Skákþáttur Morgunblaðsins: Síðasta skák Friðriks við Bobby Fischer

Létt var yfir mönnum við opnun Fischer-seturs á Selfossi þann 11. júlí sl. Sameinað átak Gunnars Finnlaugssonar, Aldísar Sigfúsdóttur, Magnúsar Matthíassonar og Sigfúsar Kristinssonar gerði þessa framkvæmd mögulega. Fischer-setrið er staðsett á annarri hæð gamla Landsbankahússins. Safnið á eftir að vaxa og dafna og þarna verður jafnframt aðstaða fyrir skákfélagið á Selfossi. Meðal gesta við opnunina voru ráðherrarnir Illugi Gunnarsson og Sigurður Ingi Jóhannsson. Sá síðarnefndi fann sterka samsvörun milli útlaganna Bobby Fischers og Grettis sterka Ásmundarsonar: „Báðir áttu sína Gláma að glíma við

- og báðir áttu trausta vini," sagði hann meðal annars.

Guðni Ágústsson, sem vart lýkur upp munni án þess að nefna Gunnar á Hlíðarenda, talaði síðastur og tókst auðvitað að spyrða kappana saman. Guðni glettist góðlátlega við vini sína úr kjördæminu, taldi augljóst að draugur nokkur, sem lengi hefði leikið lausum hala í Flóanum, myndi hafa ýtt á „send-takkann" þegar tölvupósturinn frægi fór af stað úr tölvu Bjarna bóksala; Ólafur Helgi sýslumaður væri landskunnur fyrir dálæti sitt á hljómsveit sem hann mundi að vísu ekki hver var en kom ekki að sök þar sem öðrum var ljóst að hér var átt við The Rolling Stones. Friðrik Ólafsson talaði um kynni sín af Fischer og færði setrinu að gjöf skorblöð af nokkrum skákum þeirra. Þeir tefldu samtals 12 skákir, þar af ellefu á tímabilinu 1958-'62. Friðrik vann þá fyrstu með glæsibrag en eftir það hallaði undir fæti og heildarniðurstaðan var 9:3, Fischer í vil. Fischer var afar beittur kóngspeðsmaður og Friðrik var með svart í sjö síðustu skákum þeirra. Hann ræddi síðustu viðureignina sem fram fór á Ólympíumótinu í Havana árið 1966, við rannsóknir eftirá taldi Fischer peðsfórn Friðriks í byrjun tafls ekki mikils virði, hann sá við brellum Friðriks undir lokin, vann sannfærandi sigur og hlaut 15 vinninga af 17 mögulegum á 1. borði fyrir Bandaríkin. En Friðrik átti sín tækifæri í þessari skák og kannski fyrr en keppendur hugðu:

Bobby Fischer - Friðrik Ólafsson

Spænski leikurinn

1. e4 e5 2. Rf3 Rc6 3. Bb5 a6 4. Ba4 Rf6 5. O-O Rxe4

Á Piatigorsky-mótinu fyrr um árið hafði Fischer átt í basli gegn opna afbrigði spænska leiksins í skákum við Bent Larsen og Wolfgang Unzicker.

6. d4 b5 7. Bb3 d5 8. dxe5 Be6 9. c3 Be7 10. Bc2 Bg4

Upphafið að athyglisverðri peðsfórn. Seinni tíma þróun byggð á skákum Kortsnojs gerði ráð fyrir leikjum á borð við 10. ... Dd7 og - Hd8.

11. h3 Bh5 12. g4 Bg6 13. Bb3 Ra5?!

Best var 13. ... Rc5! - „Houdini". Eftir 14. Bxd5 kemur 14. ... Dd7! með góðum færum og 14. Dxd5 er svarað með 14. ...Ra5.

14. Bxd5 c6 15. Bxe4 Bxe4 16. Dxd8+ Hxd8 17. Rbd2 Bd5 18. He1 h5 19. Re4 hxg4 20. hxg4 Rc4?!

Betri reitur fyrir riddarann var á b7 og 20. ... b4 kom einnig til greina.

21. Kg2! Be6 22. b3 Rb6 23. Be3 Rd5 24. Kg3 f6

Friðrik hafði litlar bætur fyrir peðið og þessi leikur bætir ekki úr skák.

25. Bc5! f5 26. Rd6+ Bxd6

Skárra var 26. ... Kd7.

