Snorri gerði jafntefli við stórmeistara

Snorri Bergsson (2304) gerði jafntefli við makedónska stórmeistarann Milan Drasko (2479) í fimmtu umferð Belgrade Trophy sem fram fór í dag.   Jón Árni Halldórsson (2196) sigraði í sinni skák en Sigurður Ingason (1887) gerði jafntefli við mun stigahærri andstæðing.  Snorri hefur 3½ vinning og er 25.-52. sæti, Jón Árni hefur 3 vinninga og er í 53.-88. sæti og Sigurður hefur 2½ vinning og er í 89.-119. sæti. 

285 skákmenn taka þátt í mótinu og þar af 20 stórmeistarar.   Snorri er nr. 45 í stigaröð keppenda, Jón nr. 71 og Sigurður nr. 154.

Heimasíða mótsins

Skákþáttur Morgunblaðsins: Magnús Carlsen dregur sig úr heimsmeistarakeppninni

Í byrjun þessa mánaðar barst FIDE yfirlýsing frá „norska undrinu“ Magnúsi Carlsen þess efnis að hann hygðist ekki nýta sér þátttökurétt sinn í áskorendakeppninni. Til höfðu verið kvaddir átta stórmeistarar sem áttu að tefla um réttinn til að skora á heimsmeistarann Anand. Magnús lét þess getið að heimsmeistarakeppnin, eins og hún væri rekin, gengi þvert á hugmyndir sínar um sanngjarnt keppnisfyrirkomulag. Hann nefndi að engum dytti í hug veita Spánverjum, heimsmeisturunum í knattspyrnu, þann rétt að mæta á HM eftir fjögur ár til þess eins að „verja“ titilinn í úrslitaleik keppninnar.

FIDE brást við með því að tilnefna Rússann Alexander Grischuk í stað Magnúsar og þátttakendur í áskorendaeinvígjunum, sem hefjast á næsta ári, koma því allir frá gömlu Sovétlýðveldunum að frátöldum Venselin Topalov. En knattspyrnutenging Magnúsar er athyglisverð. Sá munur er á heimsmeistarakeppni FIDE og FIFA, að styrkur knattspyrnunnar liggur í því að allar aðildarþjóðirnar eiga þess kost að vera með frá byrjun. Og í eina tíð virtu menn í hvívetna fyrirkomulag heimsmeistarakeppninnar í skák sem samanstóð af svæðamótum, millisvæðamótum og áskorendaeinvígjunum. Því kerfi var varpað fyrir róða eigi alls fyrir löngu og þar var Kasparov ekki lítill áhrifavaldur. Sú spurning vaknar hvort Magnús hefði tekið þessa ákvörðun ef FIDE-kosningarnar í Khanty Manyisk hefðu farið á annan veg. Yfirlýsing hans er talin áfall fyrir Kirsan, nýkjörinn forseta FIDE.

Af Magnúsi er það að segja að eftir að hafa unnið „Perlu-mótið“ í Nanjing í Kína á dögunum stefndi hann skónum til Moskvu en á fimmtudaginn lauk minningarmótinu um Tal með heimsmeistaramótinu í hraðskák. Eftir æsispennandi keppni þar sem 20 skákmenn tefldu tvöfalda umferð varð Armeninn Aronjan hlutskarpastur, hlaut 24 ½ v. af 38 mögulegum. Aserinn Radjabov kom næstur með 24 v. og Magnús varð í 3. sæti með 23 ½.

Í aðalmótinu, sem fram fór í stórversluninni GUM sem stendur við Rauða torgið, tefldu tíu skákmenn og þar var niðurstaðan þessi:

1. – 3. Karjakin, Aronjan, Mamedyarov 5 ½ v. (af 9) 4. – 6. Grischuk, Nakamura og Wang Hao 5 v. 7. Kramnik 4 ½ v. 8. Gelfand 3 ½ v. 9. Shirov 3 v. 10. Eljanov 2 ½ v.

Besti Rússinn, Vladimir Kramnik sem hefur heitið því að endurheimta heimsmeistaratitilinn náði sér ekki á strik og tapaði m.a. fyrir Karjakin sem nú er genginn í lið með Rússum eftir að hafa teflt fyrir Úkraínu.

