Óbreytt staða á Arionbankamótinu - Haustmóti SA

Þrjár skákir voru tefldar í sjöttu umferð Arionbankamótsins í gær. Karl Egill beitti fáséðu afbrigði franskrar varnar gegn Sigurði Eiríkssyni og lenti snemma í þrengingum. Slíkt getur endað illa og svo fór einnig nú - Sigurður fékk liðuga kóngssókn sem leiddi til Sigur(ð)s. Í hinum skákunum tveimur var lengst af allt í járnum. Haraldur freistaði þess að skipta upp í endatafl með frípeði gegn Jóni Kristni, en komst svo að því að taflið var síst betra. Jokko náði undirtökum og reyndi allt hvað af tók að leggja stýrimanninn, en reynslan kom Haraldi til góða og hann stýrði fleyi sínu í jafnteflishöfn.   Forystusauðurinn Símon barðist ákaflega til sigurs gegn Andra Frey, en drottningarkaup á óheppilegum tíma leiddu til peðsendatafls sem var Andra í hag. Mikið tímahrak hrjáði þá félaga og Andri kaus að þráleika frekar en að freista vinnings í óljósri stöðu. Vísindaleg athugun að skákinni lokinni benti þó til þess að honum hefði verið óhætt að taka sénsinn.

Nú verður gert hlé á mótinu vegna Íslandsmóts skákfélaga um næstu helgi. Enn er staðan sú að Símon er efstur með 4,5 vinninga í fimm skákum, en Jón Kristinn hefur sama vinningafjölda, en úr sex skákum. Fráfarandi meistari, Sigurður Arnarson á enn góða möguleika á að verja titil sinn, en hann er skráður með 3 vinninga í fjórum skákum. Þetta kann að þykja ögn ruglingslegt, en allt mun það þó skýrast í lokin. Í 7. umferð sem tefld verður föstudagskvöldið 9. október, munu þessir leiða saman hesta sína (og biskupa):

Símon-Haraldur

Karl-S.Arnarson

S.Eiríksson-Kristjan

• Heimasíða SA
• Chess-Results