27. exd6 Kd7 28. Re5 Kc8 29. Rxc6 f4 30. Kg2 Re3+!

Byggir á hugmyndinni 31. fxe3 Bd5+ o.s. frv. En Fischer hafði séð þetta fyrir.

31. Kg1! Bd5 32. Re7+ Kd7 33. fxe3 Hh1+ 34. Kf2 Hh2+ 35. Kf1 Bf3 36. Rg6 Be4 37. Re5+

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 21. júlí 2013

Skákþættir Morgunblaðsins

[Event "Havana ol final Rd: 3"] [Site "Havana ol final Rd: 3"] [Date "1966.??.??"] [EventDate "?"] [Round "?"] [Result "1-0"] [White "Robert James Fischer"] [Black "Fridrik Olafsson"] [ECO "C83"] [WhiteElo "?"] [BlackElo "?"] [PlyCount "73"] 1. e4 e5 2. Nf3 Nc6 3. Bb5 a6 4. Ba4 Nf6 5. O-O Nxe4 6. d4 b5 7. Bb3 d5 8. dxe5 Be6 9. c3 Be7 10. Bc2 Bg4 11. h3 Bh5 12. g4 Bg6 13. Bb3 Na5 14. Bxd5 c6 15. Bxe4 Bxe4 16. Qxd8+ Rxd8 17. Nbd2 Bd5 18. Re1 h5 19. Ne4 hxg4 20. hxg4 Nc4 21. Kg2 Be6 22. b3 Nb6 23. Be3 Nd5 24. Kg3 f6 25. Bc5 f5 26. Nd6+ Bxd6 27. exd6 Kd7 28. Ne5+ Kc8 29. Nxc6 f4+ 30. Kg2 Ne3+ 31. Kg1 Bd5 32. Ne7+ Kd7 33. fxe3 Rh1+ 34. Kf2 Rh2+ 35. Kf1 Bf3 36. Ng6 Be4 37. Ne5+ 1-0

Margfalt afmælismót í Vin á mánudaginn!

Vinaskákfélagið við Hverfisgötu býður til mikils verðlaunamóts, mánudaginn 29. júlí klukkan 13. Tefldar verða 6 umferðir með 7 mínútna umhugsunartíma og eru allir hjartanlega velkomnir.

Mótið er haldið til að fagna sameiginlegu 145 ára afmæli þriggja liðsmanna Vinaskákfélagsins. Róbert Lagerman, forseti félagsins, á afmæli nú á mánudaginn og nýverið fögnuðu afmælum  tveir af hinum knáu fastamönnum Vinaskákfélagsins, Hjálmar Sigurvaldason og Hörður Jónasson. 

Þá er því líka fagnað um þessar mundir að 10 ár eru síðan skákstarf hófst í Vin. Í júní 2003 var Vinaskákfélagið stofnað og efnt til fyrsta meistaramótsins. Þar sigraði kempan Jón Torfason, en hann afsalaði sér titlinum til Rafns Jónssonar sem varð í 2. sæti.

Æfingar og skákviðburðir í Vin skipta hundruðum á síðustu 10 árum, og Vinaskákfélagið tekur virkan þátt í skáklífinu á Íslandi og sendi í vetur tvær sveitir til keppni á Íslandsmóti skákfélaga.

Skákáhugamenn eru hvattir til að mæta í Vin á morgun, mánudag, og taka þátt í skemmtilegu móti í góðum félagsskap. Í leikhléi verður að vanda boðið upp á gómsætar veitingar. 

Héðinn með jafntefli við Tönju í lokaumferðinni

Stórmeistarinn Héðinn Steingrímsson (2557) gerði jafntefli við indversku skákdrottninguna Tania Sadchev (2430) í níundu og síðustu umferð Andorra Open sem fram fór í morgun. Guðmundur Kjartansson (2444) tapaði hins vegar fyrir alþjóðlega meistaranum Bryan Macias (2298) frá Ekvador.

Héðinn hlaut 6,5 vinning og endaði í 9.-17. sæti (12. á stigum) en Guðmundur hlaut 5,5 vinning og endaði í 32.-51. sæti (34. sæti á stigum.

Frammistaða Héðins samsvaraði 2457 skákstigum en frammistaða Guðmundar samsvaraði 2384 skákstigum. Báðir lækka þeir á stigum. Héðinn um 6 stig en Guðmundur um 4 stig.

