Skemmtikvöld ungmenna á laugardaginn

Skákskólinn og Skákakademían standa fyrir skemmtikvöldi ungmenna fædd 1990-1999 á laugardagskvöldið kemur. Kvöldið fer fram á sal Skákskólans.

Á kvöldinu verða tveir merkilegir fyrirlestrar ásamt hraðskákmóti í Heilinn og höndin þar sem tveir stórmeistarar munu tefla!

Sjónvarpsstjarnan og skemmtikrafturinn Björn Þorfinnsson hefur einna mestu reynslu Íslendinga af taflmennsku á opnum erlendum mótum síðustu tvo áratugina. Björn hefur teflt ansi víða og hefur verið lúnkinn við að finna skemmtileg erlend mót þar sem  hægt er að hækka á stigum og njóta taflmennskunnar í botn.

Að mörgu þarf að hlúa þegar farið er á erlend mót; gisting, flug, aðstæður á mótsstað, möguleikar á að hækka á stigum, veðurfar og fleira.

Frá öllu þessu og ferðum sínum mun Björn segja frá á léttan og ljúfan hátt.

Árangur Hjörvars Steins þarf lítið að kynna, en hvað nákvæmlega liggur að baki? Hversu marga klukkutíma stúderaði hann sjálfur þegar hann var fimtán ára, hafði hann kvóta á þeim hraðskákum sem hann tefldi, hvað fór hann oft erlendis að tefla á hverju ári, hefur hann haldið sig við sömu byrjanir síðan hann var lítill, leggur hann áherslu á hreyfingu og hollt líferni?

Hjörvar mun í snaggaralegum fyrirlestri fara yfir staðreyndir frá sínum ferli allt til þess að efnileg ungmenni viti hvað þarf til að bæta sig í skák og á hvað skal leggja áherslu.

Að loknum fyrirlestrum verða veitingar og svo hraðskákmót í Heilinn og höndin.

Húsið opnar  19:30 og fyrirlestrar hefjast 20:00.

Aðgangseyrir 1000kr. Skráning á FB-síðu kvöldsins eða á [e-mail]

Öll meðferð áfengis bönnuð.

Stefán sigraði á þriðjudagsæfingu Breiðabliks

Stefán Bergsson (2093) sigraði á þriðjudagsæfingu Breiðabliks sem fram fór í gær. Hann hlaut 8 vinninga í 9 skákum. Örn Leó Jóhannsson (2005) og Magnús K. Sigurjónsson (1815) urðu í 2.-3. sæti með 7 vinninga

Allar Breiðabliksæfingar eru reiknaðar til alþjóðlegra hraðskákstiga sem koma út mánaðarlega.

Lokastaða mótsins á Chess-Results.

Valdimar sigraði hjá Ásum í dag

Sjaldan hefur verið barist af meiri einurð hjá Ásum í Stangarhyl en í dag enda bikar og verðlaunapeningar í húfi þar sem Æsir héldu haustmót sitt. Þegar upp var staði var það kempan Valdimar Ásmundsson sem hreppti efsta sætið með 7 vinninga, jafn honum að vinningum var svo Ari Stefánsson en Þorsteinn K Guðlaugsson endaði í 3 sæti með  6,5 vinninga. Tefldar voru 9 umferðir og ekki gefið eftir fyrr en fullreynt var, ekki munaði nema 1,5 vinning á efsta manni og þeim sjötta.

Myndaalbúm (ESE)

Mótstaflan

 

 

 

Íslandsmótið í Víkingaskák 2013

Minningarmótið um Magnús Ólafsson - Íslandsmótið í Víkingaskák 2013 fer fram í húsnæði knattspyrnufélagsins Víkings í Víkinni miðvikudaginn 27. nóvember kl. 19.30. Tefldar verða 7 umferðir með 15 mínútna umhugsunartíma. Mótið eru öllum opið og það kostar ekkert að vera með. Boðið verður upp á kaffi ásamt léttum veitingum án endurgjalds.

Nauðsynlegt er að skrá sig til leiks til að tryggja þátttöku. Þátttakendur eru hvattir til að skrá sig í tölvupósti á netfangið Víkingaklubburinn(hjá)gmail.com, eða senda sms á Gunnari Fr. gsm; 8629744. Veitt verða sérstök veðlaun fyrir efstu sætin, auk þess sem sérstök veðlaun fyrir besta árangur kvenna, unglinga og öldunga. 

Þegar hafa þrjár konur skráð sig til leiks á mótið og í fyrsta skipti er keppt í B-flokki (Áskorendaflokki), fyrir þá keppendur sem eru stigalausir eða eru að tefla Víkingaskák í fyrsta skipti.

