Gleði og gaman á afmælishátíð Vinaskákfélagsins

Gleðin var allsráðandi á afmælishátíð Vinaskákfélagsins í dag og mikill fjöldi góðra gesta lagði leið sína í Vin, athvarf Rauða krossins á Hverfisgötu. Jóhann Hjartarson stórmeistari tefldi fjöltefli við liðsmenn Vinaskákfélagsins, Bjartmar Guðlaugsson og María Helena Haraldsdóttir glöddu gesti með söng, og slegið var upp fjölmennu og skemmtilegu Bónus-Afmælismóti, þar sem Hjörvar Steinn Grétarsson fór með sigur af hólmi.

Þór Gíslason forstöðumaður í Vin settti hátíðina og sagði að skákin gegndi afar mikilvægu hlutverki í Vin. Þar væri teflt alla daga og gaman, ekki bara á hinum vikulegu mánudagsæfingum og að margir af gestum Vinjar hefðu blómstrað í gegnum starf Vinaskákfélagsins.

Jóhann Hjartarson tefldi klukkufjöltefli við fimm liðsmenn Vinafélagsins, þá Hörð Jónasson, Hjálmar Sigurvaldason, Hauk Halldórsson, Hörð Garðarsson og Arnljót Sigurðsson. Liðsmenn Vinafélagsins veittu stigahæsta skákmanni Íslands harða mótspyrnu, og Hörður Garðarson náði jafntefli gegn meistaranum.

Kristján Þór Júlíusson heilbrigðisráðherra flutti setningarávarp Bónus-Afmælismóts Vinaskákfélagsins, og sagðist hafa heyrt margt gott um skáklífið í Vin og starfsemina þar. Ráðherra fór jafnframt fögrum orðum um gildi skáklistarinnar, enda kenndi hún mönnum að hugsa áður en þeir framkvæmdu -- nokkuð sem stjórnmálamenn ættu að tileinka sér í ríkari mæli! Kristján lék svo fyrsta leikinn í skák Harðar Garðarsonar og Hjálmars Sigurvaldasonar.

Bónus-Afmælismótið var æsispennandi enda vel skipað. Landsliðsmaðurinn Hjörvar Steinn Grétarsson stóð að lokum uppi sigurvegari, hlaut 6 vinninga af 7 mögulegum. í 2.-4. sæti urðu Björn Þorfinnsson, Róbert Lagerman forseti Vinaskákfélagsins og Tómas Björnsson. Alls voru keppendur 24.

Hjörvar Steinn, Björn og Róbert hlutu veglega vinninga frá Bónus, sem er einn helsti bakhjarl Vinaskákfélagins. Þá hlutu þeir Hörðar Jónasson og Hjálmar Sigurvaldason verðlaun fyrir að vera best klæddu keppendurnir. Sigurlaun þeirra voru bók um goðsögnina Benóný Benediktsson.

Að vanda voru veglegar og gómsætar veitingar í boði Vinaskákfélagsins. Bakarameistarinn lagði til glæsilega afmælistertu, og Kaffi Grindavík gaf gómsætar hnallþórur.

Róbert Lagerman forseti Vinaskákfélagsins sagði við verðlaunaafhendingu að framundan væri líflegt og kraftmikið starf hjá félaginu. Æfingar eru vikulega og mánaðarlega verða haldin opin stórmót. Þá mun Vinaskákfélagið tefla fram keppnissveitum í 2. og 4. deild Íslandsmóts skákfélaga, auk þess að taka þátt í skipulagningu á stórmóti í tilefni Alþjóða geðheilbrigðisdagsins, standa fyrir árlegu jólaskákmóti geðdeildanna og fleiri viðburðum.

 

Myndaalbúm (HJ)