Róbert sigraði á afmælismótinu og gekk til liðs við Skákfélag Vinjar

Það var glæsilegt mótið sem Róberti Lagerman var haldið til heiðurs í Vin í dag, en herskari fólks heiðraði piltinn sem lagði hálfa öld að baki í gær. 34 þátttakendur voru með og ekki var hægt að bæta fleirum við því stofurnar voru báðar fullar af borðum og í raun neðri hæðin öll. Eitt borð fór út, undir tré. Vegna úrkomu var ekki hægt að bæta við fleiri.

Fyrir mótið minntist Arnar Valgeirsson, forseti Skákfélags Vinjar, á aðkomu afmælispiltstins að skákstarfinu í Vin í gegnum árin og þakkaði samvinnu og aðstoð við kennslu og mótahald bæði innan veggja athvarfsins og utan, en Róbert hefur komið að flestum þeim viðburðum sem Skákfélagið hefur komið að í gegnum árin. Róbert hélt stutta tölu og þakkaði  öllum komuna og var hamingjusamur með fimmtugsáfangann sem hann sagðist ætla að fagna fram á haust. Tilkynnti síðan að hann hefði gengið til liðs við Skákfélag Vinjar og mun hann leiða sveitina í vetur.

Vigfús Vigfússon, formaður Hellis, þakkaði Róberti árin í  Helli. Þá fór forsetinn hann Gunnar Björnsson yfir reglur og setti  hið vel skipaða mót sem endaði þannig að Róbert og Sævar Bjarnason komu í mark með 5,5 af 6 mögulegum og hafði Róbert sigur með minnsta mögulega stigamun. Með 4,5 vinninga komu þeir Stefán Bergsson, Ólafur B. Þórsson, Elvar Guðmundsson og Rúnar Berg. Einu sinni reyndi á alráðan skákstjórann en hann tæklaði það með þeim hætti að aldrei var möguleiki á meiriháttar vandamálum eftir það og allt gekk glimrandi vel.

Kaffiveitingar runnu ofan í gesti í hléinu og fjöldi veðlauna voru veitt en Vignir Vatnar hlaut verðlaun í flokki 12 ára og yngri, Óliver Aron  Jóhannesson fyrir 18 ára og yngri, Jón Torfason og einnig Finnur Kr. Finnsson í flokki 60 ára og eldri og Elsa María Kristínardóttir varð efst kvenna. Brynja, Inga Tandradóttir hlaut verðlaun í flokki fjögurra ára og yngri en hún hjálpaði pabba sínum af stakri snilld og Elísabet Róbertsdóttir var heiðruð fyrir að aðstoða föður sinn svo glæsilega. Þá fengu sex efstu verðlaun sem öll voru í formi fagurbókmennta, þjóðlagatónlistar á geisladiskum og Clint Eastwoodmynda.

Úrslit:

• 1.       Róbert Lagerman             5,5
• 2.       Sævar Bjarnason              5,5
• 3.       Stefán Bergsson               4,5
• 4.       Ólafur B. Þórsson             4,5
• 5.       Elvar Guðmundsson        4,5
• 6.       Rúnar Berg                        4,5
• 7.       Stefán Þór Sigurjónss      4
• 8.       Óliver Aron Jóhanness    4
• 9.       Ingi Tandri Traustason    3,5
• 10.   Jón Torfason                     3,5
• 11.   Birgir Berndssen               3,5
• 12.   Elsa María Kristínard       3,5
• 13.   Vigfús Vigfússon               3,5
• 14.   Gunnar Freyr Rúnarss      3,5
• 15.   Bjarni Hjartarson              3,5

Næstu 19 manns með minna.

• Chess-Results 
• Myndaalbúm (Helgi Árnason, Arnar Valgeirsson og Hrafn Jökulsson)