Guðmundur vann í 2. umferð í Hastings

Alþjóðlegi meistarinn Guðmundur Kjartansson (2326) vann enska skákmanninn John Sugden (2180)í 2. umferð Hastings-mótsins sem fram fór í dag.  Guðmundur hefur 1 vinning.   Í þriðju umferð, sem fram fer á morgun, teflir hann við Englendinginn Adrian Pickersgill (1990).

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)
  

Daði Ómarsson sigraði með yfirburðum á Jólahraðskákmóti TR

Hart var barist á fjölmennu og sterku Jólahraðskákmóti TR í gær - þó ekki um fyrsta sætið, því Daði Ómarsson var í fantaformi; búinn að tryggja sér sigur fyrir síðustu umferð og vann síðan mótið með fullu húsi. Því meiri var baráttan um annað sætið en sex voru jafnir með einn og hálfan vinning niður, þegar níunda og síðasta umferð hófst. Hlutskarpastur þar varð hinn ungi og bráðefnilegi Vignir Vatnar Stefánsson og skaut þar með mörgum hraðskákareynsluboltanum aftur fyrir sig eins og sjá má á meðfylgjandi lokaröð. Í 3. sæti varð svo Arnaldur Loftsson sem hafði betur í innbyrðis viðureign við bróður sinn Hrafn, í síðustu umferðinni.

• 1   Daði Ómarsson                               9      
•  2-3  Vignir Vatnar Stefánsson             6.5     
•       Arnaldur Loftsson                           6.5     
•   4   Jóhann Ingvason                           6       
• 5-11  Hrafn Loftsson                             5.5    
•       Páll Andrason                                 5.5    
•       Birkir Karl Sigurðsson                     5.5    
•       Örn Leó Jóhannsson                      5.5    
•       Guðmundur K. Lee                         5.5    
•       Vilhjálmur Pálmason                       5.5     
•       Kristján Örn Elíasson                      5.5    
• 12-15 Eggert Ísólfsson                          5       
•       Jon Olav Fivelstad                          5       
•       Jón Úlfljótsson                                5       
•       Gauti Páll Jónsson                         5       
• 16-17 Kristófer Ómarsson                    4.5    
•       Atli Jóhann Leósson                       4.5    
• 18-22 Elsa María Kristínardóttir            4       
•       Sigurlaug R. Friðþjófsdóttir             4       
•       Leifur Þorsteinsson                        4       
•       Áslaug Kristinsdóttir                       4       
•       Hilmir Hrafnsson                            4       
•  23   Hilmir Freyr Heimisson                3.5    
• 24-27 Donika Kolica                            3      
•       Björgvin Kristbergsson                  3       
•       Óskar Long Einarsson                  3      
•       Arnar Ingi Njarðarsson                  3      
•  28   Mikael Kravchuk                         2.5     
•  29   Pétur Jóhannesson                    1.5     
•  30   Bjarki Arnaldarson                    0      

Myndir væntanlegar

Mikael Jóhann yfirjólasveinn SA

Jólahraðskákmót SA var háð í gærkveldi. Tíu jólasveinar mættu til leiks og tefldu tvöfalda umferð. Sigurvegarinn leyfði aðeins tvö jafntefli og vann mótið með fáheyrðum yfirburðum. Hann hlaut að launum vænan flugeldapakka sem gæti komið að góðum notum á gamlaárskvöld.

Lokastaðan:

• 1. Mikael Jóhann Karlsson       17
• 2. Áskell Örn Kárason              13,5
• 3. Jón Kristinn Þorgeirsson      12
• 4.-5. Tómas Veigar Sigurðarson og
• Sigurður Arnarson                    10
• 6. Sigurður Eiríksson                  9
• 7. Haki Jóhannesson                 8
• 8. Andri Freyr Björgvinsson       4,5
• 9. Karl E Steingrímsson             3,5
• 10. Ari Friðfinnsson                    2,5

Næsta stórmót í Skákheimilinu verður nýjársmótið alkunna. Það hefst kl. 14 á nýjársdag.

