sigraði á Tata Steel-mótinu
• N1 Reykjavíkurskákmótið - niðurtalning
• N1 Reykjavíkurskákmótið - nýir keppendur
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Stefán Þormar í stuði í Stangarhyl

Stefán Þormar var frískastur hjá Ásum í Stangarhyl í dag, hann fékk 8½ vinning af 10 mögulegum. Fast á hæla honum kom svo Guðfinnur R Kjartansson með 8 vinninga í öðru sæti. Össur Kristinsson varð svo í þriðja sæti með 7 vinninga. Tuttugu og sex skákmenn mættu til leiks í dag.

Næsta föstudag verður svo Toyotaskákmótið haldið í höfuðstöðvum Toyota í Kauptúni 6 Garðabæ. Mótið hefst stundvíslega kl. 13.00. Við viljum biðja þátttakendur að mæta tímanlega á staðinn.

Það er hægt að forskrá sig hjá Garðari Guðmundssyni í síma 898 4805 og í netfangið [e-mail], Finni Kr Finnssyni í síma 893 1238 og í netfangið [e-mail]. Núna eru tæpir 30 skráðir til leiks. 

Nánari úrslit má finna í meðfylgjandi mótstöflu:

 

 

 

 

Toyota skákmót eldri borgara á föstudaginn

Íslenska skákvikan er hafin, þá teflum við öll til heiðurs okkar fyrsta stórmeistara Friðriki Ólafssyni. Eldri borgarar ætla að tefla mikið þessa viku eins og þeir gera yfirleitt. Föstudaginn 31. janúar býður Toyota á Íslandi eldri borgurum til skákmóts í höfuðstöðvun sínum í Kauptúni 6 Garðabæ þ.e. við hliðina á IKEA. Toyota gefur öll verðlaun sem eru vegleg, þetta er sjöunda Toyotaskákmótið sem haldið er.

Sigurvegari á síðasta Toyotamóti var Bragi Halldórsson. Æsir skákfélag F E B í Reykjavík og Riddarar úr Hafnarfirði hjálpast að við framkvæmd mótsins. Skákmótið hefst stundvíslega kl. 13.00

Þátttakendur eru vinsamlega beðnir að mæta vel tímanlega fyrir kl. 13.00

Það er best að forskrá sig hjá Garðari Guðmundssyni í síma 8984805 og í netfangið [e-mail] hjá Finni Kr. Finnssyni í síma 8931238 og netfangið [e-mail]

Það verða tefldar níu umferðir með 10 mínútna umhugsun. Allir skákmenn 60+  og þeir sem verða 60 ára á árinu velkomnir.

Skákdagsmótið á Akureyri - Lundarskóli og Brekkuskóli jafnir eftir furðustigareikning!

Eins og að var stefnt áttust þessir tveir miklu skákskólar við á Skákdaginn sjálfan. Útlit var fyrir jafna og spennandi keppni, þar sem Lundskælingar beittu tveimur miklum gæðingum fyrir sinn vagn en Brekkskælingar treystu fremur á breidd í sínu liði. Þá gerðust þau ósköp að mikil forföll dundu yfir þá síðarnefndu - keppendur flykktust í aðra hreppa, lögðust í bælið eða gleymdu hreinlega að mæta. Þegar blásið var til leiks voru mættir þrír Brekkskælingar og sjö úr Lundarskóla - sem vissulega var líka vonum minna. Þau tefldu þá einfalda umferð, 9 umferða mót og var svo gert upp á milli skólanna með einföldum hlutfallsreikningi; deilt í vinningatöluna með fjölda liðsmanna. Sá útreikningur - sem á vart sinn líka í skáksögunni - leiddi til þess að skólarnir skildu jafnir, báðir með 4,5 vinning að meðaltali á mann. En einstaklingsmótið fór sem hér segir:

