Árni H. Kristjánsson með alþjóðlegan áfanga í bréfskák

Árni H. Kristjánsson náði sínum fyrsta SIM-áfanga í bréfskák með því að gera jafntefli í lokaskák sinni í undankeppni níunda Evrópumóts landsliða. Þetta er jafnframt þriðji IM-áfangi Árna, en SIM-titillinn er millistig milli alþjóðlegs meistara og stórmeistara í bréfskák. Árni hefur verið í mikilli sókn í bréfskákinni og teflir bæði skemmtilega og af miklu öryggi sem sést af því að hann hefur ekki tapað skák í u.þ.b. þrjú ár.

Árni er einnig Íslandsmeistari í bréfskák eftir góðan sigur á 22. Íslandsmótinu sem jafnframt var minningarmót um Sverri Norðfjörð. Þá var skák hans gegn gegn alþjóðlega bréfskákmeistaranum Tomas Learte Pastor valin bréfskák ársins 2011. Árni teflir um þessar mundir í undankeppni heimsmeistaramótsins í bréfskák og er nú efstur í sínum riðli. Þess má geta að þetta er annar áfanginn sem Íslendingur nær í Evrópumótinu og fleiri áfangar gætu skilað sér í hús áður en yfir lýkur.