Ólympíufarinn: Kjartan Maack

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Kjartan Maack sem verður fararstjóri hópsins.

Nafn?

Kjartan Maack

Aldur?

40 vetra

Hlutverk?

Fararstjóri. Fréttaflutningur. Aukinheldur mun ég bregða mér í hvert það hlutverk sem landsliðsfólk okkar þarfnast hverju sinni.  

Uppáhalds íþróttafélag?

Taflfélag Reykjavíkur

Hvernig er undirbúningi þínum fyrir mótið háttað?

Ég byrja daginn á raddæfingum með áherslu á framgómmælt nefhljóð, til að tryggja skýrleika í viðtölum við landsliðsfólk okkar í Baku. Að öðru leyti er undirbúningur minn með hefðbundnu sniði; sprettæfingar, hnébeygjur, upphífingar, jóga, hugleiðsla, uppbyggilegt mataræði og nægur svefn.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég var liðsstjóri á Ólympíuskákmóti u16 í Slóvakíu í júlí síðastliðnum. Því er skammt stórra högga á milli á þessu mikla Ólympíuári.

Getur þú nefnt frægan skákmann fæddan í Bakú?

Já.

Minnisstæðasta atvik á Ólympíuskákmóti?

Þegar rússnesku bílstjórarnir tveir renndu í hlað á hóteli u16 ólympíulandsliðsins í Búdapest fyrr á þessu ári til þess að keyra liðið til Poprad í Slóvakíu. Fyrr um morguninn höfðu þeir sótt landslið Azerbaijan á flugvöllinn. Þeir voru 3 klst að keyra frá flugvellinum að hótelinu, leið sem við fórum kvöldið áður á 7 mínútum. Á leiðinni til Slóvakíu varð rússnesku bílstjórunum reglulega uppsigað við konuna í google maps appinu og fengum við því að dvelja aukalega í klukkustund um borð í bifreið þeirra félaga. Var það fagnaðarefni því fyrir vikið náðum við djúpri tengingu við rússneska dægurlagatónlist. Azerarnir voru gjörsamlega úrvinda þegar til Slóvakíu var komið, eftir að hafa setið í 8 klukkustundir í óloftkældum bílnum. Enda voru þeir heillum horfnir í mótinu, þó innan raða þeirra væri ungur heimsmeistari. Sökum línuskorts læt ég vera að lýsa því er félagarnir tveir drápu á bílnum úti á miðri götu við lítinn fögnuð slavneskra ökumanna, og voru drykklanga stund að finna út úr því hvernig koma skyldi bílgarminum aftur í gang. Ekki er með öllu útilokað að aðalpersónur í hinum merku sjónvarpsþáttum 'Klaufabárðarnir' séu byggðar á þessum tveimur rússnesku atvinnubílstjórum. 

Er Kaspíahafið haf eða stöðuvatn?

Það er hafið yfir allan vafa að Kaspíahafið er ekki hafið sem margir telja það vera, heldur ku það vera rammsalt stöðuvatn.

Minnisstæða skák á Ólympíuskákmóti og af hverju?

Minnisstæðasta skákin frá Ól u16 í Slóvakíu er skák Vignis Vatnars Stefánssonar á 1.borði gegn Belgíu í 8.umferð. Í jafnteflislegu mislitu biskupaendatafli smíðaði Vignir Vatnar sannkallaða stórmeistarafléttu sem fól í sér mannsfórn. Í kjölfarið var allur vindur úr Belgum og Ísland vann 3,5-0,5. 

Hverjar eru þínar væntingar/vonir um gengi íslensku liðanna?

Ég vænti þess að landsliðin fari fram úr eigin væntingum og allir fari heim með vasa fulla af skákstigum. Jafnframt mun einhver þurfa auka pláss í ferðatöskunni fyrir grjótharðan áfanga.

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Ég trúi því og treysti að Björn muni áfram sinna hlutverki sínu af kostgæfni í gegnum samfélagsmiðla. .  

Eitthvað að lokum?

Gætum að því hvaða hugsunum við gefum vængi. Það getur skipt sköpum við skákborðið.