Jón Kristinn Þorgeirsson L    8,5 af 9

Símon Þórhallsson L             8

Oliver Ísak Ólason B             7,5

Kári Hólmgrímsson B             5

Gunnar A Arason L                4,5

Roman Darri Stevenson Bos L og

Sunna Þórhallsdóttir L          4

Alfa Magdalena Jórunnard L  2

Björn Þór Kristinsson B         1

Helga Sóley Guðjónsd  L       0,5

Símon skólameistari Lundarskóla

Í Lundarskóla stunda nám tveir af öflugustu skákunglingum landsins fyrir skemmstu. Þegar efnt var til Lundarskólamóts í skák sl. föstudag kom í ljós að enginn úr efstu bekkjum skólans treysti sér til að etja kappi við þá bekkjarbræður, Símon Þórhallsson og Jón Kristin Þorgeirsson. Því var slegið upp móti í yngri flokki (1-7. bekk) en þeir fóstbræður tefldu einvígi sín á milli um skólameistaratitilinn sem Jón bar reyndar á sínum herðum frá því í fyrra. Alls tefldu þeir fimm skákir. Símon byrjaði mjög snarplega og vann tvær fyrstu skákirnar. Þá vaknaði Jokko til lífsins og vann tvær næstu. En seiglan kom hinum fyrrnefnda til góða í lokaskákinni og var hann krýndur skólameistari eftir 3-2 sigur í einvíginu.

Í yngri flokki mættu 12 keppendur til leiks. Því miður glataðist mótstaflan, en öruggur sigurvegari var Gunnar Aðalgeir Arason úr 7. bekk með fullt hús vinninga, 5 talsins. Á hæla honum kom fimmtubekkingurinn Roman Darri Stevenson Bos með fjóra vinninga. Aðrir fengu ögn minna en stóðu sig með prýði. Það er mál manna að Lundskælingar mæti með öflugar sveitir á Íslandsmót grunnskólasveita síðar í vetur

Umsóknarfrestur um ferðastyrk til SÍ rennur út 31. janúar

Stjórn SÍ veitir ferðastyrki þrisvar sinnum á ári. Næsta umsóknarfrestur rennur út 31. janúar nk.

Styrkjareglur SÍ

Aðalmarkmið styrkveitinga stjórnar Skáksambands Íslands til einstaklinga er að styðja við bakið á þeim skákmönnum sem sýnt hafa mestar framfarir, metnað og ástundun á síðustu 12 mánuðum, og þykja því líklegastir til að ná enn lengra í nánustu framtíð. Einnig er markmiðið að verðlauna fyrir afburðaárangur og hvetja þannig til afreka.

Styrkjum frá SÍ er ekki ætlað að styrkja hinn almenna skákáhugamann til farar erlendis, heldur einungis þá sem þykja skara fram úr. Sérstök áhersla er lögð á yngri skákmenn sem eru tilbúnir til að leggja á sig þjálfun til að standa sig á þeim mótum sem styrkbeiðni liggur fyrir um. 

Við allar úthlutanir á að vera lögð áhersla á jafnrétti kynjanna og að þeim stúlkum sem skarað hafa fram úr í hverjum aldursflokki sé gert kleift að afla sér reynslu á skákmótum erlendis til jafns á við stráka. Sams konar kröfur um ástundun, árangur og framfarir eru hins vegar gerðar til stúlkna og drengja, kvenna og karla, hvað styrkjaúthlutanir varðar

Viðmið við styrkúthlutanir

1.     Allir styrkþegar SÍ (ungir, alþjóðlegir og aðrir) þurfa að uppfylla eftirfarandi þrjú skilyrði:

• Hafa teflt 50 kappskákir á síðustu 24 mánuðum fyrir árið 2010 og 60 skákir fyrir árið 2011 og síðar.
• Hafa sýnt umtalsverðar framfarir á sl. 12 mánuðum, sem sjáist m.a. á árangri á skákmótum ársins, hækkun skákstiga og reglulegri þjálfun.
• Hafa sýnt virkni í skákmótum innanlands.

2.     Ungir skákmenn (25 ára og yngri) hafa forgang þegar kemur að úthlutun ferðastyrkja. Eftirfarandi börn og unglingar njóta sérstaks forgangs:

• Undir 12 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 12-16 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 16-20 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 20-25 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)

3.     Alþjóðlegir meistarar geta fengið ferðastyrki frá SÍ óháð aldri.

4.     Þeir sem þiggja stórmeistaralaun geta ekki fengið almenna ferðastyrki frá SÍ.

