Skákþáttur Morgunblaðsins: Björn Þorfinnsson skákmeistari Reykjavíkur

Nokkuð er um liðið síðan Skákþingi Reykjavíkur 2012 lauk, en þar urðu efstir Guðmundur Kjartansson, Bragi Þorfinnsson, Björn Þorfinnsson og Ingvar Þ. Jóhannesson með sjö vinninga af níu mögulegum. Illa gekk að fá fram nýjan Reykjavíkurmeistara, en með því að Björn Þorfinnsson vann Guðmund Kjartansson tvívegis tryggði hann sér sigur í aukakeppninni. Þetta er vel af sér vikið hjá Birni þegar horft er til þess að fram eftir móti virtist Guðmundur ætla að stinga aðra keppendur af og hafði eftir sjö umferðir aðeins misst niður hálfan vinning, og tapaði þá fyrir Birni sem hefur reynst honum erfiður undanfarið.

Bragi og Guðmundur sátu eftir með einn vinning og sá fyrrnefndi greip til þess ráðs að gefa síðustu skákina án taflmennsku og Guðmundur er því í 2. sæti.

Aðalmót skákþingsins fór vel fram og var TR til sóma í hvívetna. Framkvæmd aukakeppninnar var hins vegar verulega morkin, svo maður noti orðalag hins nýbakaða Reykjavíkurmeistara. Dagskráin slitrótt og eyðilegt um að litast í skáksalnum, skákirnar ekki sendar beint út á netinu eins og venja er og þannig mætti áfram telja. Ingvari Þ. Jóhannessyni var meinuð þátttaka í aukakeppninni með þeim rökum að hann gæti ekki orðið Reykjavíkurmeistari. Erfitt er að fallast á þau rök; Ingvar gat teflt upp á að vinna mótið og ef setja á slíkar skorður í framtíðinni verður að takmarka þátttöku í skákþinginu við þá sem geta orðið Reykjavíkurmeistarar. Ekki gat mótsstjórnin vísað í hefðina; aukakeppni eftir Skákþing Reykjavíkur árið 1973 fór t.a.m. fram með þátttöku Kópavogsbúans Jóns Pálssonar.

Viðureignir Guðmundar og Björns í aukakeppninni einkenndust af mikilli spennu og tímahraki. Úrslitin hefðu hæglega getað orðið önnur en stríðsgæfan var með Birni:

Aukakeppnin 5. umferð:

Guðmundur Kjartansson - Björn þorfinnsson

Slavnesk vörn

1. c4 c6 2. Rc3 d5 3. d4 Rf6 4. Rf3 a6

Chebanenko-afbrigðið sem notið hefur mikilla vinsælda undanfarin ár.

5. e3 b5 6. b3 Bg4 7. h3 Bxf3 8. Dxf3 e5 9. dxe5 Bb4 10. Bd2 Re4

Önnur vinsæl leið er 10. ... Bxc3 11. Bxc3 Re4 12. Bb4 bxc4 með flókinni stöðu.

11. Rxe4 dxe4 12. Dd1 Bxd2+ 13. Dxd2 Dxd2+ 14. Kxd2 Rd7 15. f4?

15. Kc3 var betra.

15. ... exf3 16. gxf3 Rxe5 17. f4 0-0-0+ 18. Kc3 Rf3!

Guðmundi virðist hafa sést yfir þennan öfluga leik. Hann á nú erfitt með að valda e3-peðið t.d. 19. Be2 Hhe8! o.s.frv.

19. a4 Hhe8 20. cxb5 a5?

20. ... Hxe3+! var öflugara en Björn vildi hindra að kóngurinn kæmist til b4.

21. Bc4 Hxe3+ 22. Kb2 Hd2+ 23. Ka3 Rd4 24. Had1!

Riddarinn á d4 grípur í tómt.

24. ... Hxd1 25. Hxd1 c5 26. Bxf7 Kc7 27. h4 Hh3 28. Hg1 g6 29. Hg5 Hxh4 30. Hxc5+ Kb6 31. Hd5 Hxf4 32. Bg8 h5 33. Hd6+ Kc5 34. Hd5+ Kb6 35. Hd6+ Kc5 36. Hd5+ Kb6

Sama staðan hefur nú komið upp þrisvar en hvorugur vildi neitt með jafntefli gera.

37. Hd6+ Kc5 38. Ha6 g5 39. Hg6 g4 40. b6 Rc2+ 41. Kb2 Rb4 42.b7 Hf2+ 43. Kb1 Hf8 44. Be6 Kd4 45. Bf7 Kc3 46. Bc4 Hb8 47. Hg7 He8 48. Be6?

Í miklu tímahraki missir Guðmundur af besta leiknum, 48. Be2! á að halda jafntefli því að biskupinn valdar þá a6-reitinn.

48. .. Ra6! 49. Hg6 He7 50. Hh6 Hxb7 51. Hxh5 He7 52. Hg5 Hxe6 53. Ka2 He1

- og Guðmundur gafst upp.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 19. febrúar 2012.

Skákþættir Morgunblaðsins

Athugasemdir

[Þórir Benediktsson (IP-tala skráð) 27.2.2012 kl. 10:40]

Sigurvegari mótsins og skákmeistari Reykjavíkur er ekki það sama.  Ég held alveg örugglega að þeir teljist allir sigurvegarar mótsins og skipti þar með verðlaunafénu.  Hinsvegar var aukakeppnin háð til að skera úr um skákmeistara Reykjavíkur og þar sem Ingvar hefur hvorki búsetu í Rvk né er í reykvísku skákfélagi, þá getur hann ekki borið titilinn.  Ég veit ekki í hvaða félagi Jón Pálsson var í en hugsanlega í Rvk?

Ég er sammála (þó ég taki ekki alveg jafn sterkt til máls) að það hefði gjarnan mátt auglýsa aukakeppnina betur og reyna að gera henni hærra undir höfði.