Volcano mótið á gamlársdag

Á gamlársdag fer fram hið árlega Volcano skákmót í Vestmannaeyjum, en þetta mót er 4 ára gamalt og hefur verið haldið í samstarfi við Volcano veitingahúsið í Vestmannaeyjum.  Að venju eru allir velunnarar félagsins velkomnir og hefst það kl. 13:00 á veitingastaðnum Volcano við Strandveg í Vestmannaeyjum.  Verðlaun verða pizzuúttektir á veitingastaðnum og fleira.

Nánari upplýsingar um mótið má finna á heimasíðu TV.  Þar er einnig spáð í framtíðina með völvu félagsins!

Heimasíða TV

Guðmundur tapaði fyrir Wang Yue í fyrstu umferð

Alþjóðlegi meistarinn Guðmundur Kjartansson (2326) tapaði fyrir kínverska stórmeistaranum Wang Yue (2697) í fyrstu umferð alþjóðlega mótsins í Hasting sem fram fór í gær.  

Í 2. umferð sem nú er í gangi teflir Guðmundur við Englendinginn John Sugden (2180). 

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)
  

Skákmót dagsins: Íslandsmótið í netskák og Gallerý Skák

Það eru "aðeins" tvö skákmót í dag.   Fyrra skákmót dagsins fer fram í Gallerý Skák og byrjar kl. 18.  Það síðara er sjálft Íslandsmótið í netskák sem fram fer á ICC og hefst kl. 20.  Bæði mótinu eru opin öllum.   

Nánar má lesa um mótin á neðangreindum slóðum:

• Jólaskákmót Gallerý Skákar - hefst kl. 18 (upplýsingar um mótið neðst í texta)
• Íslandsmótið í netskák - hefst kl. 20 (fer fram á ICC - skráning á Skák.is)

Sigurður Herlufsen sigraði á Jólaskákmóti Riddarans

RIDDARINN - skákklúbbur eldri borgara á StórHafnarfjarðarsvæðinu - efndi  til glæsilegs jólaskákmóts síns í gær, miðvikudaginn 28. desember nk. í Strandbergi, safnaðarheimili Hafnarfjarðarkirkju.  Góð þátttaka var í mótinu og kristilegur andi sveif yfir vötnunum, þó ekki á taflborðunum sjálfum þar sem engir miskunnsamir Samverjar reyndust vera  meðal keppenda sem gáfu mótherjum sínum engin grið, heldur þvert á móti reyndu að hnésetja þá með alls kyns fléttum og bellibrögðum.  

Skákmótið var sett með klukknahljómi mótbjöllunnar,  en í leikhléi las Sr. Gunnþór Þ. Ingason, verndari klúbbsins, tvo jólaljóð, annað eftir Jóhannes úr Kötlum en hitt frumort, sem jók á hátíðleikablæinn. Í framhaldi þar af var aldursforseti virkra félaga klúbbsins, Sverrir Gunnarsson, skipasmíðameistari, senn 85 ára, sleginn til heiðurriddara af Einar S. Einarssyni, erkiriddara (formanni), en Sverrir er einn af stofnfélögum klúbbsins, afi Sverris Þorgeirssonar, sem er dóttursonur þess gamla. 

Þegar yfirlauk eftir 11 umferða taflmennsku kom í ljós að hinn einstaklega sigursæli  og trausti skákmaður Sigurður A. Herlufsen hafði skotið öllum öðrum ref fyrir rass og trónaði einn í efsta sæti með 8.5 vinninga, en þeir Jóhann Örn Sigurjónsson, Jón Þ. Þór og Friðgeir Hólm jafnir í 2.-4.sæti með 7.5 v, örlítill stigamunur réði röð.  Mótið var tiltölulega jafnt og bræðabyltur tíðar.

Veglegir jólapakkar voru í verðlaun í JÓLAKAPPINU auk bóka frá Urði Bókaútgáfu.  Jafnframt verða dregnir út góðir vinningar í JÓLAHAPPINU sem efnt var til í mótslok en Jói Útherji og Halldór skósmiður í Grímsbæ og fleiri sáu  til þess að enginn fór í jólaköttinn.