5.     Aðrir skákmenn geta fengið ferðastyrki ef þeir ná árangri sem samsvarar 2350 stigum eða meira ("performance") í móti sem styrkur er sóttur um. Ákvörðun um styrkveitingu er tekin eftir mót.

Umsóknareyðublöð og skil 

Allir sem sækja um styrk til SÍ þurfa að leggja fram umsókn á þar til gerðu rafrænu eyðublaði.

Rafræna eyðublaðið

Þar á að koma fram hvers vegna tiltekið skákmót er valið og hvers vegna viðkomandi telur að hann hafi rétt á styrk frá SÍ skv. ofangreindum skilyrðum.

Í umsókninni skal lögð fram æfingaáætlun þar sem þjálfun fyrir tiltekið mót og þátttaka á skákmótum næstu 3 mánuði er skýrð.

Ef umsókn er ófullnægjandi og ekki skilað á þann hátt sem að ofan greinir, er henni sjálfkrafa vísað frá. 

Styrkir SÍ eru afgreiddir þrisvar sinnum á ári. 10. febrúar, 10. júní og 10. október. Sækja þarf um styrkina í lok mánaðarins á undan. Ætlast er til að sótt sé um styrki áður en haldið er mót en ef góðar aðstæður valda því að sótt er um eftir á er tekið tillit til þess.

Sérstök styrkjanefnd, skipuð af stjórn SÍ, fer yfir allar umsóknir og gerir tillögur til stjórnar um afgreiðslu styrkja hverju sinni. 

Að jafnaði getur enginn fengið meira en 60.000 krónur á ári í styrk frá SÍ, nema þegar hann er fulltrúi Íslands á alþjóðlegum mótum erlendis. Ef einhver þykir skara sérstaklega fram úr á sl. 12 mánuðum er þó hægt að gera undantekningu á þessari reglu og hækka árlegan styrk til viðkomandi aðila. 

Skyldur styrkþega gagnvart SÍ: 

Að loknu móti skulu styrkþegar senda stutta frásögn til styrkjanefndar og skýra skák frá mótinu sem þeir hlutu styrk til að taka þátt í. Styrkjanefnd mun síðan birta greinina í einhverjum miðli skákhreyfingarinnar.

Ef stjórn SÍ fær áreiðanlegar upplýsingar um ósæmilega og vítaverða hegðun styrkþega á skákstað (t.d. áfengisnotkun á meðan á móti stendur) og ef styrkþegi hættir á skákmóti án löglegra forfalla, mun viðkomandi vera sviptur þeim styrk sem honum var veittur. Viðkomandi mun auk þess ekki koma til greina við úthlutun styrkja SÍ næstu 12 mánuði.

Styrkir eru borgaðir út eftir að skákmóti lýkur, þegar ljóst er að skyldur styrkþega hafa verið uppfylltar.

Allt uppbókað í Sturlubúðir, skákbúðir Fjölnis um næstu helgi

Öll 40 plássin í Sturlubúðum, skákbúðum Fjölnis helgina 1.-2. febrúar, eru nú uppbókuð og aðeins hægt að skrá sig á biðlista. Dagskrá skákbúðanna er mjög spennandi en þar skiptist á skákkennsla og frjáls tími í frábæru umhverfi Útilífsmiðstöðvarinnar að Úlfljótsvatni. Gist verður eina nótt og boðið upp á kvöldvöku á laugardegi. Síðasti liður á dagskrá sunnudagsins verður Nóa - Síríus skákmótið.

Sælgætisgerðin gefur alla vinninga auk þess að gefa þátttakendum skákbúðanna glaðning á kvöldvökunni. Fjölniskrakkar voru duglegastir og fljótastir að skrá sig í skákbúðirnar enda nýtur Skákdeild Fjölnis stuðnings Gúmmívinnnustofunnar Skipholti sem greiðir 75% af þátttökugjaldi Fjölniskrakka.

Með stuðningi við Skákdeild Fjölnis vill Grafarvogsbúinn Sturla Pétursson minnast afa síns og alnafna sem á löngum skákferli kom að þjálfun barna og unglinga. Sturla yngri telur barna-og unglingastarf Skákdeildar Fjölnis mjög í anda afa síns. Lagt verður af stað í Sturlubúðir með rútu á laugardagsmorgni kl. 10:00 frá Umferðarmiðstöðinni og þátttakendur sem það kjósa verða teknir upp í N1 við Ártúnshöfða.