Sergei Karjakin – Vladimir Kramnik

Petroffs-vörn

1. e4 e5 2. Rf3 Rf6 3. Rxe5 d6 4. Rf3 Rxe4 5. Rc3 Rxc3 6. dxc3 Be7 7. Be3 O-O 8. Dd2 Rd7 9. O-O-O Re5 10. h4 c6 11. c4 Be6 12. Rg5 Bf5 13. Kb1 He8 14. f3 h6 15. Be2!? d5

Kramnik hafnar fórninni en besti kosturinn var sennilega að leika 15. ... hxg5 16. hxg5 Dd7 og svartur getur varist.

16. g4 Bg6 17. f4 dxc4

Eða 17. ... Rxc4 18. Bxc4 dxc4 19. Df2 Da5 20. f5 með sterkri sókn.

18. Dc3 Rd3 19. f5

Óvenjuleg staða. Hér er allt á tjá og tundri.

19. ... Bxg5 20. fxg6 Hxe3 21. gxf7+ Kf8 22. Dxc4 Hxe2 23. hxg5 Dxg5 24. Dxd3 De3 25. Dh7 De4 26. Dg8+ Ke7 27. Dxg7! Dxc2+ 28. Ka1 Hf8 29. Hhf1 Hd2 30. Hfe1+ He2 31. Dc3! Kxf7 32. Df3+

- og Kramnik gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 14. nóvember 2010.

Skákþættir Morgunblaðsins

Þröstur og Hjörvar mætast í úrslitum

Þröstur Þórhallsson og Hjörvar Steinn Grétarsson munu mætast í úrslitum Íslandsmótsins í atskák.   Það er ljóst eftir taflmennsku dagsins en í dag fór fram 8 manna úrslit og undanúrslit.   Þröstur vann Andra Áss Grétarsson 1,5-0,5 en Hjörvar Steinn vann landsliðsfélaga sinn frá Ólympíuskákmótinu 2-0.  

Ekki er ljóst hvenær úrslitin fara fram.

 

Róbert sigraði í dag

Róbert Lagerman (2271) vann Ungverjann Vaszilisz Metaxasz (2140) í fjórðu umferð Tenkes-mótsins sem fram fór í Harkany í Ungverjalandi.   Í gær tapaði hann fyrir ungverska stórmeistaranum Attila Czebe (2487).   Róbert hefur 2,5 vinning og er í 12.-27. sæti.

Í fimmtu umferð, sem fram fer á morgun, teflir Róbert við ungverska stórmeistarann Laszlo Gonda (2557), sem er næststigahæstur keppenda.  

Rússneski stórmeistarinn Konstantin Chernyshov (2579) er efstur með fullt hús.  

63 skákmenn taka þátt í mótinu og þar af 7 stórmeistarar.   Róbert er nr. 20 í stigaröð keppenda.   Róbert hefur sett myndir frá mótinu og má þær finna í myndaalbúmi.   Fleiri myndir væntanlegar frá Róberti.

• Heimasíða mótsins
• Swiss Master
• Myndaalbúm mótsins

 

 

Oliver Aron , Hrund og Vignir Vatnar unnu NETTÓ-bikarana á TORG-skákmóti Fjölnis

Mikil eftirvænting var meðal þeirra 46 grunnskólabarna sem settust að tafli á 6. TORG-skákmóti Fjölnis sem haldið var í verslunarmiðstöðinni Hverafold í Grafarvogi. Eftir að Gunnar Björnsson forseti skáksambandsins hafði leikið fyrsta leik mótsins fyrir Hilmi Hrafnsson efnilegan skákmann úr Grafarvogi þá hófst baráttan á hverju borði enda gátu flestir þátttakendur gert sér vonir um verðlaun sem voru 35 talsins.

Ungir skákmenn voru áberandi og setur það skemmtilegan svip á mótið. Teflt var í þremur flokkum, eldri flokk, fjölmennum stúlknaflokk og ennþá fjölmennari yngri flokk f. 2000 - 2004. Í öllum flokkum var hörð keppni um sigur enda öllum skákáhugamönnum  ljóst að breiddin í skákinni er til staðar á öllum aldursstigum grunnskólans. Þegar keppni lauk að loknum sex umferðum stóðu þeir efstir og jafnir að vinningum Oliver Aron Jóhannesson Rimaskóla og Birkir Karl Sigurðsson Salaskóla. Þeir gerðu innbyrðis jafntefli í 5. umferð en unnu alla aðra andstæðinga sína. Oliver Aron reyndist hærri á stigum og vann NETTÓ-bikarinn.