Núverandi Íslandsmeistari er Tómas Björnsson og skákstjóri á mótinu verður Haraldur Baldursson.

Reglurnar í Víkingaskák má nálgast hér:
Úrslit á Íslandsmótinu í Víkingaskák 2012 má sjá hér:
Úrslit á Íslandsmótinu í Víkingaskák 2011 má sjá hér:
Úrslit 2010 hér:
Úrslit 2009 hér:

Nökkvi efstur á Skákþingi Vestmannaeyja

Nú er öllum frestuðum skákum lokið í Skákþinginu og á miðvikudagskvöld verður tefld lokaumferð mótsins og hefst hún stundvíslega kl. 19:30. Ljóst er að fresta verður skák Einars og Ægi Páls og verður hún líklega tefld á fimmtudag eða föstudag. 

Ef tveir verða efstir og jafnir verður telft til úrslita með sömu tímamörkum og eru í mótinu. Ef þrír verða jafnir verður teflt mót og ræður dregin töfluröð litum. Um önnur verðlaunasæti gilda SB stig en ef þau nægja ekki verður teflt um röðina 15 mínútur með skiptum litum.

7. umferð

Sigurjón - Stefán 
Sverrir - Nökkvi
Einar - Ægir Páll
Karl Gauti situr yfir

staðan

1. Nökkvi 4,5 af 5
2. Ægir Páll 3,5 af 5
3. Sverrir 3,5 af 5
4. Sigurjón 3 af 5
5. Stefán 1,5 af 5
6. Einar 1 af 5
7. Gauti 1 af 6

• Heimasíða TV
• Chess-Results

Skákæfing hjá Breiðabliki í kvöld

Skákæfing hjá Skákdeild Breiðabliks í kvöld Mæting  kl 19:45 og hraðskákmótið byrjar stundvíslega kl 20:00 !

Átta umferða hraðskákmótið (5mín + 2sek) verður reiknað til FIDE hraðskákstiga eins og öll þriðjudagsmótin í vetur!

Allir velkomnir ókeypis í einn glæsilegasta skáksal landsins óháð því í hvaða taflfélagi þeir eru.

Æfingin er í Stúkunni við Kópavogsvöll (3ju hæð). Gengið inn um kjallarahæð bakatil. Húsið opnar kl 19:30.

Kastljósið: "Stórkostlegasti svíðari skáksögunnar"

Magnus Carlsen, nýbakaður heimsmeistari í skák verður tuttugu og þriggja ára á laugardaginn. Hann tapaði ekki skák í heimsmeistaraeinvíginu og hafði ekki einu sinni með sér aðstoðarmenn.

Norðmenn eru allt í einu búnir að uppgötva hann, töfl eru uppseld í Osló og Carlsen farinn að sinna fyrirsætustörfum. Tími undrabarna í skáklistinni er sem sagt ekki liðinn eins og Björn Þorfinnsson og Jóhanna Björg Jóhannsdóttir fóru yfir í Kastljósi kvöldsins.

Kastljós-þáttinn má nálgast hér.

Jón Kristinn sigraði á Skylduleikjamóti

Í gær fór fram skylduleikjamót hjá SA með umhugsunartímanum 5 mínútur á leik +3 sekúndur. Á slaginu eitt voru 8 keppendur mættir og tefldu þeir allir við alla. 

Tefldir voru 7 mismunandi gambítar, einn í hverri umferð og þökkum við Símoni Þórhallssyni fyrir gott val á gambítum. Eftir harða baráttu, endaði eins og svo oft áður, Jón Kristinn efstur og fékk hann 6 vinninga. Í öðru sæti varð Hjörleifur Halldórsson með 5 1/2 vinning. Í þriðja sæti varð svo Sigurður Eiríksson með 4 vinninga.

 

 

 

 

 

 

 

 

Lokastaða mótsins:

• Jón Kristinn Þorgeirsson 6
• Hjörleifur Halldórsson 5 1/2
• Sigurður Eiríksson 4
• Símon Þórhallsson 3 1/2
• Andri Freyr Björgvinsson og Sveinbjörn Sigurðsson 3
• Karl Egill Steingrímsson 2
• Logi Rúnar Jónsson 1

Hraðkvöld GM Hellis i kvöld

Skákfélagið GM Hellir heldur hraðkvöld mánudaginn 25. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Spennan magnast í heimsmeistaraeinvíginu

