EM taflfélaga: Pistill fimmtu umferðar

Vigfús Ó. Vigfússon, farstjóri Hugins hefur skrifað pistil um fimmtu umferð EM taflfélaga sem fram fór í gær. Í honum segir meðal annars:

Viðureignin byrjaði líka vel. Við fengum snemma góðar stöður á öllum borðum nema því 5 þar sem Hlíðar var lengst af með frekar þrönga og óþægilega stöðu. Einar Hjalti og Robin skiluðu snemma vinningum í hús á mjög snyrtilegan hátt. Andstæðingur Magnúsar tefldi mjög stíft til jafnteflis svo þar var samið við fyrsta tækifæri þegar það mátti. Á sama tímavoru bæði Gawain og Þröstur með vænlegar stöður og Hlíðar varðist fimlega í erfiðri stöðu. Ég var því farinn að gæla við stóran sigur á Ungverjunum en var þá snarlega kippt niður á jörðina. Það gerðist eiginlega á sama andartaki að Þröstur fór of geyst í sóknina, fórnandi manni sem virtist ekki standast og Gawain missir tökin á sinni stöðu og lendir út í endatafli þar sem báðir höfðu tvo biskupa en hann peði undir. Það varð fljótlega ljóst að stöðu Þrastar yrði ekki bjargað en ég var nokkuð viss um að ef það væri möguleiki á jafntefli hjá Gawain í þessu endatafli þá hefði hann tækni til að finna leiðina á móti þessum andstæðingi. Það kom líka á daginn að hann náði að sigla jafnteflinu í höfn með því að fórna öðrum biskupnum fyrir síðasta frípeð andstæðingsins. Þá var jafntefli í viðureigninni komið í höfn. Það valt því allt á skákinni hjá Hlíðari hvort við ynnum viðureignina.  

Pistilinn má finna á heild sinni á heimasíðu Hugins.

• Heimasíða mótsins
• Heimasíða Hugins (fréttir og pistlar)
• Chess24 (mjög góðar beinar útsendingar)
• Úrslitaþjónusta
• Myndaalbúm (VÓV)
• Beinar útsendingar