Strandaglópar - Ferðasaga frá skákhátíð á Ströndum

Um helgina 18.-20. fór fram mikil og skemmtileg skákhátíð á Árneshreppi.  Ritstjóri tók þátt í mótinu og hefur tekið saman smá ferðasögu um hátíðina og því sem henni fylgdi. 

Fyrsta skákhátíðin í Árneshreppi fór fram í hitteðfyrra.  Þá var undirritaður ekki með en í fyrra tók ég þátt og fór þá í fjölskylduferð.  Það skilaði sér strax því þess í stað fékk ég njóta landafræðikunnáttu ferðafélaganna Arons Inga Óskarssonar og Guðmundar Kjartanssonar sem fóru í kostum og urðum við Þorvarður Fannar Ólafsson, sem keyrði, stundum orðlausir.  

Við mættum um kvöldamatarleyti á Djúpavík og var sest niður og horft á hörmungarleiks Englands og Alsír en Englendingar virðast því miður spila lítt betri fótbolta en Ítalir, Frakkar og Þjóðverjar.      

Um kvöld fór fram tvískákarmót.   Ekki fengu skákmennirnir að velja sér liðsfélaga en þar drógu forseti og varaforseti Hróksins í lið og lenti undirritaður í liði með Hrafni og Róberti sem skiptust á að tefla með mér.   Friðrik Ólafsson lék fyrsta leik mótsins fyrir Hrafn og mun þar vera á ferðinni fyrst leikur Friðriks í tvískák og mjög líklega sá síðasti einnig! Sigur vannst þrátt fyrir hetjulega baráttu andstæðinga okkar.  Þetta er annað árið í röð sem Hrafn hrósar sigri á mótinu en fyrra tefldi hann með Jorge Fonseca.

Alla telst mér um að um 18 skákmenn hafi komið að sunnan.  Guðmundur Gíslason og Magnús Sigurjónsson komu úr Bolungarvík.  Afgangurinn voru svo heimamenn sem verður að teljast býsna gott úr þessu litla bæjarfélagi þar sem íbúar eru um 50.  Mér skilst á Hrafni að íbúafjöldinn í hreppnum sé reyndar misjafn.  Færri á veturna en fjölgar umtalsvert á sumrin þegar skólakrakkar koma heim auk þess sem sumir hafa þarna sumarbúsetu.

Ljómandi veður var á föstudagskvöldið.   Rólegt var yfir mannskapnum á föstudagskvöldin og flestir komnir í rúm snemmkvölds.  

Mótið sjálft hófst á laugardag kl. 13 og Róbert skákstjóri mættur tímanlega í skákstjórastjórinn.

Áður en mótið hófst spiluðu og sungu systurnar Árný og Ellen Björnsdætur, frá Melum.  Þær tóku skákþema og spiluðu Black and White með Michael Jackson og svo Svart/Hvíta hetjan með Dúkkulísunum.

Hrafn og Róbert fóru yfir reglurnar og sjálfur menntamálaráðherrann sem var í staðnum ásamt fjölskyldu setti mótið og lék fyrsta leikinn fyrir heiðursgestinn sjálfan, Friðrik Ólafsson, gegn áðurnefndri Árnýju sem á reyndar eftir að koma meira við sögu.   En meira um það síðar.  Friðrik hvatti sér svo hljóðs gaf dóttur Hrafns, Jóhönnu Engilráð afmælisgjöf en sú studda var eins árs fyrir skömmu.

Jóhann Hjartarson var stigahæstur keppenda en næsta stigahæstur var Helgi Ólafsson sem hefur unnið á mótinu tvö síðustu ár.  Rétt eins og fyrra og í hitteðfyrra tóku 3 stórmeistarar þátt og var sá þriðji Friðrik Ólafsson en mótið nú var tileinkað 75 ára afmælis hans sem reyndar kom nú í fyrsta sinn á Strandir.  Meðal annarra keppenda má svo nefna Guðmundana Gíslason og Kjartansson og svo skákstjórann Róbert Lagerman.

Jóhann byrjaði með látum en Helgi mátti lúta í gras fyrir Gíslasyni.  Jói var í forystu allt mótið og endaði með 8 vinninga í 9 skákum, leyfði aðeins jafntefli gegn stórmeisturunum.  Helgi varð annar og Friðrik var þriðji.  Sjálfur tefldi ég við Jóa og Friðrik og fór sá síðarnefndi illa með mig en ég náði að sprikla gegn Jóa

Hlíðar Þór Hreinsson, Róbert, Guðmundur Kjartansson, Sigurður E. Kristjánsson og Sigríður Björg Helgadóttir urðu í 4.-8. sæti.

