Skákdeild Fjölnis bauð tíu ungmennum á Västerås Open

 

Skákdeild Fjölnis fagnar á þessu ári 10 ára afmæli sínu. Skákdeildin sem stofnuð var í maí 2004 hefur þrátt fyrir ungan aldur unnið til margra verðlauna og náð settum markmiðum sem tengjast afreksstarfi barna og unglinga. Skýrasta dæmi þess er að helmingur skáksveitar Fjölnis í 1. deild 2013 - 2014 voru 15 - 18 ára strákar sem þökkuðu traustið, höluðu inn vinningum og tryggðu öruggt sæti í 1. deild. 

 

Í tilefni af 10 ára afmæli skákdeildarinnar var ákveðið að bjóða 10 ungmennum í glæsilega skákferð á fjölmennasta skákmót Norðurlanda, Västerås Open, sem haldið er ár hvert í samnefndum bæ í Svíþjóð síðustu helgina í september.

Í hópnum voru þeir krakkar og unglingar 12 - 22. ára sem í gegnum áratuginn hafa verið hryggjarstykkið í árangursríku starfi skákdeildarinnar. Þau Sigríður Björg Helgadóttir, Hörður Aron Hauksson, Dagur Andri Friðgeirsson, Hrund Hauksdóttir, Dagur Ragnarsson, Jón Trausti Harðarson, Oliver Aron Jóhannesson, Jóhann Arnar Finnsson, Heiðrún Anna Hauksdóttir og Nansý Davíðsdóttir flugu til Svíðþjóðar með flugvél Icelandair að morgni föstudagsins 26. sept. og voru komin á áfangastað kl. 16:00 síðar um daginn. Gist var á Best Western Hotel Esplanade í þessum 140.000 manna bæ sem er í 200 km fjarlægð frá Stokkhólmi.

Alþjóðlega skákmótið Västerås Open hefur verið haldið frá árinu 2009 og þátttakan aukist ár frá ári. Mikið er lagt upp úr góðu skipulagi sem hæfir skákmönnum á öllum aldri og af öllum styrkleika. Á föstudagskvöld voru tefldar fjórar umferðir með atskáksniði en á laugardegi og sunnudegi aðrar fjórar umferðir í formi kappskáka.

Frammistaða Fjölnisfélaga var í heildina mjög góð og náðu þeir 50% vinningshlutfalli og rúmlega það í kappskákunum. Þeir félagar Jón Trausti, Dagur R. og Oliver Aron sem borið hafa hróður Rimaskóla mest og best á NM barna-og grunnskólasveita, urðu efstir með 5 vinninga af 8 mögulegum. Jón Trausti hækkaði mest þeirra á stigum. Hörður Aron sem varð Norðurlandameistari með Rimaskóla 2004 og 2008 og farinn að tefla að nýju hlaut 4 vinninga. Hann vann flokkaverðlaun og varð 79 sætum ofar en stigaskor keppenda sagði til um. Sama má segja um Sigríði Björgu. Eftir algjört vinningsleysi í atskákunum setti hún í gírinn og hlaut 3,5 af 4 vinningum í kappskákunum og hækkaði eins og Hörður Aron um mörg skákstig. Í flokki undir 1600 stigum tefldu Nansý sem skráði sig rækilega á söguspjöld mótsins með sigri fyrir tveimur árum, Jóhann Arnar og Heiðrún Anna systir þeirra Harðar og Hrundar. Þrátt fyrir að Nansý gengi ekki eins vel og á mótinu 2012 þá var hún allan tímann í baráttunni um efstu sætin og endaði með 5 vinninga. Jóhann Arnar hlaut 4 vinninga og Heiðrún Anna 2,5 vinninga.

Eins og stefnt var að þá hækkuðu Fjölniskrakkarnir nánast allir á stigum og voru ánægðir með frammistöðu sína. Ferðin var ekki síður ætluð til að efla og þétta þennan glæsilega hóp ungra afreksmanna sem við í stjórn Skákdeildar Fjölnis viljum sjá áfram virk í skákstarfi deildarinnar sem fyrirmyndir yngri skákmanna. Västeråsfararnir hafa flestir starfað við þjálfun á skákæfingum Fjölnis eða verið liðstjórar skáksveita Rimaskóla. Ferðin til Västerås var einstaklega velheppnuð og krökkunum tíu til mikillar fyrirmyndar. Hún var þeim nánast að kostnaðarlausu og ber að þakka það frábærum styrktaraðilum ferðarinnar; Sænsk, íslenska samstarfssjóðnum, Íslandsbanka og Skáksambandi Íslands.

Fararstjórar til Västerås voru Helgi Árnason formaður skákdeildarinnar og Davíð Hallsson faðir Nansýjar.