Í flokki stúlkna varð Hrund Hauksdóttir Rimaskóla efst líkt og í fyrra og hlaut 5 vinninga. Alls tefldu 14 stúlkur á mótinu og urðu þær Sóley Lind Pálsdóttir Hvaleyrarskóla og Nansý Davíðsdóttir Rimaskóla í næstu sætum.

Í yngri flokk sigraði skáksnillingurinn ungi Vignir Vatnar Stefánsson Hörðuvallaskóla. Hann hlaut 4,5 vinninga og að launum glæsilegan NETTÓ-bikar sem hann tók stoltur við enda fyrsti bikarinn hans en örugglega ekki sá síðasti. Vignir Vatnar hefur svo sannarlega sett mark sitt á TORG-mótin. Hæfileikar hans voru uppgötvaðir á TORG-skákmótinu 2009 og nú ári síðar sigrar hann glæsilega yngri flokk og vinnur sinn fyrsta bikar. Í öðru æti í yngri flokk varð annar stórefnilegur skákmaður, Jóhann Arnar Finnsson Rimaskóla sem tefldi mjög vel allar skákirnar.

Eins og áður kom fram unnu flestir þátttakendur til verðlauna auk þess sem NETTÓ Grafarvogi sá til þess að allir fengju ljúffengar veitingar í skákhléi. Skákstjórar voru þeir Helgi Árnason, formaður skákdeildar Fjölnis, Gunnlaugur Egilsson og Finnur Kr. Finnsson. Fjöldi foreldra og viðskiptavina Torgsins fylgdust með mótinu.

Skákdeild Fjölnis vill þakka fyrirtækjum í verslunarmiðstöðinni Hverafold fyrir frábæran stuðning við mótshaldið og þann velvilja sem skákdeildin finnur frá eigendum.

Eldri flokkur

• 1-2  Oliver Aron Jóhannesson   5,5   vinninga
•        Birkir Karl Sigurðsson
• 3     Hrund Hauksdóttir               5   vinninga
• 4     Rafnar Friðriksson            4,5  vinninga
• 5-8  Kristinn Andri Kristinsson     4  vinninga
•        Róbert Leó Jónsson
•        Gauti Páll Jónsson  
•        Gabríel Orri Duret

Stúlknaflokkur

 

• 1      Hrund Hauksdóttir               5 vinninga
• 2-3   Sóley Lind Pálsdóttir           4 vinninga
•         Nansý Davíðsdóttir
• 4      Svandís Rós Ríkharðsdóttir  3,5 vinninga
• 5-8   Elín Nhung                         3 vinninga
•         Tara Sóley Mobee
•         Sonja María Friðriksdóttir
•         Ásdís Birna Þórarinsdóttir

Yngri flokkur

 

• 1.    Vignir Vatnar Stefánsson     5 vinninga
• 2.    Jóhann Arnar Finnsson        4,5 vinninga
• 3-5  Dawid Kolka                       4  vinninga
•        Hilmir Hrafnsson
•        Heimir Páll Ragnarsson  

Myndaalbúm mótsins

 

Og þá eru eftir fjórir

Þröstur Þórhallsson, Bragi Þorfinnsson, Hjörvar Steinn Grétarsson og Andri Áss Grétarsson tefla í undanúrslitum Íslandsmótsins í atskák.   Þröstur vann Tómas Björnsson 1,5-0,5, Hjörvar vann Erling Þorseinsson 2-0 en Bragi og Andri þurftu bráðabana til að leggja andstæðinga sína þá Gunnar Björnsson og Guðmund Gíslason.   Fyrri skák undanúrslita er lokið og vann Hjörvar Braga en Andri og Þröstur gerðu jafntefli.