Fyrir lokaumferðina hvatti Hrafn sér hljóðs .  Rétt eins og í fyrra voru veitt verðlaun fyrir heiðursmann mótsins en þá hlaut Vigfús verðlaunin fyrir íþróttamannslega framkomu gegn Henrik Danielsen.  Nú Hrafn sagði alla keppendur mótsins vera heiðursmenn en þó væri enginn meiri heiðursmaður á mótinu  en sjálfur Friðrik Ólafsson.  Verðlaunin voru lambalæri frá Mel en að sögn Hrafns er sauðfjárrækt þar á svo háu stigi að kalla megi vísindi og list!

Forseti SÍ hvatti sér svo hljóðs og færði hreppstjóranum Oddný Þórðardóttur 3 skákklukkur að gjöf frá Skáksambandinu sem og forsetinn er viss um að þær verð vel notaðar miðaðar við skákáhugann í hreppnum en klukkurnar verða geymdar í skólanum. 

Hrafn kallaði Ásdísi Bragadóttur framkvæmdastjóra SÍ og færði henni veglega bókargjöf og forlátapenna sem var smíðaðir af Valgeiri Benediktssyni bónda og hagleiksmanni í Árnesi í Trékyllisvík. Helstu verðlaunahafar fengu einnig sambærilega penna að gjöf en aðeins eru útbúnir 10 pennar ár hvert.   Valgeir hefur ásamt fjölskyldu byggt upp minjasafnið Kört, sem er einn skemmtilegasti áningarstaðurinn í Árneshreppi. 

Og þá var komið að verðlaunaafhendingunni.  Fyrst voru veitt verðlaun fyrir bestan árangur heimamanna en þau fékk Jakob Thorarensen frá Gjögri sem lagði m.a. undirritaðan í lokaumferðinni.    Jakob fékk einnig verðlaun fyrir bestan árangur stigalausra.

Og þá var komið að Sigríði Björg Helgadóttur!  Hún fékk þrenn verðlaun!  Fyrir bestan árangur ungmenna (1992 og síðar), kvennaverðlaun og svo 1/3 verðlauna fyrir bestan árangur skákmanna undir 2200 skákstigum ásamt Sigurði og Hlíðari!  Frábær árangur hjá stúlkunni.

Um aðalverðlaunahafana hefur verið fjallað.    Hrafn sagði Jóhann Hjartarson vera hálfgerðan heimamann en Jóhann hefur oft komið á Strandirnar þegar hann kenndi skák á Ströndum sem ungur maður.  Bjó hann þar á Bæ og mun víst ganga undir nafninu Jói í Bæ í héraðinu.  Í ár bjó Jói og frú við Krossaneslaugina en þá gistingu fengu þau í verðlaun í fyrra. Jói fékk forláta grip í verðlaun en er að ræða hreindýrshorn sem ráku á land í Mel og úr því búið að smíða mikinn hagleiksgrip en undir hornunum var hvalbein.  

Sjálfur hefði ég tekið mig til og klætt mig í teinóttu jakkafötin mín sem ég var einmitt í þegar ég varð fertugur árið árið 2007.  Hugsaði ég mér gott til glóðarinnar og var sannfærður um sigur í keppninni um best klædda keppendann.   Þar misskyldi ég hlutina allhrapalega og var illalega tekinn niður af forseta Hróksins.  Sagði hann fatnað minna minna sig á sem Ísland hafi staðið fyrir og væri ég klæðnaður minn  hluti af gamla Íslandi.    Verðlaunin sú fóru til Árnýjar fyrir þjóðlegan stíl og úthugsaða samsetningu.  Jakkafötin verða skilin eftir að ári!

Svo var haldið á hótelið og þar boðið upp á forláta hlaðborð sem margir keppendur gerðu góð skil.   Um kvöldið gerðu menn sér dagamun en keppendur klikkuðu á því að skilja eftir skákborð á hótelinu og var bara eitt skáksett á staðnum.   Mátti sjá suma að betri skákmönnum landsins og suma af forsvarsmönnum skákhreyfingarinnar grípa í Bridge við undrun sumra yngri skákmanna.  Var minnt á að þetta hefði Óli H. aldrei leyft! 

Skemmtu menn sér vel fram á kvöld og létu plássleysi ekki há sér.   Fengu menn hin ýmsu viðurefni og get ég þar nefnt Stevie, Freud og Jón forseti.   Brjálað veður gerði um nóttina og þurftu þeir sem gistu í tjaldi að flýja inn í hús eða bíla. 

Á sunnudeginum var svo hraðskákmót á Norðurfirði.  Þangað er 35 mínútna akstur.   22 skákmenn tóku þátt og hefðu væntanlega verið fleiri ef ekki hafði verið fermingarveisla sama dag.  Flestir sunnanmannanna tóku þátt enda rétt að leggja á sig smá aukakrók þegar á Strandir er komið.    Helgi og Friðrik höfðu þó haldið á braut á laugardagskvöldið.

