Þorsteinn vann í gær - mætir stigahæsta keppandum í dag - uppákoma hjá Braga

FIDE-meistarinn Þorsteinn Þorsteinsson (2279), sem teflir í flokki 50+ á EM öldunga, vann í gær slóvakíska FIDE-meistaranum Milan Kolesar (2218). Þorsteinn hefur 3 vinninga eftir 4 umferðir og er í 3.-10. sæti. Í dag teflir hann við georgíska stórmeistarann Zurab Sturua (2548), stigahæsta keppenda mótsins.

Mikið gekk hjá Braga Halldórssyni (2134) sem teflir í flokki 65+. Á Facebook-hópnum Íslenskir skákmenn birtir Bragi eftirfarandi frásögn um skák sína gegn hinum danska John Zachariassen (1952). 

Í skak okkar Zachariassens kom upp leiðinlegt atvik. Eftir 19 leiki uppgötvaði ég að klukkan hafði aðeins gengið öðru megin mér í óhag eftir klukkutíma taflmennsku. Klukkan var sem sagt skrapatól. Húnn sýndi þá að ég átti 45 mínútur eftir en andstæðingur minn hafði samkvæmt hans klukku aðeins notað 3 mínútur. Ég gerði þá athugasemd við skákdómara og fyrsti úrskurður hans var að koma með nýja klukku án þess að leiðrétta tímann. Þessu mótmæltum við báðir þó að ég hefði vissulega notað heldur meiri tíma Næsti úrskurður dómarans var að stilla báðar klukkurnar á 1 klst og 10 mínútur. Þessum úrskurði mótmæltum við báðir enda ekki sanngjarnt því að andstæðingur minn hafði vissulega notað minni tíma en ég. Við ákváðum þá að kæra úrskurð dómarans til kærunefndar mótsins. Þá var okkur sagt að kæra okkar mundi kosta okkur 200 evrur hvorn. Við báðum um að sjá hvar það stæði í reglum mótsins. Við þessu fengum við engin svör önnur en svona væri þetta bara. Þá loks nenntum við ekki lengur að standa í þessum stappi og leystum vandræði dómarans með því semja um jafntefli þótt ég hefði gjarnan viljað tefla áfram í tvísýnni stöðu.

Bragi hefur 2,5 vinninga og er í 14.-26. sæti. Í dag teflir Bragi við ísraelska skákmanninn Edward Gorzeltsen (1885). 

Væntanlega verða þeir kumpánar báðir í beinni í dag en umferðin hefst kl. 14. 

51 skákmaður teflir í flokki Þorsteins og þar af eru sjö stórmeistarar. Þorsteinn er nr. 14 í stigaröð keppenda. 66 tefla í flokki Braga og þar af eru þrír stórmeistarar. Bragi er nr. 24 í stigaröð keppenda. 

• Heimasíða mótsins 
• Pörunarforrit
• Beinar útsendingar (Chess 24) - hefjast kl. 14