Úkraínski stórmeistarinn Andrey Vovk (2567) sigraði á mótinu en hann hlaut 7,5 vinning.

Alls taka 178 skákmenn frá 20 löndum þátt í mótinu. Þar af eru 16 stórmeistarar og 14 alþjóðlegir meistarar. Héðinn er nr. 9 í stigaröð keppenda en Guðmundur er nr. 22.

• Heimasíða mótsins
• Chess-Results
• Beinar útsendingar - 4 skákir (hefjast kl. 13:30 eða 14:00)

Hannes vann í lokaumferðinni - góður árangur íslenskra skákmanna

Stórmeistarinn  Hannes Hlífar Stefánsson (2522) vann þýska alþjóðlega meistarann Sebastian Plischiki (2413) í níundu og síðustu umferð Czech Open sem fram fór í Pardubice í dag. Hjörvar Steinn Grétarsson (2511) og Dagur Arngrímsson (2384) gerðu báðir jafntefli. Hjörvar við tékkneska alþjóðlega meistarann Vojtech Rojicek (2413) og Dagur við Barbara Jaracz (2270) sem er tékkneskur stórmeistari kvenna. 

Íslenskum skákmönnum gekk heilt yfir afar vel og alls hækkuðu 8 af þeim 11 sem höfðu alþjóðleg stig á stigum.

A-flokkur:

• Hannes hlaut 6 vinninga og endaði í 13.-37. sæti (22.)
• Hjörvar hlaut 5,5 vinning og endaði í 38.-66. sæti (59.)
• Dagur hlaut 4,5 vinning og endaði í 99.-137. sæti (102.)

Stórmeistarinn Liviu-Dieter Nisipeanu (2670), Rúmeníu, og Mikhailo Olekseinko (2568), úkraínskur TR-ingur, sigruðu á mótinu en þeir hlutu 7,5 vinning.

Frammistaða Hannesar samsvaraði 2551 stigi, frammistaða Hjörvars samsvaraði 2407 stigum og frammistaða Dags samsvaraði 2393 skákstigum. 

Hannes og Dagur hækka á stigum. Hannes hækkar um 4 stig en Dagur um 1 stig. Hjörvar lækkar um 11 stig. 

B-flokkur: 

Dagur Ragnarsson (2020), Oliver Aron Jóhannesson (2015) og Jón Trausti Harðarson unnu í lokaumferðinni, Nökkvi Sverrisson (2041) gerði jafntefli en Mikael Jóhann Karlsson (2029) tapaði.

Mikael og Nökkvi hlutu 5,5 vinning, Dagur og Oliver hlutu 5 vinninga og Jón Trausti hlaut 4,5 vinning.

Mikael hækkar um 39 stig, Jón Trausti um 31 stig, Nökkvi um 23 stig og Dagur um 20 stig. Oliver lækkar lítisháttar eða um 8 stig.

D-flokkur:

Heimir Páll Ragnarsson (1406) og Felix Steinþórsson (1488) unnu en Dawid Kolka (1669) gerði jafntefli.

Dawid hlaut 5 vinninga en Felix og Heimir Páll hlutu 4,5 vinning.

Heimir hækkar um 49 stig, Felix um 25 stig en Dawid lækkar um 3 stig.

E-flokkur

Steinþór Baldursson vann og hlaut 5 vinninga.

238 skákmenn frá 35 löndum tefla í efsta flokki. Þar af eru 46 stórmeistarar og 63 alþjóðlegir meistarar. Hannes er nr. 24 í stigaröð keppenda, Hjörvar er nr. 29 og Dagur er nr. 89. Hámarksstig í b-flokki eru 2400 skákstig og þar taka 235 skákmenn þátt. Íslensku skákmennirnir eru nr. 96-192 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 13)
• Myndaalbúm (Steinþór Baldursson)

Henrik vann í fyrstu umferð

Politiken Cup hófst í Helsingör í Danmörku í dag. Tveir íslenskir skákmenn taka þátt að þessu sinni. Annars vegar stórmeistarinn Henrik Danielsen (2510) og hins vegar Hilmir Freyr Heimisson (1690). Henrik vann í dag stigalágan andstæðing (1935) en Hilmir tapaði í dag fyrir stigahærri andstæðingi (2126).

Á morgun eru tefldar tvær umferðir og enn verður stigamunur mikill á milli keppenda. Umferðir morgundagsins hefjast kl. 7 og 14.