 

Jólaskákmót Bjargarinnar

Jólaskákmót Bjargarinnar fór fram í dag og mættu 8 keppendur galvaskir til leiks. Þar af var einn gestakeppandi Einar S. Guðmundsson sem hefur staðið með okkur í Hressum Hrókum eins og klettur frá upphafi og var honum veitt viðurkenning frá Hressum Hrókum fyrir frábærann stuðning. En svo að við snúum okkur að því sem skiptir mestu máli en það eru úrslitin á Jólamótinu

Efstur varð Einar S. Guðmundsson með 7 vinninga af 7 mögulegum ( gestakeppandi )
í öðru varð Pálmar Breiðfjörð ( gull ) með 6 vinninga af 7
í þriðja-fjórða ( silfur-brons ) urðu Emil Ólafsson & Kristinn H. Ólafsson með 4.5 vinninga af 7 mögulegum, því miður gafst ekki tími til þess að taka úrslitaskák um hvor fengi silfrið......
í fimmta sæti varð Guðmundur Ingi Einarsson með 3 vinninga af 7 mögulegum
í sjötta sæti varð Björgólfur Stefánsson með 2 vinninga af 7 mögulegum
Í sjöunda sæti varð Björn Þorvaldur Björnsson með 1 af 7 mögulegum
í áttunda sæti varð Heiðrún Ósk Magnúsdóttir með 0 af 7 mögulegum.

Síðan var dregin út happdrættisvinningur sem var gefinn af Gunnari Birni Björnssyni sem rekur námsaðstoðarfyrirtækið Algebra.is ( http://www.algebra.is ). Vinningurinn var gjafabréf upp á 3x 90 mínútna tíma og sá sem kom upp úr hattinum var enginn annar en formaður Hressu Hrókanna Emil Ólafsson.

Frábært mót að baki og allir voru mjög ánægðir enda fengu allir skákbók að gjöf sem voru gefnar af Skáksambandi Íslands.

Myndaalbúm mótsins

Og þá eru eftir átta

Átta skákmenn eru eftir á Íslandsmótinu í atskák sem framhaldið verður kl. 13 í dag.   Úrslit á mótinu hafa verið nokkuð hefðbundin, þ.e. hinir stigahærri hafa unnið hina stigalægri.   Þó bar til tíðinda í gær að Erlingur Þorsteinsson vann Sigurbjörn Björnsson og í 16 manna úrslitum.

Úrslit 1. umferðar:

 

1	Þröstur Þórhallsson	2435
2	Bragi Þorfinnsson	2405
3	Guðmundur Gíslason	2385
4	Sigurbjörn J. Björnsson	2355
5	Hjörvar Steinn Grétarsson	2260
6	Andri Grétarsson	2255	Skúli Bernhard Jóhannsson	0	2-0
7	Tómas Björnsson	2245
8	Þorvarður Fannar Ólafsson	2135	Atli Jóhann Leósson	1495	2-0
9	Gunnar Björnsson	2135	Oliver Aron Jóhannesson	1610	2-0
10	Erlingur Þorsteinsson	2070	Pétur Jóhannesson	1220	2-0
11	Jóhann Ingvason	2050	Björgvin Kristbergsson	1330	2-0
12	Kristján Örn Elíasson	1970	Csaba Daday	0	2-0
13	Vigfús Ó. Vigfússon	1915	Örn Leó Jóhannsson	1595	2-0
14	Siguringi Sigurjónsson	1790	Birkir Karl Sigurðsson	1600	2-1
15	Jón Úlfljótson	1755	Kristófer Jóel Jóhannesson	1200	2-0
16	Árni Thoroddsen	1640	Kristinn Andri Kristinsson	1330	1,5-0,5

 
Úrslit 2. umferðar:

 

1	Þröstur Þórhallsson	2435	Vigfús Ó. Vigfússon	1915	1,5-0,5
2	Bragi Þorfinnsson	2405	Kristján Örn Elíasson	1970	2-0
3	Guðmundur Gíslason	2385	Árni Thoroddsen	1640	2-0
4	Sigurbjörn J. Björnsson	2355	Erlingur Þorsteinsson	2070	1,5-2,5
5	Hjörvar Steinn Grétarsson	2260	Þorvarður Fannar Ólafsson	2135	2-0
6	Andri Grétarsson	2255	Jóhann Ingvason	2050	1,5-0,5
7	Tómas Björnsson	2245	Siguringi Sigurjónsson	1790	2-0
8	Gunnar Björnsson	2135	Jón Úlfljótson	1755	1,5-0,5

 

Íslandsmótið í atskák hefst í dag - skráningarfrestur til kl. 11

Íslandsmót í atskák 2009 fer fram laugardag og sunnudag, 27.-28. nóvember í húsnæði Taflfélags Reykjavíkur að Faxafeni 12.  Tefldar verða tvær 25 mínútna skákir og verði jafnt skal tefla 7 mínútna bráðabana þar til hreins úrslit fást.   Upphafi mótsins hefur verið frestað til kl. 13:30 til að koma til móts við keppendur sem einnig vilja taka þátt í Torg-móti Fjölnis.

