KR & Gallerý Skák - Jólamótið - Sigurður Áss sigraði

Hart bar barist og varist í KR-heimilinu þegar sameiginlegt Jólaskákvöld KR og Gallerý skákar fór þar fram í gærkvöldi með hátíðarbrag. Tvo mót í einu, tvenn verðlaun á mann fyrir efstu sætin, veglegt vinningahappdrætti og veitingar. Jafnframt var þetta sigurhátíð fyrir kapptefli haustsins í klúbbunum tveimur þar sem verðlaun fyrir þau voru veitt. 

Það var hinn hægláti en þó eitilharði Sigurður Áss
 Grétarsson, sem fór með sigur af hólmi með 8 vinninga af 9 mögulegum. Náði langsóttu jafntefli gegn Jon Olav í lokaskákinni, sem tryggði honum sigurinn. Hinir góðkunnu meistarar Stefán Bergsson og Bragi Halldórsson komu næstir og gátu líka leyft sér að brosa breitt í kampinn í mótslok, enda við verðuga andstæðinga að etja í þessu velheppnaða móti. 

Mikla ánægju vakti þátttaka Gunnars Kr. Gunnarssonar hins aldna meistara, sem sneri loks aftur að taflinu eftir erfið veikindi. Reis aftur upp á þriðja mánuði en ekki degi - eins og hann sagði sjálfur léttur á brún. Gunnar varð í 4.-5. sæti ásamt Gylfa Þórhallssyni, sem var að tefla í fyrsta sinni í Frostaskjólinu.  

Eins og sjá má á meðf. myndum og mótstöflu var létt yfir mannskapnum þó ekkert væri gefið eftir í baráttunni á borðinu.

Myndaalbúm (ESE)