Gallerý Skák - Ingimar vann með yfirburðum

Opið kappskákmót var haldið í gærkvöldi í skák- og listasmiðjunni við Bolholt, þar sem att er kappi frá kl. 18-22 öll fimmtudagskvöld.  Þátttakendur voru 19 talsins, 4 ungliðar og 15 rosknir skákmenn á besta aldri. Sumir sáu vart til sólar en aðrir náðu að láta ljós sitt skína og lönduðu óvæntum vinningum á færibandi.

Viðurgerningur var með besta móti, Sombrero pizzur frá HH í hléi og kaffi og kruðerí þess á milli eins og hver gat í sig látið milli skáka. Þegar upp var staðið og orrahríðinni lauk stóð hinn gamalreyndi Ingimar Halldórsson uppi með 1.5 v. fyrir ofan næsta mann með 9.5 vinning alls af 11 mögulegum. Næstur kom Stefán Þormar með 8 v. g þeir Þorsteinn Æsir Guðlaugsson og Friðgeir Hólm með 7.5, Guðfinnur R.
Kjartansson með 7 og síðan Óskar Long Einarsson sjötti með 6.5 vinninga, sem telst vel af sér vikið hjá honum enda vaxandi skákmaður.

Aðrir voru með ívíð minna og sumir mun minna, eins og gengur og fer ekki fleiri sögum af því, en
dagsforminu kennt um.

Myndaalbúm (ESE)