Róbert sigraði á Friðriksmótinu í Vin

Róbert Lagerman sigraði á bráðskemmtilegu og vel skipuðu Friðriksmóti, sem Vinaskákfélagið og Hrókurinn stóðu að á mánudag í tilefni af Skákdegi Íslands. Róbert hlaut 5,5 vinning af 6 mögulegum og varð sjónarmun á undan Lenku Ptacnikova sem fékk vinninga. Í þriðja sæti varð Gunnar Freyr Rúnarsson.

Friðrik Ólafsson, fyrsti stórmeistari Íslendinga, varð 79 ára á sunnudag og var Skákdagur Íslands nú haldinn í þriðja sinn honum til heiðurs. Sjálfur er meistarinn staddur í Berlín ásamt konu sinni, en góður hópur kom saman í Vin á mánudag og þar var sannarlega teflt í anda hins sókndjarfa meistara.

Kristjana Guðmundsdóttir Motzfeldt var heiðursgestur mótsins og lék fyrsta leikinn í skák Gunnars Björnssonar og Lenku, eftir setningarávarp Halldóru Pálsdóttur verkefnastjóra í Vin. Keppendur voru fjórtán en ýmsir góðir gestir lögðu leið sína í Vin til að fylgjast með. Í þeim hópi voru m.a. Jóhann Hjartarson stórmeistari og stigahæsti skákmaður Íslands og Hrannar Björn Arnarsson fv. forseti SÍ.

Róbert hlaut í sigurlaun gjafabréf fyrir tvo í Þjóðleikhúsið, Lenka hreppti metsölubókina ,,Læknirinn í eldhúsinu" og Gunnar Freyr fékk í sinn hlut ,,Ár drekans", hina pólitísku spennusögu Össurar Skarphéðinssonar. Þá fékk hinn ungi og efnilegi Gauti Páll Jónsson bókina ,,Eldur" í verðlaun, en Gauti var hársbreidd frá því að komast á verðlaunapall.

Í leikhléi var að vanda boðið upp á gómsætar veitingar. Góður andi ríkti á þessu móti, einsog jafnan í Vin. Þar eru æfingar alla mánudaga klukkan 13, en teflt er í Vin á hverjum degi. Þar eru allir hjartanlega velkomnir.

Myndaalbúm (HJ) 

Sóley Lind og Nansý Davíðsdóttir Íslandsmeistarar stúlkna

 

 

Íslandsmót stúlkna fór fram í húsnæði Skáksambandsins og Skákskólans á sjálfan Skákdag Íslands, 26. janúar sl. Teflt var í þremur flokkur, eldri flokki (8.-10. bekkur), yngri flokki (1.-7. bekkur) og peðaskák. Sóley Lind Pálsdóttir sigraði í eldri flokki eftir harða baráttu, Nansý  Davíðsdóttir í yngri flokki mjög örugglega og Sólveig Bríet í peðaskákinni. Á Skákdaginn iðaði Faxafenið af lífi og teflt í nánast öllum rýmum!

Eldri flokkur - metþátttaka!

 

 

Tíu stúlkur tóku þátt í eldri flokki sem er metþátttaka. Þar tapaði Sóley Lind Pálsdóttir fljótlega fyrir Hildi Berglindi Jóhannsdóttir en fór eftir í það í mikið stuð og vann allar skákir sem eftir voru.

Það dugði til að komast fremst í mark með 8 vinninga í 9 skákum. Hildur Berglind og Ásta Sóley Júlíusdóttir urðu jafnar með 7 vinninga en Hildur hafði annað sætið eftir stigaútreikning.

Lokastaðan:

• 1. Sóley Lind Pálsdóttir 8 v. af 9
• 2. Hildur Berglind Jóhannsdóttir 7 v.
• 3. Ásta Sóley Júlísdóttir 7 v.
• 4.-6. Tara Sóley Mobee, Sólrún Freygarðsdóttir og Sigrún Linda Baldursdóttir 5 v.
• 7. Sonja María Friðriksdóttir 4 v.
• 8. Freyja Dögg Delecva 3 v.
• 9. Dóra Valgerður Óskarsdóttir 1 v.
• 10. Tinna Björk Rögnvaldsdóttir 0 v.

