Mikael Jóhann: Pistill frá Pardubice

Við höldum áfram með pistlabirtingar. Í dag er pistill norðansveinsins Mikaels Jóhanns Karlssonar frá Czech Open í Pardubice.

Ég ákvað að taka þátt í Czech Open 2013 sem er eitt fjölmennasta og virtasta opna skákmót í heiminum. Mótið er haldið í Pardubice sem er borg aðeins minni en Reykjavík í u.þ.b. klukkutíma fjarlægð frá Prag. Ég lagði af stað til Keflavíkur um 4 um nóttina með félögum mínum og við flugum þaðan á London Gatwick flugvöllinn sem er leiðinlegasti flugvöllur sem ég hef farið á og biðum þar eftir flugi til Prag í 6-7 klukkutíma.

Frá Prag tókum við síðan strætó á lestarstöðina og héldum þaðan til Pardubice. Þegar við komum loksins á hótelið okkar þá kom í ljós að starfsmaður á hótelinu hafði gert stór mistök og bókað okkur í júní. Maðurinn í móttökunni teiknaði glæsilegt kort fyrir okkur á servéttu og hringdi á annað hótel sem var töluvert slakara og pantaði herbergi fyrir okkur. Klukkan var um eitt að nóttu til þegar við komum á hótelið sem var án loftkælingar og internets sem eru lífsnauðsynlegir hlutir í Tékklandi í júlí. En við sættum okkur við það enda ekki mikið annað í boði. Við keyptum okkur viftu og nýttum okkur free wifi á nokkrum stöðum. Aðal kosturinn við hótelið okkar var að það var nálægt mótstað og helstu verslunarmiðstöðinni.

Fyrsta umferð: Nýkomnir úr rúmlega 20 klukkustunda ferðalagi og varla með nægilega góðan svefn, vegna hitans, héldum í fyrstu skákina. Ég mætti Íra með rúmlega 1850 skákstig og tefldi enska leikinn að venju og vann andstæðing minn heldur örugglega.

Í annarri umferð mætti ég síðan Króatískum Fide-meistara. Byrjunin var Bb5 varíanturinn

í Sikileyjarvörn þar sem andstæðingur minn fékk aðeins betra úr byrjuninni en ég náði að snúa á hann og sigra skákina heldur örugglega með svart. Góð byrjun á mótinu með fullt hús þrátt fyrir erfiðar aðstæður.

Í þriðju umferð mætti ég Rússa með tæp 2300 stig en áður um daginn skellti ég mér í fótbolta með strákunum og skaðbrann líkt og þeir allir og mætti síðan í skákina með gríðarlega litla orku og varla búinn að borða og skeit laglega upp á bak. Ég tefldi enska leikinn eins og algjör byrjandi og má eiginlega segja að ég hafi ekki mætt í skákina fyrr en hún var gjörtöpuð en ég hafði teflt hratt og náði engri einbeitingu. Frekar pirrandi að komast á toppborðin og tefla ekki einu sinni almennilega skák.

En í fjórðu umferð lagaðist þetta ég náði einbeitingunni minni aftur og tefldi eins og maður með svart. Ég vann Þjóðverja með tæp 2150 sem var með verra frá byrjun og með smá nuddi var sigurinn kominn í hús og bráðnauðsynlegur sigur til þess að bæta móralinn minn sem varð fyrir hnjaski deginum áður.

Ég mætti ungverskri konu í fimmtu umferð með tæp 2200 sem tefldi c4 e5 g3 Rf6 Bg2 c6 afbrigðið í enska leiknum sem er ekki góð leið fyrir svartan en ég lék ónákvæmt í byrjuninni sem gaf henni örlítið betra en hún gerði síðan slíkt hið sama og þá beitti ég góðri fléttu sem skilaði mér sigrinum eftir tiltölulega stutta skák.

Í sjöttu umferð mætti ég heimamanni með tæp 2200 og andstæðingurinn minn beitti hollenskri vörn gegn enska leiknum sem ég hafði skoðað örlítið fyrir skákina og fékk betra úr byrjuninni og tókst með smá nuddi að vinna peð og fara út í unnið endatafl og sigraði skákina fljótlega eftir það.