Alls taka 309 skákmenn frá 26 löndum þátt í mótinu. Þar af er 21 stórmeistari og 11 alþjóðlegir meistarar. Henrik er nr. 17 í stigaröð keppenda og Hilmir er nr. 247.

• Heimasíða mótsins
• Chess-Results
• Beinar útsendingar (hefjast flestar kl. 11)

 

Héðinn vann í næstsíðustu umferð - Guðmundur með jafntefli við sterkan stórmeistara

Stórmeistarinn Héðinn Steingrímsson (2557) vann FIDE-meistarann Lenin Guerra Tulcan (2372) frá Ekvador í áttundu og næstsíðustu umferð Andorra Open sem fram fór í dag. Guðmundur Kjartansson (2444) gerði jafntefli við argentínska stórmeistarann Fernando Peralta (2622).

Héðinn hefur 6 vinninga og er í 7.-13. sæti. Guðmundur hefur 5,5 vinning og er í 14.-31. sæti.

Stórmeistararnir Maxim Rodshtein (2641), Ísrael, Andrey Vovk (2567), Úkraínu, Renier Vazquez (2571) og Marc Narsico (2536), Spáni, og Eduardo Iturrizaga (2643), Venesúela ásamt hinum titillausa Frakka Eric Gaudineu (2358) eru efstir og jafnir með 6,5 vinning.

Í lokaumferðinni, sem fram fer í fyrramálið, teflir Héðinn við indversku skákdrottninguna Tania Sadchev (2430) og Guðmundur við alþjóðlega meistarann Bryan Macias (2298) frá Ekvador.

Alls taka 178 skákmenn frá 20 löndum þátt í mótinu. Þar af eru 16 stórmeistarar og 14 alþjóðlegir meistarar. Héðinn er nr. 9 í stigaröð keppenda en Guðmundur er nr. 22.

• Heimasíða mótsins
• Chess-Results
• Beinar útsendingar - 4 skákir (hefjast kl. 13:30 eða 14:00)

Caruana, Kramnik og Meier unnu í fyrstu umferð

Ofurmótið í Dortmund hófst í dag. Caruana (2796), Kramnik (2784) og Meier (2610) unnu allir í fyrstu umferð  sem fram fór í dag.

Caruana vann Andrejkin (2727) og er nú kominn upp í  2800 skákstig á lifandi listanum. Kramnik, sem hefur unnið Dortmund-mótið alls 10 sinnum (!!) vann Wang Hao (2752) eftir að sá síðarnefndi lék af sér heilum hrók í verri stöðu og Meier vann landa sinn Naiditsch (2710). Hinum tveimur skákunum lauk með jafntefli.

Þátt taka 10 skákmenn í mótinu og þar af sex alþjóðlegar stjörnur. Hin fjögur sætin fylla svo þýskir landsliðsmenn.

• Heimasíða mótsins 
• Beinar útsendingar (hefjast kl. 13)

Hjörvar og Dagur með jafntefli

Alþjóðlegu meistararnir Hjörvar Steinn Grétarsson (2511) og Dagur Arngrímsson (2384) gerðu báðir jafntefli í áttundu og næstsíðustu umferð Czech Open sem fram fór í dag. Hjörvar við tékkneska alþjóðlega meistarann Neklan Vyskocil (2374) og Dagur við Rússann Saveliy Golubov (2242). Hannes Hlífar Stefánsson (2522) tapaði fyrir rússneska alþjóðlega meistaranum Bogdan Belykov (2430).

A-flokkur:

Hannes og Hjörvar hafa 5 vinninga en Dagur hefur 4 vinninga.

Stórmeistarinn Liviu-Dieter Nisipeanu (2670) er efstur með 7 vinninga.

Í níundu og síðustu umferð, sem fram fer á morgun, teflir Hannes við þýska alþjóðlega meistarann Sebastian Plischiki (2413), Hjörvar við tékkneska alþjóðlega meistarann Vojtech Rojicek (2413) og Dagur við Barbara Jaracz (2270) sem er tékkneskur stórmeistari kvenna.

B-flokkur: 

Mikael Jóhann Karlsson (2029), Nökkvi Sverrisson (2041) og Oliver Aron Jóhannesson (2015) gerðu jafntefli en Dagur Ragnarsson (2020) og Jón Trausti Harðarson (1899) töpuðu.

