Korpúlfar - nýr öldungaklúbbur í Grafarvogi

Félag eldri borgara í Grafarvogi - KORPÚLFARr - (stofnað 1998) heldur uppi mikilli félagsstarfsemi þar um slóðir. Aðsetur þess er nú í hinni glæsilega félagsmiðstöð BORGUM (á vegum Reykjavíkurborgar) við Spöngina, aðalverslunarmiðstöð hverfisins.

Að frumkvæði Hlyns Smára Þórðarsonar (mágs Ingvars Ásmundssonar, heitins) í samráði við Sesselju Eiríksdóttur, formanns Korpúlfa, var bryddað þar upp á taflmennsku  í fyrravetur. Nú hafa skákmót eldri borgara verið gerð að föstum lið á dagskrá menningarhússins og verða haldin alla fimmtudaga í vetur kl. 13 -16. Fyrsta mótið fór fram með pomp og prakt nú í vikunni og var þátttaka góð og aðstaða öll til fyrirmyndar. Frítt kaffi og meðlæti fyrir lítið.

Ekki verður annað sagt en að eldri skákmenn á höfuðborgarsvæðinu hafa nú næg tækifæri til að hrista af sér slenið og iðka heilabrot sér til heilsubótar. Geta teflt með ÁSUM í Ásgarði, Stangarhyl á þriðjudögum, með RIDDURUM í Vonarhöfn, Strandbergi, Hafnarfirði, á miðvikudögum og nú svo með Korpúlfum í Borgum á fimmtudögum.

Allar þessa skákskylmingar eldri borgara hefjast kl. 13 umrædda daga. Mótin ættu að geta hentað flestum, nema menn vilji sækja þau öll, auk þess að tefla í KR á mánudögum og árdegis á laugardögum, þar sem haldin eru skákmót/æfingar allan ársins hring sem eru opin jafnt ungum sem öldnum.