Fyrir sjöundu umferðina var ég komin í toppbaráttuna og mætti þriðja stigahæsta manni mótsins með svart sem var Þjóðverji. Andstæðingurinn lék d4 og ég svaraði með slavneskri vörn og var með heldur verra allan tíman og lék síðan af mér og tapaði þar með skákinni.

Í áttundu umferð tefldi ég við Rússa með 2150 og lék af mér í miðtaflinu en náði með seiglu að hanga á jafnteflinu og eftir þetta var draumurinn um efstu sætin horfinn.

Í níundu umferð mætti ég Grikkja með 2150 og ég tefldi slabbann með svörtu og andstæðingur minn hélt frumkvæðinu í gegnum skákina og á endanum tapaði ég peði og stuttu síðar skákinni sem var leiðinlegur endir á mótinu.

Ég endaði með 5,5 af 9 og hækkaði um 39 stig en hefði viljað fá meira en hálfan úr síðustu þremur en ég er annars sáttur við frammistöðuna og mæli eindregið með þessu móti því það er algjör gullnáma fyrir skákmenn sem vilja hækka sig á stigum. Flokkaskiptingin er aðal ástæðan af því að maður á alltaf möguleika á sigri í hverri einustu umferð. Enn fremur vil ég þakka Skáksambandi Ísland kærlega fyrir stuðninginn og einnig félögum mínum sem gerðu þessa ferð skemmtilega og eftirminnilega.

Mikael Jóhann Karlsson

[Event "Czech Open 2013"] [Site "?"] [Date "2013.07.23"] [Round "5"] [White "Karlsson, Mikael"] [Black "Toth, Soreta"] [Result "1-0"] [ECO "A20"] [WhiteElo "2029"] [BlackElo "2178"] [Annotator "Doe,John"] [PlyCount "69"] 1. c4 e5 2. g3 Nf6 3. Bg2 c6 {Thessi byrjun er talin óhagstæð fyrir svartan ef hvítur teflir nákvæmt gegn thessari byrjun.} 4. d4 e4 5. Nc3 d5 6. Bg5 Nbd7 7. f3 {Líklega er best að taka með peði á d5 en ég var smá ryðgaður í byrjuninni og hún náði thess vegna að jafna taflið heldur snemma.} Qa5 8. Bd2 e3 9. Bxe3 dxc4 10. Qa4 Qxa4 11. Nxa4 Nd5 {betra hefði verið að leika b5 hér og svartur nær töluverðu frumkvæði.} (11... b5 12. Nc3 b4 13. Nd1) 12. Bd2 b5 13. Nc3 N7b6 14. a3 Nxc3 15. bxc3 c5 16. f4 Rb8 17. e4 Bb7 18. Kf2 g6 {hér er ég aftur kominn með aðeins betra eftir ónákvæmna úrvinnslu andstæðingsins} 19. Ne2 f5 20. Rhb1 a6 21. a4 {hér leikur andstæðingur herfilega af sér og er kominn með að öllum líkindum tapað} fxe4 (21... Nxa4 22. Rxa4 bxa4 23. e5 {Thetta var upprunalega planið og besta vörnin fyrir hana að mínu mati en hvítur enn thá með alla stöðuna.}) 22. axb5 e3+ {Annar gríðarlega slæmur afleikur andstæðingsins.} (22... axb5 23. Rxb5 Bc6 {Thessi leið er aðeins skárri en hin en thó leiðir auðveldlega til taps vegna thess hve illa svarti tókst að koma mönnum sínum út og staðan er að hrynja.}) 23. Bxe3 Bxg2 24. bxa6 Ba8 25. a7 Rb7 26. dxc5 {Kom á óvart að andstæðingurinn skyldi ekki gefa í thessari stöðu en kannski skiljanlegt thví skákin stóð aðeins í um 90 mínútur.} Nc8 27. Rxb7 Bxb7 28. a8=Q Bxa8 29. Rxa8 Kd7 30. Bd4 Rg8 31. c6+ Kc7 32. Be5+ Bd6 33. Bxd6+ Kxd6 34. Nd4 Re8 35. Nb5+ {Svartur gafst upp og öruggur sigur í hús thrátt fyrir smá fail í byrjuninni.} 1-0