Stóraukin samvinna Skákskóla Íslands og Skákakademíu Reykjavíkur

Helgi Ólafsson og Stefán Bergsson hafa fyrir Skákskóla Íslands annarsvegar og  Skákakademíu Reykjavíkur hinsvegar gert samkomulag sem varðar margháttað og aukið samstarf þessara aðila á komandi misserum.

Kennarar Skákakademíunnar sem flestir hafa verið kennarar við Skákskóla Íslands munu  sinna kennslu í húsakynnum Skákskólans í byrjenda- og framhaldsflokkum Skákskólans og hefur Stefán Bergsson tekið að sér að skipuleggja sérstaklega  þann þátt. Höfuðverkefni Skákakademíu Reykjavíkur verður hér eftir sem hingað til skákvæðing grunnskólanna í Reykjavík, en nú er hafin regluleg kennsla í  hátt í 30 skólum höfuðborgarinnar. Þá mun SR áfram efna til grasrótarviðburða og verkefna til að auka áhuga og umfjöllun um skák.

Báðir aðilar leggja áherslu á ferska markmiðssetningu þannig að íslensk ungmenni muni,  auk þátttöku í einstaklingsmótum, á næstu árum taka þátt í öflugum flokkakeppnum á borð við Ólympíumót unglinga 16 ára og yngri.  Verði vel haldið utan um þá einstaklinga sem líklegir eru til þátttöku í slíkum mótum.

Meðal þeirra samstarfsverkefna sem Skákskólinn og Skákakademía Reykjavíkur ætla að einhenda sér í er útbreiðsla á Gull, silfur, brons - verkefninu sem Skákakademía Kópavogs hefur lagt mikið til m.a. greitt stofnkostnað til þess og verður því hleypt af stokkunum í grunnskólum Kópavogs þegar í haust. Verkefnið er upp byggt með sama hætti og þau sem Taflfélag Reykjavíkur og Æskulýðsráð Reykjavíkur létu hanna  fyrir nokkrum áratugum eftir skandinavískri fyrirmynd en Helgi Ólafsson hefur tekið að sér að vinna dæmin upp á nýtt. Öllum þeim aðilum sem sinna skákkennslu eða þjálfun barna og unglinga ekki síst í grunnskólum býðst tækifæri á að vinna með þetta verkefni en þegar nemendur hafa lokið hverju stigi gefst tækifæri til afhendingar brons, silfur eða gullmerkja sem Ísspor hefur látið hanna.

Skákskóli Íslands og Skákakademía Reykjavíkur telja að aukin samvinna muni skila sér í stórefldu og markvissu æskulýðsstarfi meðal barna og ungmenna. Markmiðið er ekki bara að finna og þjálfa afreksfólk framtíðarinnar heldur sjá til þess að unga kynslóðin kynnist töfraheimi skáklistarinnar, svo skákin verði áfram hin eina sanna þjóðaríþrótt Íslendinga.