Viðtöl við Nataf og Bromann

Indverjinn Vijay Kumar hefur skilað af sér meira efni. Hér má sjá viðtal við Nataf og Bromann.

Efnilegur stúlknahópur á Fjölnisæfingum

Skákæfingar Fjölnis á laugardögum hafa verið mjög vel sóttar. Að jafnaði eru um 20 - 30 krakkar á hverri æfingu. Mjög efnilegur og áhugasamur stúlknahópur er að koma upp að nýju innan skákdeildarinnar og hafa þær vakið athygli á mótum undanfarið, eins og Íslandsmóti grunnskólasveita stúlkna og Metrómóti Fjölnis.

Stelpurnar sem hafa verið undir handarjaðri Sigríðar Bjargar Helgadóttur mæta reglulega tvisvar í viku á æfingar í Rimaskóla á vegum skólans Skákakademíu Reykjavíkur og Skákdeildar Fjölnis og er stutt í að þær fari að hafa í fullu tré við eldri krakka á Fjölnisæfingum.Næsta verkefni þeirra er að taka þátt í skákmóti Árnamessu í Stykkishólmi þann 14. mars n.k.

MP: Hannes, Henrik og Guðmundur með góða sigra

Það gekk afar vel hjá íslensku skákmönnunum í fjórðu umferð MP Reykjavíkurskákmótsins sem fram fór snemma dags í dag en taflmennskan hófst kl. 9.    Morgunstund virtist gefa íslensku skákmönnunum gull í mund!  Hannes Hlífar Stefánsson sigraði undrabarnið frá Perú, yngsta stórmeistara heims, Jorge Cori, og Henrik Danielsen sigraði hinn sterka sænska stórmeistara Tiger Hillarp Persson.    Guðmundur Gíslason átti úrslit dagsins en hann sigraði hinn sterka bandaríska stórmeistara Aleksander Lendermann, sem er aðeins 18 ára og þykir einn efnilegasti skákmaður Bandaríkjanna.   Hannes og Henrik eru í 2.-6. sæti en efstur með fullt hús er danski alþjóðlegi meistarinn Thorbjörn Bromann sem hefur komið verulega á óvart og vann nú bosníska stórmeistarann Ivan Sokolov.    

 

Síðari umferð dagsins hefst kl. 15:30 en þetta er í fyrsta sinn í 46 sögu Reykjavíkurskákmótanna að tvær umferðir eru tefldar sama daginn.   Margeir Pétursson, stórmeistari, verður þá með skákskýringar og hefjast þær um kl. 18.    

 

Í umferð dagsins mætast m.a.: Baklan - Bromann, Hannes - Henrik, Guðmundur Gíslason - Nils Grandelius og Tiger Hillarp Persson - Bragi Þorfinnsson.  

 

MP Reykjavíkurskákmótinu fylgja ýmsir hliðarviðburðir.   Síðar í kvöld verður boðið upp Reykjavík Open Pub Quis sem hefst kl. 21 á Laugvegi 3 þar sem skákáhugamenn geta spreytt sig á skákspurningum.   Enginn aðgangseyrir.     Börnin fá líka sín tækifæri til að tefla.   Á morgun verður svo Reykjavík Barna Blitz þar sem 16 af sterkustu skákbörnum borgarinnar tefla til úrslita.  Það er Skákakademía Reykjavíkur sem stendur fyrir mótinu og verður sigurvegarinn krýndur hraðskákmeistari Reykjavíkur í barnaflokki. 

• Heimasíða mótsins
• Skákirnar í beinni
• Chess-Results
• Myndaalbúm mótsins

Henrik sigraði Tiger!

Það streyma að góð úrslit í fjórðu umferð MP Reykjavíkurmótsins og svo virðist sem það henti íslenskum skákmönnum vel að vakna snemma!  Henrik Danielsen sigraði hinn sterka sænska stórmeistara Tiger Hilarp Persson og er hópi skákmanna sem hafa 3,5 vinning.    Nú fer að sjá fyrir endann á fjórðu umferð en skákmenn eru hvattir til að fjölmenna í fimmtu umferð sem hefst kl. 15:30.  Margeir Pétursson verður með skákskýringar um kl. 18.

 

• Heimasíða mótsins
• Skákirnar í beinni
• Chess-Results
• Myndaalbúm mótsins

Hannes sigraði undrabarnið frá Perú!

Hannes Hlífar Stefánsson sigraði undrabarnið frá Perú í fjórðu umferð í vel tefldri skák og er nú kominn í hóp allra efstu manna með 3,5 vinning.   

Svo má geta þess að Sigurlaug R. Friðþjófsdóttir sigraði eiginmanninn Jóhann H. Ragnarsson í uppgjöri þeirra hjóna!

Fjórða umferð er í fullum gangi og skák- og skákáhugamenn hvattir til að fjölmenna á skákstað í dag!  

