KR-pistill: Gunni Gunn gerir það gott

Hraðskákmótin í Vesturbænum eru ekki heiglum hent.  Þar mætast sannarlega stálin stinn öll mánudagskvöld árið um kring. Tefldar eru þrettán umferðir í striklotu og engin miskunn sýnd. Ekki staður fyrir þá sem haldnir eru „áfallahliðrunarhambrigðapersónuleikastreituhugröskun" eða öðru hugarvíli.  

Í KR-heimilinu við Frostaskjól verða menn að vera við öllu búnir og  taka því sem óvænt að höndum ber með jafnaðargeði, viðbúnir að snúa vörn í sókn ef á móti blæs.  Ákvörðunarfælni eða  rangt stöðumat að hætti Njáls á Bergþórshvoli dugir ekki ef landa á vinningi, sem telur jafnt hvernig sem hann er fenginn. Skákstöðumatssundurgreiningartæknihæfileikinn eða appið þarf að vera innbyggt ef vel á að fara. Snjallar og snartölvur eru óleyfileg hjálpartæki skáklífsins, eins og alkunna er.  

Ekki er svo að sjá að aldurinn hái mönnum að ráði við taflborðið enda viðtekin staðreynd að heilabrot séu heilsubót.  Aldurforsetinn Gunnar Kr. Gunnarsson, Íslandsmeistari í báða enda,  hefur borið sigur úr bítum í tveimur síðustu mótum með 11 vinningum. Geri aðrir betur í svo harðsnúnum hópi nærri áttræðir.  Gunnar vann gullverðlaun í sínum aldurflokki, 76-80 ára,  í Skákmóti kynslóðanna, Æskunni & Ellinni, um síðustu helgi og fór létt með það.   

Næstbestur í mótinu í gærkvköldi var hinn þjóðkunni skákmeistari, sagnfræðingur og bókaútgefandi Jón Þ. Þór með 9½ og  þriðji bestur Guðfinnur R. Kjartansson,  Viðeyjarundrið sjálft, með 9 vinninga,  jafn Gunnari Birgissyni, þungaviktarmanni og meistara úr Kópavogi, sem varð fjórði á stigum.  Guðfinnur sem teflir manna mest og best, varð einnig þriðji í síðustu viku og er vaxandi skákmaður, þó nýorðið löggilt gamalmenni sé, en þá náði Stefán Þormar Guðmundsson, Hellisheiðarséni m.m. öðru sætinu.  Gunnar sem er afar slyngur og slóttugur skákmaður, þrautgóður á raunastund, hefur reynst  mörgum þungur í skauti við taflborðið að undanförnu enda unnið 12 mót það sem af er ári.  Sjá nánar meðf. mótstöflu og myndir.

Stjórn Skákdeildar KR undir styrkri forystu Kristján Stefánssonar, hrl., ástríðuskákmanns, rær nú að því öllum árum að fá dagatalinu breytt - í ljósi þess að bæði aðfangadag og gamlaársdag ber að þessu sinni upp á mánudaga. Þetta mun að öllu óbreyttu raska mótaáætlun klúbbsins alvarlega og geta leit til ófyrirsjáanlegra  geðraskanna, sem er með öllu  óþarft og óásættanlegt.

 „Þessu þarf að kippa í liðinn", segir formaðurinn, að hætti Castró Kúpuforseta.

Pistill eftir Einar S. Einarsson.

Meira á www.kr.is (skák).

Athugasemdir

[Jón Þorvaldsson (IP-tala skráð) 31.10.2012 kl. 02:36]

Stórskemmtilegur pistill hjá þér Einar. Bestu þakkir.