Mikael hefur 5,5 vinning, Nökkvi hefur 5 vinninga, Dagur og Oliver hafa 4 vinninga og Jón Trausti hefur 3,5 vinning.

D-flokkur:

Dawid Kolka (1669) vann en Heimir Páll Ragnarsson (1406) og Felix Steinþórsson (1488) gerðu jafntefli.

Dawid hefur 4,5 vinning en Heimir og Felix hafa 4 vinninga.

E-flokkur

Steinþór Baldursson tapaði og hefur 4 vinninga.

238 skákmenn frá 35 löndum tefla í efsta flokki. Þar af eru 46 stórmeistarar og 63 alþjóðlegir meistarar. Hannes er nr. 24 í stigaröð keppenda, Hjörvar er nr. 29 og Dagur er nr. 89. Hámarksstig í b-flokki eru 2400 skákstig og þar taka 235 skákmenn þátt. Íslensku skákmennirnir eru nr. 96-192 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 13)
• Myndaalbúm (Steinþór Baldursson)

Guðmundur vann í sjöundu umferð

Alþjóðlegi meistarinn Guðmundur Kjartansson (2444) vann Skotann Andrew Green (2160) í sjöundu umferð Andorra Open sem fram fór í dag. Stórmeistarinn Héðinn Steingrímsson (2557) gerði jafntefli við franska alþjóðlega meistarann Jean-Noel Riff (2427). Báðir hafa þeir 5 vinninga og eru í 11.-30. sæti.

Stórmeistararnir Maxim Rodshtein (2641), Ísrael, Andrey Vovk (2567), Úkraínu, Renier Vazquez (2571), Spáni, og Eduardo Iturrizaga (2643), Venesúela eru efstir og jafnir með 6 vinninga.

Áttunda og næstsíðasta umferð fer fram á morgun. Þá teflir Guðmundur við argentíska stórmeistarann Fernando Peralta (2622) og Héðinn við FIDE-meistarann Lenin Guerra Tulcan (2372) frá Ekvador.

Alls taka 178 skákmenn frá 20 löndum þátt í mótinu. Þar af eru 16 stórmeistarar og 14 alþjóðlegir meistarar. Héðinn er nr. 9 í stigaröð keppenda en Guðmundur er nr. 22.

• Heimasíða mótsins
• Chess-Results
• Beinar útsendingar - 4 skákir (hefjast kl. 13:30 eða 14:00)

Hraðskákkeppni taflfélaga - skráningarfrestur rennur út 31. júlí

Hraðskákkeppni taflfélaga, hefst venju samkvæmt eftir verslunarmannahelgi. Þetta er í nítjánda sinn sem keppnin fer fram en Víkingaklúbburinn er núverandi meistari. Í fyrra og hitteðfyrra tóku 18 lið í keppninni sem er met.

Íslensk skákfélög eru hvött til að taka þátt.

Reglur keppninnar eru hér að neðan.

Teflt er eftir útsláttarfyrirkomulagi.    

Dagskrá mótsins er sem hér segir

• Forkeppni (ef meira en 16 lið taka ) - skuli vera lokið eig síðar en 10. ágúst
• 1. umferð (16 liða úrslit): Skuli vera lokið eigi síðar en 20. ágúst
• 2. umferð (8 liða úrslit): Skuli vera lokið eigi síðar en 31. ágúst
• 3. umferð (undanúrslit): Skulu fara fram fimmtudaginn 5. september kl. 20
• 4. umferð (úrslit): Skulu fara fram sunnudaginn 8. september kl. 14

Umsjónaraðili getur heimilað breytingar við sérstakar aðstæður.    

Skráning til þátttöku rennur út 31. júlí nk. Skráning fer fram á Skák.is.

Reglur keppninnar:

1.      Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2.      Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3.      Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4.      Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5.      Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.

6.      Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

7.      Heimalið bjóði upp á léttar veitingar, t.d. kaffi, gos, kökur eða kex.

8.      Viðureignirnar skulu fara fram innan 100 km. radíus (max 1-1,5 klst. ferðalag) frá Reykjavík nema að félög komi sér saman um annað.

9.      Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10.  Úrslit keppninnar verða ávallt aðgengileg á heimasíðu Hellis, www.hellir.blog.is, sem er heimasíða keppninnar, og á www.skak.is.

11.  Mótshaldið er í höndum Taflfélagsins Hellis sem sér um framkvæmd mótsins.