Tveir góðir sigrar í dag - mínútuþögn við upphaf umferðar - Carlsen mætir Aronian á morgun

Það gekk vel hjá íslensku sveitunum í opnum flokki í dag. A-liðið vann góðan 2½-1½ á sterkri sveit Rúmena. Henrik Danielsen vann góðan sigur en öðrum skákum lauk með jafntefli. Gullaldarliðið vann öruggan 3-1 sigur á sveit Kósóvó. Jóhann Hjartarson og Jón L. Árnason unnu en aðrir gerðu jafntefli. Friðrik Ólafsson tefldi á fjórða borði fyrir gullaldarliðið og er það fyrsta landsliðsviðureign Friðriks síðan á Möltu árið 1980!

Kvennaliðinu gekk ekki vel og ½-3½ tap gegn Lettum staðreynd. Lenka Ptácníková gerði jafntefli en aðrar skákir töpuðust. 

Umferð dagsins hófst í dag með því að Zurab Azmaiparashvili vottaði franska liðinu samúð skáksamfélagsins vegna atburða gærdagsins. Að því loknu stóðu allir keppendur upp úr sætum sínum og minntust fórnarlambanna með mínútuþögn. Mótshaldarar höfðu útvegað sorgarbönd sem allir keppendur og starfsmenn mótsins báru við upphaf umferðar. RÚV tók tilfinningaríkt viðtal við Sebastian Maze, liðsstjóra frönsku sveitarinnar, sem finna má hér.

Frakkar komu greinilega tvíefldir til leiks því þeir unnu frábæran 2½-1½ sigur á Armenum. 

Evrópumeistarar Asera er efstir í opnum flokki en þeir unnu stórsigur, 3½-½, á Dönum. Rússar og Úkraínumenn eru í 2.-3. sæti.

Í kvennaflokki eru Georgía og Úkraína efst. 

Þriðja umferð fer fram á morgun. Þá teflir Ísland við sterka sveit Þjóðverja en gullaldarliðið við Tyrki. Kvennaliðið mætir sveit Belgíu.

Ein athyglisverðasta viðureign morgundagsins verður að teljast viðureign Norðmanna og Armena. Þar má gera ráð fyrir að tveir stigahæstu keppendur mótsins tefli saman, heimsmeistarinn Magnus Carlsen og Levon Aronian. Carlsen hefur hvílt í tveimur fyrstu umferðunum en lítill vafi er á því að hann mæti til leiks á morgun gegn Armenum sterka.

Úkraínumenn mæta Aserum og Rússar tefla við Spánverja.

Umferðin hefst kl. 15. Áhorfendur hvattir til að mæta í Höllina til að upplifa veisluna! Skákskýrinar í umsjón Björns Þorfinnssonar hefjast kl. 17. Fyrir þann tíma er hægt að fylgjast með skýringum Simon Williams á ensku og fylgjast með skákunum á skjám á skákstað.

Vert er að benda á afar vandaða umfjöllun Björns Þorfinnssonar á DV.is.

• Heimasíða mótsins
• Chess-Results
• Beinar útsendingar