Yngri flokkur - Nansý með yfirburði

 

 

Það kom engum á óvart að Nansý skyldi vinna með yfirburðum. Hún vann allar sínar skákir, sjö talsins, og flestar nokkuð örugglega. Önnur með 5½ vinning varð Svava Þorsteinsdóttir og þriðja varð Freyja Birkisdóttir með 4½ vinning.

Lokastöðuna má nálgast á Chess-Results.

Peðaskákin

 

 

Fimm ungar skákstelpur tóku þátt í peðaskákinni. Þar hlaut Sólveig Bríet fullt hús vinninga og nafna hennar Sólveig Freyja varð önnur með 3 vinninga.

Allir keppendur mótsins voru leystir út með skákbókum! Landsliðsmaðurinn Hjörvar Steinn Grétarsson og Donika Kolica aðstoðuðu við verðlaunaafhendingu.

Skákdagurinn

 

 

Segja má að Faxafenið hafi iðað af skáklífi. Mótið í yngri flokknum fór fram í Skákskólasalnum, eldri flokkurinn fór fram á skrifstofu SÍ og peðaskákin í anddyrinu. Í húsnæði Taflfélags Reykjavíkur fór svo fram sjöunda umferð Skákþings Reykjavíkur.  Þessu til viðbótar tefldu Guðmundur Gíslason og Halldór Grétar Einarsson flýtta skák í Nóa Síríus mótinu og Hjörvar Steinn var með Vigni Vatnar í einkatíma. Kom þá rishæð Skáksambandsins sér vel!

 

 

Skáksambandið leggur áherslu á stelpuskák á árinu og er þátttakan í þessum mótið gleðiefni. Um næstu helgi hefst svo stelpunámskeið í Skákskólanum þar sem þegar er komin þónokkur skráning sem stendur enn yfir.

 

 

Mótshaldið var í höndum Stefáns Bergssonar og Gunnars Björnssonar.

Myndaalbúm (SSB og GB)

Meistaramót Skákfélags Sauðárkróks

Meistaramót Skákfélags Sauðárkróks hefst á morgun, þriðjudaginn 28. janúar, í Safnahúsinu á Sauðárkróki kl 20:00. Tefldar verða 5 umferðir og verða þær tefldar næstu þriðjudaga. Mótinu líkur undir lok febrúarmánaðar. Teflt verður eftir tímamörkunum 90 mín + 30 sek. Hægt er að skrá sig til leiks í netfanginu [e-mail] Æskilegt er að slíkt sé gert með fyrirvara.

Hjáseta verður leyfð í einni af þremur fyrstu umferðunum. Tilkynning um slíkt verður að berast fyrir röðun næstu umferðar.

Mótið verður reiknað til íslenskra og alþjóðlegra skákstiga og teflt verður eftir skákreglum FIDE.

Á mótinu verður teflt með nýjum stafrænum skákklukkum sem Sparisjóður Skagafjarðar hefur fært klúbbnum að gjöf.

Helgi Ólafsson tefldi fjöltefli á Skákdaginn í Borgarnesi.

Á skákdaginn tefldi Helgi Ólafsson klukkufjöltefli við 11 manns á Hyrnutorgi í Borgarnesi. Helgi vann tíu skákir og gerði eitt jafntefli en því náði Bjarni Sæmundsson.

Urðu úrslitin eftirfarandi:

• 1.  Róbert Mar Jónsson 0
• 2.  Arnar Leó Helgason 0
• 3.  Elínóra Ýr Kristjánsdóttir 0
• 4.  Ingibergur Valgarðsson 0
• 5.  Valgarð Ingibergsson 0
• 6.  Bjarni Sæmundsson ½
• 7.  Finnur Ingólfsson 0
• 8.  Tinna Kristín Finnbogadóttir 0
• 9.  Elsa María Kristínardóttir 0
• 10.Sæmundur Bjarnason 0
• 11.Unnar Þór Bachmann0