• Heimasíða mótsins
• Skákirnar í beinni
• Chess-Results
• Myndaalbúm mótsins

Guðmundur Gíslason sigraði Lendermann!

Guðmundur Gíslason sigraði hinn unga og efnilega bandaríska stórmeistara Aleksander Lenderman í fjórðu umferð MP Reykjavíkurmótsins.  Frábær úrslit hjá Guðmundi sem hefur byrjað sérdeilis vel.  Skákina má skoða hér sem og aðrar skákir sem einnig eru sýndar beint en fjórða umferð er sem stendur í fullum gangi.

Fimmta umferð hefst svo kl. 15:30.   

• Heimasíða mótsins
• Skákirnar í beinni
• Chess-Results
• Myndaalbúm mótsins

Reykjavík Open Chess Pub Quis

Það er ekki bara teflt á MP Reykjavíkurskákmótinu heldur er alls konar skemmtilegir hliðarviðburðir.  Einn þeirra er í kvöld en þá fer fram Reykjavík Open Chess Pub Quis í annað skipti en skákspurningakeppni fór fram í fyrsta skipti í fyrra og sló í gegn.  Keppnin í fyrra varð m.a. til þess að  ítalskir keppendur sem tóku þátt kóperuðu hugmyndina og héldu slíka keppni einnig í kringum alþjóðlegt skákmót á Ítalíu!

Það er Sigurbjörn Björnsson, FIDE-meistari og skákbókasali sem semur spurningarnar.   Spurningakeppnin fer fram í bar Samtakanna 78 á Laugavegi 3, hefst kl. 9 og er öllum skák- og skákáhugamönnum velkomið að taka þátt.

Reykjavík Barna Blitz á dagskrá á morgun í Ráðhúsinu

Í tengslum við Reykjavík Open 2010 munu sterkustu skákkrakkar höfuðborgarsvæðisins etja kappi í hraðskák sunnudaginn 28. febrúar. Sextán keppendur munu hefja leik á Reykjavík - Barnzblitz 2010. Teflt verður í tveimur riðlum og munu sigurvegarar riðlanna tefla um gullið. Jafnframt verður teflt um bronsið. Veglegir vinningar verða í boði fyrir þrjá efstu keppendurna - bikarar og skákbækur frá Sigurbirni Björnssyni bóksala. Taflið hefst klukkan 12:30 í Ráðhúsi Reykjavíkur.
 
Reykjavík Barnablitz er eitt stærsta krakkamót ársins en yfir 100 krakkar tóku þátt í undanrásum hjá taflfélögunum í Reykjavík. Það er Skákakademía Reykjavíkur sem heldur mótið í samvinnu við taflfélög borgarinnar.   Keppendalisti:  

• Jón Trausti Harðarson
• Kristinn Andri Kristinsson
• Dagur Ragnarsson
• Kristófer Jóel Jóhannesson
• Gauti Páll Jónsson
• Vignir Vatnar Stefánsson
• Róbert Leó Jónsson
• David Kolka
• Friðrik Daði Smárason
• Veronika Steinunn Magnúsdóttir
• Hildur Berglind Jóhannsdóttir
• Donika Kolica
• Jóhann Arnar Finnsson
• Leifur Þorsteinsson
• Fannar Skúli Birgisson
• Dagur Logi Jónsson

MP Reykjavík Open: Fjórða umferð hefst kl. 9

Fjórða umferð MP Reykjavíkurskákmótsins hefst kl. 9 í dag í Ráðhúsinu.  Sem fyrr eru margar spennandi viðureignir í gangi og má þar nefna Dronavalli - Baklan, Bromann - Sokolov, Henrik - Hillarp Persson og Jorge Cori - Hannes.  

Skákskýringar hefjast kl. 11:30 en þær verða í dag í umsjón Helga Ólafssonar stórmeistara og landsliðsþjálfara. 

Einnig er hægt að benda á beinar útsendingar frá mótinu á Chess.is.   Þar eru átta skákir sýnd beint úr hverri umferð.  Ávallt sex efstu borðin og þess fyrir utan tvær valdar viðureignir, að þessu skákir undrabarnsins frá Perú, Jorge Cori, og Hannesar og Lendermens og Guðmundar Gíslasonar.   

Síðari umferð dagsins hefst kl. 15:30.  Þá mun Margeir Pétursson sjá um skákskýringar (um kl. 18) og rétt er að benda á Reykjavík Open Chess Pub Quis sem fram fer í kvöld kl. 21 og er öllum opið.  Nánar kynnt á Skák.is síðar í dag.

• Heimasíða mótsins
• Skákirnar í beinni
• Chess-Results
• Myndaalbúm mótsins

Atkvöld hjá Helli á mánudagskvöld

Taflfélagið Hellir heldur atkvöld mánudaginn  1. mars 2010 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun. Teflt er í félagsheimili Hellis í Álfabakka 14a í Mjóddinni. 

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).