 

 

Nánar á www.galleryskak.net

Myndaalbúm (ESE)

Henrik í 1.-4. sæti í Kaupmannahöfn

Stórmeistarinn Henrik Danielsen (2542) fékk 1½ vinning í þeim tveimur umferðum sem voru tefldar í kvöld á CXU-nýársmótinu í Kaupmannahöfn.  Henrik hefur 3½ vinning eftir 4 umferðir og er efstur ásamt þremur öðrum.  Í fyrri skák dagsins gerði hann jafntefli við Mads Hansen (2213) en í þeirri síðari vann hann Nicolai Kvist Brondt Pedersen (2123). 

Á morgun mætir hann FIDE-meistaranum Per Andreasen (2251).   Skákin hefst kl. 18 og er sýnd beint á vefsíðu mótsins.

Henrik er næststigahæstur keppenda á eftir Jonny Hector (2573). 

• Heimasíða mótsins (beinar útsendingar)
• Mótstafla

 

Brekkusniglar unnu Hverfakeppni SA

Hin árlega hverfakeppni Skákfélagsins var háð í gær, 27. desember. Nú var, líkt og í fyrra, telft í tveimur sveitum og skipuðu sér saman í sveit íbúar utan Glerár, ásamt eyrarbúum. Aðrir, er sunnan árinnar búa (á Brekku og í Innbæ) skipuðu svo hina sveitina. Báðar virtust sveitirnar þéttar við fyrstu sýn enda var hart barist og drengilega á 10 borðum. Fyrst voru tefldar tvær 15 mínútna skákir. Eftir fyrri umferð höfðu Brekkubúar/innbæingar nauma forystu, en spýttu í lófa í þeirri síðari og unnu samanlagt 12,5-7,5. Úrslit á einstökum borðum urðu sem hér segir, (liðsmenn Þorpsins/Eyrarinnar taldir fyrst):

• Smári Ólafsson-Rúnar Sigurpálsson                             1-0       0-1
• Tómas Veigar Sigurðarson-Áskell Örn Kárason            0-1       0-1
• Sigurður Eiríksson-Mikael Jóhann Karlsson                   0-1       0-1
• Hjörleifur Halldórsson-Jón Kristinn Þorgeirsson            0-1       ½-½
• Ari Friðfinnsson-Haki Jóhannesson                               ½-½     ½-½
• Eymundur Eymundsson-Andri Freyr Björgvinsson         1-0       0-1
• Kári Arnór Kárason-Karl Egill Steingrímsson                  1-0       1-0
• Logi Rúnar Jónsson-Atli Benediktsson                          0-1       0-1
• Hersteinn Bjarki Heiðarsson-Bragi Pálmason                1-0       1-0
• Hjörtur Snær/Birkir Freyr-Þorgeir Smári Jónsson          0-1       0-1
• Þorpið/Eyrin-Brekkan/Innbærinn                         4,5-5,5    3-7

Þá var tekið til við hraðskák og tefld bændaglíma á 10 borðum. Tefla þá allir liðsmenn eina skák við hvern í liði andstæðinganna, alls 10 skákir. Hélt sigurganga Brekkusnigla og Fjörulalla áfram og unnu þeir allar umferðir nema eina. Þar munaði mest um þá Rúnar og Jón Kristin, sem unnu allar sínar skákir, 10 talsins.  Bestum árangri Þorpara og Eyrarpúka náðu feðgarnir Sigurður og Tómas og fengu 5½ vinning. Alls náðu sigurvegararnir 63½ vinningi gegn 36½ vinningi andstæðinganna. Hafa þeir síðarnefndu nú heilt ár til að sleikja sár sín og brýna kutana. Úrslit hverfakeppninnar 2012 eru því með öllu óráðin.

Nú er skammt stórra högga á milli hjá akureyrskum skákmönnum þar sem sjálft Jólahraðskákmótið verður háð í kvöld, 28. desember og hefst kl. 20.

Guðmundur mætir Wang Yue í Hastings

Mótið í Hastings hefst í dag.  Meðal þátttakenda er Guðmundur Kjartansson (2326).  Guðmundur ræðst ekki á garðinn þar sem hann er lægstur en hann mætir stigahæsta keppenda mótsins, kínverska stórmeistaranum Wang Yue (2697) í fyrstu umferð.  Umferðin hefst kl. 14:15 og verður skák Guðmundar sýnd beint.

• Heimasíða mótsins 
• Beinar útsendingar