Gunnsteinn Gíslason aldursforseti Árneshrepps lék fyrsta leikinn fyrir Jóhann Hjartarson. Hann var í sveitarstjórn í 48 ár, sem muna vera Íslandsmet.   Tefldar voru sex umferðir og þar hafði skákstjórinn Róbert Lagerman sigur.  Hlíðar sem hafði sigrað Jóa í Bæ var efstur fyrir lokaumferðina en tapaði fyrir Robba í lokaumferðinni.   Jóhann, Hlíðar, Gíslason, Hrafn og sá sem þetta ritar urðu í 2.-6. sæti með 4,5 vinning.  Róbert fékk í verðlaun peningaverðlaun auk gistingu við Krossaneslaugina.    Jói fékk hamborgara fyrir tvo í Kaffi Norðurfjarðar og Guðmundur Gíslason fékk siglungu um verðlaun sem réttu hafðu átt að renna til Jóa en þar sem hann hafði ekki nýtt sér sömu verðlaun í fyrra runnu þau til þriðja manns. 

Að loknu skákmóti var haldið heim á leið.   Þá var í ég för með mínum gamla skólafélaga úr Verzló, Birgi Rafn Þráinssyni og Vinjarmanninum.  Guðmundi Valdimari.  Pústið fór hjá Birgi og skilst mér að það hafi svo sprungið hjá Helga Árna!  Strandirnar tóku sinn toll!

Ekki fór ég Krossaneslaugina en um það höfðu verið höfð stór orð.  Úr því verður bætt að ári með góðu eða illu. 

Þrátt fyrir er það er ekkert mál að fara á Strandir í dag.  Eftir að Arnkötluheiðin var opnuð er ekki nema um 3ja tíma akstur á Hólmavík og þaðan er klukkutímaakstur á Djúpavík.  Þetta tekur því skemmri tíma en að keyra til Akureyrar.

Skáksambands Íslands styrkti mótshaldið um 50.000 kr. úr landsbyggðarsjóði sambandsins og getur sambandið verið stolt að því enda boðið upp á glæsilega skákhátíð.   Hrafn og Róbert hafa byggt upp skemmtilega stemmingu á mótsstað og sjálfur er ég harðákveðin að koma að ári og ætla þá að gefa mér meiri tíma og skoða Strandirnar betur og helst að tryggja mér leiðsögn Guðmundar og Arons Inga. 

Hvet alla til að taka frá þriðju helgina að ári og láta sig ekki vanta á Strandirnar.   Það er vel þess virði.

Myndirnar eru frá Gunnari Björnssyni og Helga Árnasyni.

Allar myndirnar (88) má finna í myndaalbúmi mótsins.

 

Lokastaðan úr Djúpavíkur-mótinu má svo sjá hér:

 

Röð	Nafn	Stig	Vinn.
1	Jóhann Hjartarsson	2625	8
2	Helgi Ólafsson	2540	7,5
3	Friðrik Ólafsson	2510	6,5
4-8	Hlíðar Þór Hreinsson	2195	6
	Róbert Harðarson	2375	6
	Guðmundur Kjartansson	2320	6
	Sigurður E, Kristjánsson	1915	6
	Sigríður B, Helgadóttir	1680	6
9-12	Guðmundur Gíslason	2345	5,5
	Þorvarður Ólafsson	2190	5,5
	Jakob Thorarensen		5,5
	Einar Valdimarsson	1870	5,5
13-17	Hrannar Jónsson	1900	5
	Vigfús Óðinn Vigfússon	1935	5
	Jón Birgir Einarsson	1665	5
	Birgir Rafn Þráinsson	1636	5
	Stefán Karlsson		5
18-22	Gunnar Björnsson	2095	4,5
	Magnús Gíslason	1970	4,5
	Magnús Sigurjónsson	1825	4,5
	Aron Ingi Óskarsson	1845	4,5
	Hrafn Jökulsson		4,5
23-28	Guðmundur Valdimar Guðmundsson		4
	Björn Torfason		4
	Arnar Valgeirsson		4
	Kristján Albertsson		4
	Pétur Ingólfsson		4
	Ingólfur Benediktsson		4
29-31	Þórður M, Tryggvason		3
	Örnólfur Hrafnsson		3
	Ólafur Thoarensen		3
32	Árný Björnsdóttir		2,5
33	Skarphéðinn Jónsson		2
34-35	Kristinn Ari Hermannsson		1
	Ásta Þorbjörg Ingólfsdóttir		1
36-38	Kristjana María Ásbjörnsdóttir		0
	Sunneva María Arnarsdóttir		0
	Birnir Logi Arnarsson		0

 

Gunnar Björnsson