Öllum er heimil þátttaka!

Dagskrá mótsins:

• Laugardagur 27. nóvember, kl. 13:30, 1. umferð
• Laugardagur 27. nóvember, kl. 15:30, 2. umferð
• Laugardagur 27. nóvember, kl. 17.30, 3. umferð
• Sunnudagur 28. nóvember, kl. 13:00, 4. umferð
• Sunnudagur 28. nóvember, kl. 15.00, 5. umferð

Dagskráin gæti hnikast til dragist einstök einvígi á langinn.  Úrslitaeinvígið verður teflt í desember 2010 - febrúar 2011.

Verðlaun:       

• 1. verðlaun      kr.   50.000.-
• 2. verðlaun      kr.   25.000.-
• 3.-4. verðlaun  kr.   12.500.-
• 5.-8. verðlaun  kr.     2.500.-

Þátttökugjöld:           

• kr. 1.000.- fyrir fullorðna
• kr.    500.- fyrir 15 ára og yngri.

Skráning fer eingöngu fram á Skák.is.   Nauðsynlegt er að skrá sig fyrir kl. 11 á laugardag til að geta tekið þátt.

Skráðir keppendur kl. 9:30

 

Nafn	Atskákstig
Þröstur Þóirhallsson	2435
Bragi Þorfinnsson	2405
Guðmundur Gíslason	2385
Sigurbjörn J. Björnsson	2355
Andri Grétarsson	2255
Tómas Björnsson	2245
Sævar Bjarnason	2185
Ólafur Þórsson	2140
Þorvarður Fannar Ólafsson	2135
Gunnar Björnsson	2135
Erlingur Þorsteinsson	2070
johann ingvason	2050
Kristján Örn Elíasson	1970
Vigfús Ó. Vigfússon	1915
Páll Snædal Andrason	1830
Jón Úlfljótson	1755
Guðmundur Kristinn Lee	1675
Eiríkur Örn Brynjarsson	1615
Birkir Karl Sigurðsson	1600
Örn Leó Jóhannsson	1595
Atli Jóhann Leósson	1495
Kristinn Andri Kristinsson	1330
Björgvin Kristbergsson	1330
Csaba Daday	0
Skúli Bernhard Jóhannsson	0

 

Núverandi Íslandsmeistari í atskák er Arnar E. Gunnarsson. 

Upplýsingar um skráða keppendur má nálgast hér.

TORG-skákmót Fjölnis hefst kl. 11

Það stefnir í glæsilega hátíð á TORG-skákmóti Fjölnis sem fram fer á morgun laugardag í verslunarmiðstöðinni Hverafold 1-3 frá kl. 11:00 - 13:00. Keppendur eru hvattir til að koma tímanlega til skráningar. Eins og komið hefur fram þá verða rúmlega 30 verðlaun í boði. Hver þátttakandi fær áritað glæsilegt viðurkenningarskjal með nafninu sínu fyrir þátttökuna. NETTÓ - Hverafold er aðalstyrktaraðili mótsins.

Auk þess að gefa verðlaunabikara og útbúa viðurkenningarskjöl býður verslunin upp á veitingar í skákhléi og glæsilega vinninga. Arion banki gefur stærstu vinningana og Pizzan og Foldaskálinn bjóða gjafabréf upp á pítsur og hamborgara. Tefldar verða sex umferðir með sjö mínútna umhugsunartíma. Mótið er ætlað öllum grunnskólanemendum og er þátttaka, veitingar og verðlaun innifalin í ókeypis þátttöku. Verðlaunað er í þremur flokkum: Eldri flokkur, yngri flokkur og stúlknaflokkur. Forseti Skáksambandsins, Gunnar Björnsson heiðrar krakkana með því að setja mótið og leika fyrsta leikinn.