„Er þetta kannski einn af þessum stórkostlegu leikjum danska stórmeistarans? hugsaði ég," skrifaði gamli heimsmeistarinn Botvinnik örlítið háðskur í skýringum við skák sem hann tefldi við Bent Larsen árið 1967 í Palma á Mallorca. Á einum punkti hafði hann úr að velja fleiri en eina vinningsleið. Þetta var mjög gott ár hjá Larsen og hann var þá helsta von Vesturlanda og Norðurlanda eins eins og Magnús Carlsen í dag. Heimsmeistarinn Anand gæti hafa spurt sig þessarar sömu spurningar á meðan þriðja einvígisskák hans við Magnús stóð yfir. Ónákvæmni og linkulega tefld byrjun héldust í hendur og ýmsir spámenn voru farnir að efast um að Norðmaðurinn ungi hefði yfirleitt nokkuð fram að færa með hvítu sem hefur hingað til verið talið nauðsynlegt á þessum vettvangi. Hann náði þó jafntefli eftir talsverða erfiðleika. Kannski er hann hættulegri með svörtu því að í fjórðu skákinni sló hann Anand út af laginu með bíræfnu peðsráni sem minnti á hinn fræga leik Fischers í 1. skákinni við Spasskí, 29. ... Bxh2.

„Forskot Magnúsar Carlsen liggur ekki á sviði byrjana," sagði Garrí Kasparov, nýkominn til Chennai. Anand sá hinsvegar til þess að Garrí karlinn fengi ekki að sitja á fremsta bekk og vangaveltur voru uppi að þessi FIDE-forsetaframbjóðandi hefði orðið að kaupa sér aðgöngumiða þegar hann mætti á keppnisstað í Chennai sl. miðvikudag.

4. einvígisskák:

Wiswanathan Anand - Magnús Carlsen

Spænskur leikur

1. e4 e5 2. Rf3 Rc6 3. Bb5 Rf6 4. O-O Rxe4 5. d4 Rd6 6. Bxc6 dxc6 7. dxe5 Rf5 8. Dxd8+ Kxd8

Berlínar-vörnin er í vopnabúri Magnúsar. Svartur hefur ýmsar leiðir til að skipa liði sínu fram. Ýmsir hafa haldið því fram að þessi byrjun hafi velt Kasparov úr sessi sem heimsmeistara í HM-einvíginu við Kramnik árið 2000.

9. h3 Bd7 10. Hd1 Be7 11. Rc3 Kc8 12. Bg5 h6 13. Bxe7 Rxe7 14. Hd2 c5 15. Had1 Be6 16. Re1 Rg6 17. Rd3 b6 18. Re2?

Ónákvæmni. Magnús hafði teflt byrjunina hratt og Anand á það enn til að tefla of hratt!

- Sjá stöðumynd -

18. ...Bxa2!

Minnir óneitanlega á hinn fræga leik Fischers. Munurinn er sá að biskupinn sleppur út.

19. b3 c4! 20. Rdc1 cxb3 21. cxb3 Bb1 22. f4 Kb7 23. Rc3 Bf5 24. g4 Bc8

Aftur á heimareit eftir „peðsránið". Svartur á góða möguleika að þróa þessa stöðu til vinnings en Anand hefur meira rými.

25. Rd3 h5 26. f5 Re7 27. Rb5 hxg4 28. hxg4 Hh4 29. Rf2 Rc6 30. Hc2 a5 31. Hc4 g6 32. Hdc1 Bd7 33. e6 fxe6 34. fxe6 Be8 35. Re4! Hxg4+ 36. Kf2 Hf4+ 37. Ke3 Hf8

37. ... g5 var betra og svartur á nokkra vinningsmöguleika.

38. Rd4 Rxd4 39. Hxc7+ Ka6 40. Kxd4 Hd8+ 41. Kc3

Betra var 41. Ke3 og staðan má heita í jafnvægi.

41. ... Hf3+ 42. Kb2 He3 43. Hc8 Hdd3 44. Ha8+ Kb7 45. Hxe8 Hxe4 46. e7 Hg3 47. Hc3 He2+ 48. Hc2 Hee3 49. Ka2 g5 50. Hd2 He5 51. Hd7+ Kc6 52. Hed8 Hge3 53. Hd6+ Kb7 54. H8d7 Ka6 55. Hd5 He2+ 56. Ka3 He6!

Jafnteflið er auðfengið nái hvítur að skipta upp á hrókum en Magnús hefur náð að magna flækjustigið. Hér leggur hann lævísa gildru fyrir Anand, 57. Hxg5 er svarað með 57. ... b5! og vinnur vegna hótunarinnar 58. ... b4+.

57. Hd8 g4 58. Hg5 Hxe7 59. Ha8+ Kb7 60. Hag8 a4 61. Hxg4 axb3 62. H8g7! Ka6 63. Hxe7 Hxe7 64. Kxb3

Jafntefli! B-peð svarts er hættulaust. Staðan 2:2. Frábær barátta.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 17. nóvember 2013

Skákþættir Morgunblaðsins