Gallerý Skák - Daði Ómarsson vann létt

Fyrsta Fimmtudagsmótið á vegum Gallerý Skákar í Faxafeni var teflt í gærkvöldi. Það var Daði Ómarsson, hinn eitilharði skákmaður, sem fór létt með sigur að hólmi með 10.5 vinninga af 11 mögulegum. Hinn síungi öldungur og fyrrv. Íslandsmeistari í skák og knattspyrnu, Gunnar Kr. Gunnarsson sýndi gamla meistaratakta líka og rétti hlut sinn verulega eftir nokkra lægð undanfarið. Hinn efnilegi og ört vaxandi skákmaður Gauti Páll Jónsson náði þriðja sæti, en mótið var frekar jafnt um miðjuna eins og oftast er.

Skemmtileg blanda af öldnum meisturum og ungum meistaraefnum tók þátt í þessu fyrsta skákkvöldi leiktíðarinnar á vegum Gallerýsins við góðar aðstæður í Skákmiðstöð TR og nutu þess að tefla þó mönnum hafi eitthvað orðið á í messunni á stundum, einstaka hugsanavillur létu á sér kræla við úrvinnslu einfaldra staðna á skákborðinu og baráttan við klukkuna væri sumum erfið.

Í mótsbyrjun var Arinbjarnar Guðmundssonar (1932-2014) minnst með nokkrum orðum og stuttri þögn og minning hans heiðruð í virðingarskini. Það fór vel á því í húsakynnum hans gamla taflfélags TR.  Mörgum hinna eldri skákmanna er Arinbjörn sérstaklega minnistæður en hann var einn af fremstu skákmeisturum Íslands í byrja sjöunda áratugsins og vann sér margt til afreka áður en hann fluttist af landi brott til Ástralíu. Guðmundur G.

Þórarinsson skrifaði hugnæma minningargrein um hann nýlega í Morgunblaðið og ferill hans var einnig rakinn á Hrókurinn.is fyrir skömmu. Þá minntust eldri skákmenn hans líka á skákmóti í Riddaranum fyrir viku og vottuðu hinum látna heiður og virðingu. Enda þótt langt væri um liðið frá því hann gerði garðinn

frægan og hvarf af landi brott var hann mönnum mjög minnistæður.     

Nánari úrslit mótsins má greina á meðf. mótstöflu. 

Næst slær í brýnu á þessum vettvangi á sama stað og tíma að viku liðinni.