Lenka vann í lokaumferðinni - Gunina Evrópumeistari kvenna

Lenka Ptácníková (2310) vann búlgörsku skákkonuna Nurgyul Salimova (1908) í elleftu og síðustu umferð EM kvenna sem fram fór í Plovdid í Búlgaríu í dag. Lenka hlaut 5 vinninga og endaði í 65.-83. sæti (79.).

Lenku gekk mjög illa í síðari hluta mótsins og tapaði fjórum skákum í röð í 7.-10. umferð eftir góðan kafla þar á undan.

Evrópumeistari varð rússneska landsliðskonan, Valentina Gunina (2501). Hún varð jafnframt Evrópumeistari árið 2012. Óvíst er hvort hún tefli á Ólympíuskákmótinu ásamt stöllum sínum í rússneska landsliðinu.

Í öðru sæti varð landa hennar Tatiana Kosintseva (2476). Kosintseva-systur hafa ekki gefið kost á sér í rússneska landsliðið síðan í Istanbul 2012 vegna ónægju með liðsstjóra liðsins. Skákkonur frá Rússlandi, Úkraínu og Georgíu röðuðu sér í átta efstu sætin og fara þarf niður í sautjánda sæti til að finna skákkonu frá Vestur-Evrópu.

Frammistaða Lenku samsvaraði 2163 skákstigum og lækkar hún um 28 skákstig fyrir hana.

Alls tóku 116 skákkonur frá 26 löndum þátt og þar af flestar sterkustu skákkonur Evrópu. Fjórtán efstu sætin veita keppnisrétt á Heimsbikarmótinu (World Cup) að ári. Lenka var nr. 51 í stigaröð keppenda.

• Heimasíða EM kvenna
• Chess-Results
• Beinar útsendingar (hefjast kl. 12)